Read Achang VPOM 32 Bible Online

VPOM 32 - Achang bible

VPOM 32

¹Yakop eq nyang loh cho tsoq loh nyeis lyis Mangso dah loeuswons bang nyang lyis los zes.

²Yakop gas nyamoq lyis nyvng lyis, Heika Mangso dah jesphung thoenggus nghuot, ge hauh joqyos lyis Mahanaim[38] nyhink.

³Hauh thang lhyi Yakop gas Seir mau Edom pa mha nyeis, nyah vmang Esau jyank mas loeuswons bang lyis xik nhang kat.

⁴Nyang nyamoq lyis taiq kat zis gas, Nah jyeidwis Yakop gas gvshih jweh shoq Laban jyank mas khau nyeis.

⁵Ngos noeu eq, mauhlyihzoe eq, yvng shvbeq phung eq, jyeidwis vbusbih jens vmesbih jens eq nyoshoq yoh: ngos ngah yhensain xikkhonh mas nyoqnho yoh bas jungh, oen tying kat ge, oen ngah yhensain Esau lyis taiq dyei geh, ge.

⁶Loeuswons bang tauh los las Yakop lyis taiq zis gas, Ngamoq nah vmang Esau jyank mas jweh khoq; nyang nvng lyis zes das ge dius nyeixo yah los nyeis, ge.

⁷Housoeh las Yakop gas svsoh gyuk zis yah ehnyet nyo nyeis las, nyah thang chank bang, yvng shvbeq phung, noeu phung, gola-u lyis aiq gvm tsain khyoq.

⁸Khasoeh ge lyis, dvgvm lyis Esau nyvng las thyoq loh lyis, dvgvm gas luiq mvbeh, ge.

⁹Yakop gas, Ngah vphauh Abraham dah Mangso, ngah uwus Isak dah Mangso ngos lyis nah mau, nah vnyau bang jyank mas doms loh aq, ngos nvng lyis dis los nhang das ge taiq dah YHENSAIN eh,

¹⁰Nvng nah jyeidwis lyis chixoeuq dah jyehjuh yahge lomluk cho ngos dvkoeuq eq ma mon. Xikpheh ngos haih Yodan lvng lyis goeu uhlyis ngos lhamloq kyingh dvyoh, gvshih gas ngos aiq gvm nghuot goeus.

¹¹Ngos lyis ngah vmang Esau loq masyah jenh lhuiq kat aq. Nyang jweh las ngos lyis eq, vmesbih jens yahge vlo jens lyis eq zan das zis chiqh.

¹²Ngos nvng lyis jyoengh nyeisgis nhang das; nah vnyau vshih lyis thomh yvm mas ma thoq suon lo dah sihsho teh je los nhang das ge nvng sang, ge.

¹³Nyang houmha dvnyens gonh nyeis las nyang yoh zisyos masyah vmang Esau lhyi jyungshuk ge,

¹⁴shvbeq zains aiqxo, beqlus aiqci, yvng zains aiqxo, vlus aiqci;

¹⁵nauh shuk gola-u somhci metang; noeu zains nyeici, noeulu dvci, luzoe zains aiqci, luzoe lus dvci khyen toh.

¹⁶Housoeh nyang phung nyang, jyeidwis jens loq mas tsomh lho lha hauh jyeidwis jens lyis, Ngah xik pheh goeu las dvphung yah dvphung we we lo kyo lha loh geh, ge taiq kat.

¹⁷Xik pheh loh soeu lhyi taiq kat zis gas, Ngah vmang Esau nvng yah xauhgoh las, Nvng hank dius nghuot? Khapheh loh, nah xik mas gaunyhauq hank zis, ge nyei lyis,

¹⁸Nah jyeidwis Yakop zis nghuot; nvng yhensain Esau lyis dyei kat jyungshuk nghuot; nyang gas thang mha nghuot shih, oen taiq aq, ge.

¹⁹Houyah dvyhangteh aiq vphung, somh vphung, xik loh soeu lhyi eq, phung khanghmuh mas chank bang lyis eq, Namoq ngah vmang Esau yah xauhgoh lyis housoeh taiq geh, ge eq;

²⁰Nah jyeidwis Yakop thang mha dvnghuot shih, oen taiq geh, ge eq tying kat. Khasoeh ge lyis gvshih ngah xik pheh loh goeus jyungshuk yah ngos nyah nhaiqlom lhoq tap das. Housoeh ngos nyang yah xauhgoh lyis nyang ngah nyoqnho mes yoeuh mvbeh, ge Yakop nghamh.

²¹Housoeh nyah xik mas jyungshuk kat kat las, nyang gas hauh nyens lyis hauh dius phung yah dvgeh nyeis.

²²Gvshih hauh nyens lyis Yakop toq las nyah yhensain nyhiq nhaiqtang yahge jyeidwis nhaiqtang lyis eq, nyah lo jens dvci dvyuk moq lyis eq shwih las Yabok lvng thyitvp pheh koeuh kat.

²³Housoeh nyamoq lyis shwih las nyah zisyos yoh ya yoh yvlyis koeuh kat.

²⁴Yakop nyang dvyuk kyingh gyoh nyeis las dius dvyuk mau buh shoq nyang yah lomgoh nyeis.

²⁵Hauh soeu ka nyang ma yoh ung zis lyis seq lyis Yakop dah dvngtsom gyi lyis thauh dyei las nyang yah lomgoh nyeis lyis nyah dvngtsom lhaiq tyamp.

²⁶Hauh soeu ka nyoq nyvng las, Ngos lyis kat kat aq, ge. Yakop gas, nvng ngos lyis ma shvmanh dyei lyis gas ma kat kat, ge.

²⁷Tsai, hauh soeu ka, Nah nyings cha nghuot, ge nyei lyis, Yakop nghuot, ge taiq kyoh.

²⁸Hauh soeu ka, Nah nyings Yakop ma nghuot lo. Nvng gas Mangso yah eq dius yah eq loeutyonh ung yvmvyah nah nyings Israel dvnghuot lo, ge.

²⁹Yakop eq, Nah nyings cha nghuot ngos lyis taiq kyoh aq, ge nyei lyis hauh soeu ka, Nvng ngah nyings chamus nyei, ge lho lha nyang lyis shvmanh dyei.

³⁰Housoeh las Yakop hauh joqyos lyis Peniel [39]nyhink. Khasoeh ge lyis ngos gas Mangso yah nyoqnho changh nyvng goh laus eq ma shei, ge.

³¹Peniel masyah thuq lyis buisloq baiq goeus; nyah khyei eq yhwe goeus.

³²Housoeh Yakop dah dvngtsom gyi lyis thauh dyei yvmvyah, Israel jens khvnyhik jweh shoq dvngtsom gyi ma tsain zo.