Read Achang VPOM 28 Bible Online

VPOM 28 - Achang bible

VPOM 28

¹Housoeh las Isak gas Yakop lyis khi yoeus shvmanh dyei uhjyangh, Nvng Khanan lonyi vyoeus.

²Padan Aram mas nah ungwes dah uwus Bethuel yhen mha lvnyap loh aq. Houmha nah ungwes dah mungs Laban dah lonyi dvyuk yuk loh yoeus aq.

³Yomzains Mangso ka nvng lyis shvmanh dyei las nvng lyis jebais los nhang lha dius nyau zainsmuh bweh nhang bas jungh.

⁴Mangso Abraham lyis dyei las gvshih nvng boengh duot nyeis dah, haih mau nah vso vlho bweh das xiklyis nvng lyis eq, nah vnyau vshih lyis eq, Abraham dah shvmanh nyang dyei bas jungh, ge taiq kat.

⁵Housoeh Isak gas Yakop lyis nhang kat las, Yakop gas Padan Aram mas nyeis, nyang yahge Esau ungwes Rebeka dah mungs, Aramean dius Bethuel dah lo Laban jyank mas loh.

⁶Housoeh Isak Yakop lyis shvmanh dyei las Padan Aram mau mas yhensain nyhiq e yoeus bas jungh ge nhang kat zis eq, nyang lyis shvmanh dyei uhlyis Khanan lonyi ma yoh yoeus, ge tung toh zis eq:

⁷Yakop gas ungwes uwus domsyos gyo las Padan Aram pheh loh.

⁸Nyah uwus Isak gas Khanan lonyi ma o zis Esau seq lyis,

⁹Nyang Ishmael jyank loh las, nyizains aiq yuk thoq lyis gohtoeu Abraham dah gungs mas yaus Ishmael lo, Nebaiot dah nhamhmuh Mahalat lyis yoeus.

¹⁰Yakop gas Besheba masyah thuq las Haran pheh loh.

¹¹Nyang dvjoqyos[27] mas jweh lyis buiswvng goeus yvmvyah houmha nyens ku das ge, luk dvlom kui khoeuq las yhet.

¹²Nyah yhetmoq mas yoeuh aq, nyeisjvng mas zvmlhangh dvkoeuq thung zis mau lyis thuk toh. Mangso dah loeuswons bang eq houmha doq gyoh tsain kuot nyeis.

¹³Yoeuh aq, YHENSAIN ka zvmlhangh thyoh mas yap las, Ngos gas YHENSAIN nah vphauh Abraham dah Mangso, nah uwus Isak dah Mangso nghuot. Gvshih hai nvng yhet joq mau, nvng lyis eq, nah vnyau vshih lyis eq ngos dyei das.

¹⁴Nah vnyau vshih gas nyeisjvng mas tsohmop teh je los das; Nvng gas buisthuq buiswvng, mautsung mautyi dyos loh das las, nvng yahge nah vnyau vshih gvng mas nyeisjvng thoq mas dius nyau khanghmuh jebais los dah shvmanh tsain yoh das.

¹⁵Yoeuh aq, ngos nvng yah dvgeh nghuot; nvng loh cho khanghmuh mas ngos chank gomh das; ngos nvng lyis haih mau mas doms shwih los das: ngos nvng yah chap toh thanghchvp ma nyuk dvchank ngos nvng lyis ma toh tyamp, ge taiq.

¹⁶Yakop yhet soh los las, Heimha YHENSAIN jyoengh nyeis nyvng zis ngos ma seq, ge.

¹⁷Nyang gas gyuk zoh lyis yah, Joqyos haih zis gas svsoh gyuk chank bos nyvng. Haih joqyos gas gohtoeu ma nghuot. YHENSAIN dah yhen yahge maukhung dah khomh dwang dvnghuot nyvng, ge.

¹⁸Yakop gas noq yah toq las, nyang khoeuq yhet dah luk lyis zains teh cuk lho lha, phauh nyang paiq khyvlyis hauh zains thyoh mas coeu huot kat.

¹⁹Nyang hauh joqyos lyis Bethel[28] ge eq nyhink toh. Xikpheh gas hauh wus lyis Luza dvge.

²⁰Yakop houmha nyhen toh zis gas, Mangso nyang ngos yah dvgeh nyeis las, gvshih ngos suh e cho mha ngos lyis gomh dyei zis yah, zo das wom yahge wuot das dyimis dyei las,

²¹ngos ngah uwus yhen mha nyenstap zis yah doms jweh los shoq YHENSAIN, ngah Mangso duot dyei lyis gas,

²²Hai ngos phu cuk dah luk eq Mangso dah yhen duot das. Nvng ngos lyis dyei zis dvnganh masyah ciboms dvboms ngos nvng lyis jyoengh dyei das, ge.