Read Achang VPOM 29 Bible Online

VPOM 29 - Achang bible

VPOM 29

¹Yakop nyah gyung cho tsoq loh las buisthuq mau bang nyeis yvmas jweh loh.

²Nyang yoeuh kat lyis hauh pa mha jeisdwang dvkoeuq bos zis nyvng. Hauh jeisdwang mas jeis gyangh gvmshuk las hauh nvm mas yvng somh phung whop joq. Hauh jeisdwang nghop dah luk gas kuh.

³Houmha yvng phung dvnganh dye tsainh toh thang lhyi, yvng yoeuh bang gas jeisdwang nghop toeu phanh las yvng lyis jeis tsain gvmshuk lho lha hauh luk lyis doms toeu nghop toh toh kuot.

⁴Yakop gas nyamoq lyis, Vmang vnoeuh moq eh, namoq khamha bang nghuot goh lah, ge nyei lyis nyamoq gas, Haran bang nghuot, ge.

⁵Tsai, nyang gas, Namoq Nahor nyeilo Laban lyis vseq goh lah, ge doms nyei lyis nyamoq gas, Seq, ge.

⁶Nyang dvyangh nyeis lhyeh, ge lyis nyamoq gas, Yangh nyeis; yoeuh aq, nyah lonyi Rakhel eq yvng komp los nyeis, ge.

⁷Yakop gas, Yoeuh aq, buis xing shih, gaunyhauq tsainh yoq ma nghuot shih; yvng lyis jeis gvmshuk lho lha loh yoeuh shih geh, ge.

⁸Nyamoq gas, Yvng phung dvnganh dye zain las, haih luk ma toeu tyamp dvchank ngamoq cha ma yoh kuot: Luk toeu tyamp thang lhyi ngamoq yvng lyis jeis dvyoh gvmshuk, tsain ge.

⁹Housoeh nyamoq yah jisgoh nyeis shih lyis Rakhel eq nyah uwus dah yvng yoeuh las, yvng tsain komp jweh los.

¹⁰Yakop gas nyah yukphoq Laban dah lonyi Rakhel yahge nyah yvng lyis tsain nyvng lyis, e lha, jeis dwang nyhop luk lyis toeu phanh lho lha Laban dah yvng lyis jeis tsain gvmshuk.

¹¹Housoeh Yakop gas Rakhel lhyi bvlot tanh lho lha thwe thuq shoq ngaus.

¹²Yakop gas Rakhel lhyi, nyang gas Rakhel uwus dah loau, Rebeka dah lo nghuot cho taiq kyoh. Rakhel nyah uwus lyis loh wuih taiq.

¹³Laban gas nyah loau Yakop dah loeus xauhgyo lyis, nyang lyis zes das ge wuih e lha, nyang lyis bvlot po tanh lho lha yhen mha shwih loh. Yakop eq nyah cho dvnganh Laban lyis taiq kyoh.

¹⁴Housoeh las Laban gas, Nvng gas ngah suih ngah shoh sain nghuot, ge. Housoeh nyah jyank mas lhamhmuh dvkhyvp nyeis.

¹⁵Laban gas, Nvng ngah loau nghuot; housoeh las nvng ngos lyis mvgon pangh tyamp das lhyeh. Nah uhkung phauh khanyhoq toh das zis ngos lyis taiq aq, ge.

¹⁶Laban lonyi aiq yuk yoh; kuh soeu nyings Lea, ngis soeu ka Rakhel nghuot.

¹⁷Lea gas nyoqjeih yom dvtsiq nhuk; Rakhel gas gungs khyank eq nyoqnho eq yungh.

¹⁸Yakop gas Rakhel lhyi ngwis las Laban lyis, Nah lonyi ngis vyuk Rakhel xiklyis ngos nvng lyis nyhet zvn phuqsoe das, ge.

¹⁹Laban eq, ngos gohyuk lyis dyeizo das thoq lyis nvng lyis dyeizo lyis zes gis, ngah jyank mas nyeis goh, ge.

²⁰Yakop gas Rakhel xiklyis nyhet zvn phuqsoe; Nyang Rakhel lhyi ngwis yvmvyah khanyhank nyangh teh ma mus.

²¹Gvshih shishenh jweh las Yakop gas Laban lyis, Taiq toh shishenh jweh goeus, ngah yhensain nyhiq ngos yoeus lo bah, dyeizo aq, ge.

²²Housoeh las Laban gas, houmha bang dvnganhmoq lyis khi lha pwe kuot.

²³Nghuot laus eq nyenhthang lhyi nyang nyah lonyi Lea lyis Yakop jyank mas shwih hwank kat dyei; Yakop eq nyah jyank mas wvng yhet.

²⁴Laban gas nyah jyeidwis Zilpa eq Lea lyis phiqkya kya dyei.

²⁵Gvshih nvpyo lyis, yoeuh aq, Lea dvnghuot. Housoeh las Yakop gas Laban lyis, Hai nvng ngos lyis kuot cho cha nghuot? Rakhel xiklyis oen ngos nvng lyis phuqsoe ma nghuot lhyeh? Housoeh dvnghuot zis nvng ngos lyis chamus hwah zo, ge.

²⁶Laban gas, Vbi ma dyeizo shih lyis vnoeuh lyis dyeizo thungh ngamoq mas ma bos.

²⁷Hai pwe yoq dvdaus dyingh shih bas jungh: hauh thang lhyi nvng nyhet zvn doms phuqsoe das xiklyis ngamoq Rakhel lyis eq dyei das, ge toeuh.

²⁸Yakop eq hauh dang yah dvyhangteh dvdaus langh lho lha, Laban gas nyah lonyi Rakhel lyis eq dyeizo.

²⁹Laban gas Rakhel lyis nyah jyeidwis Bila phiqkya kya dyei.

³⁰Yakop gas Rakhel jyank mas eq wvng yhet las, Lea thoq lyis Rakhel lhyi zes ngwis. Housoeh nyhet zvn top phuqsoe shih.

³¹Gvshih Lea lyis ma tham jyet yvlyis YHENSAIN nyvng dyei las nyang lyis lo bos das cho phank dyei. Rakhel ka dius thonh bweh nyeis.

³²Lea ung mha loshang bos las yukgis lo khoeu. Nyang lyis Ruben[29] nyhink: khasoeh ge lyis nyang gas, Ngos nhaiqngis nyeis uhlyis YHENSAIN yoeuh dyei, housoeh las ngah yhensain phoq ngos lyis ngwis lo das, ge.

³³Tsai, nyang ung mha loshang bos las yukgis lo doms khoeu. Nyang lyis Simon[30] nyhink: khasoeh ge lyis Lea gas, Ngos lyis ma jyet cho YHENSAIN xauhgyo dyei las ngos lyis haih loshang eq dyei, ge.

³⁴Tsai, nyang ung mha loshang bos las yukgis lo khoeu. Hauh uhlyis nyang gas, Gvshih ngah yhensain phoq ngos yah zomh lo das; ngos nyah xiklyis yukgis lo somh yuk khoeu dyei goeus, ge lo lyis Lewi[31] nyhink.

³⁵Tsai, nyang ung mha loshang chi lha yukgis lo khoeu. Hauh uhlyis nyang gas, Gvshih ngos YHENSAIN lhyi chungh lo das, ge lo lyis Yuda[32] nyhink. Hauh thang lhyi lo ma bos nyeis.