Read Achang VPOM 35 Bible Online

VPOM 35 - Achang bible

VPOM 35

¹Hauh thang lhyi Mangso Yakop lyis taiq zis gas, Bethel mha lvnyap loh doq nyeis aq; nvng nah vmang Esau jyank masyah phang uhlyis nvng lyis thuq xoeuq dah Mangso xiklyis phon ci dyei aq, ge.

²Housoeh las Yakop gas nyah yhenbang yahge nyang yah dvgeh nghuot bang dvnganh lyis nyamoq yoh dah lvbaus mangso lhyi tyamp geh; namoq nyang gungs lyis shangkyei nhang lha dyimis thaiq geh.

³Bethel mha doq loh das zis dyens toq goh ngos shanghsenh buisnyeis lyis ngos lyis gyo yoeus dyei las ngos suh e cho mha ngos yah dvgeh nyeis dah Mangso xiklyis ngos houmha phon ci das, ge.

⁴Hauh uhlyis nyamoq gas nyamoq nyang tsain yoh dah lvbaus mangso dvnganh yahge nodangh dvnganh yah Yakop lyis tsain kyauh las, Yakop gas hauh yvlyis Shekhem nvm mas yuk dah wons zains khyei mha nyhop tyamp dyei.

⁵Housoeh nyamoq tsain cheh loh. Vwi vyvm mas dah wugungs bang mas Mangso kyuk cho bos yvmvyah, nyamoq Yakop yahge nyah loloeu jens lyis ma womh chank khat.

⁶Yakop yahge nyang yah dvgeh loh bang dvnganh Khanan mau, Luza ge dah Bethel mha tsain jweh loh.

⁷Nyang houmha phon ci lha hauh joqyos lyis El Bethel ge nyhink. Khasoeh ge lyis nyang nyah vmang jyank masyah phang uhlyis, Mangso ka houmha nyang lyis thuq xoeuq.

⁸Gvshih Rebeka lhyi bau kat soeu Debora shei lha Bethel mha yuk dah wons zains khyei mha nyhop. Housoeh las hauh saiq lyis ngaus dah wons zains ge, Alonbakhut nyhink.

⁹Yakop Padan Aram masyah tauh los thang lhyi Mangso ka nyang lyis dvlhain doms thuq xoeuq las shvmanh dyei.

¹⁰Shvmanh yvmas Mangso ka, Nah nyings Yakop nghuot, thang pheh nah nyings Yakop oen ma lui lo, Israel ge dvlui lo das, ge nyang lyis Israel nyhink.

¹¹Tsai Mangso ka nyang lyis, Ngos Yomzains Mangso nghuot; jebais las nyo los aq; dvnyau ma goh, vnyau nyoshoq nvng masyah dyos das, nvng masyah hwankti eq tsain thuq los das, ge.

¹²Ngos Abraham yahge Isak lyis dyei goeus dah maunyeis nvng yahge nah vnyau vshih lyis eq dyei das, ge.

¹³Hauh thang lhyi Mangso ka nyang yah jisgoh masyah doq loh.

¹⁴Yakop gas Mangso yah xauh jisgoh joqyos mas luk dvlom cuk jyih toh las hauh thoq mas shuk phoh jyungshuk yahge coeu huot kat.

¹⁵Yakop gas Mangso yah xauh jisgoh las, nyang hauh joqyos lyis Bethel ge nyhink.

¹⁶Hauh thang lhyi nyamoq gas Bethel masyah doms cheh loh. Ephrat jweh das zis we shih lyis Rakhel ka khoeu das buisnyeis jweh las nos changh nyeis.

¹⁷Housoeh khoeu yau nyeis lyis bos yoeuh khoeu dyei soeu ka, Vgyuk, nvng yukgis lo dvyuk doms yoh goeus, ge.

¹⁸Rakhel ka shei loh nyeis lyis hauh loshang lhyi Ben-oni[42] ge nyhink khoq; nghuot laus eq nyah uwus gas Benyamin[43] dvlui.

¹⁹Housoeh Rakhel shei lha Betlehem ge dah Ephrat pheh loh dah choyvm mas nyhop.

²⁰Yakop eq nyah lop thoq mas luk dvlom cuk jyih toh. Hauh luk gas khvnyhik jweh shoq Rakhel dah lop jyih luk nghuot.

²¹Hauh thang lhyi Israel gas doms cheh las Elen tyoeuqzvm lai yvmas nyah zvng kuot.

²²Israel houmha nyeis yoq lyis Ruben nyah uwus nyinhungh Bila yah wvng yhet: hauh cho lhyi Israel xauhgyo. Yakop dah lo jens dvci aiq yuk nghuot.

²³Lea khoeu kat bang Ruben, thang lhyi Simon, Lewi, Yuda, Isakha, Zebulun.

²⁴Rakhel dah loloeu tang Yosep yahge Benyamin.

²⁵Rakhel dah phiqkya Bila lotang ka Dan yahge Napthali.

²⁶Lea dah phiqkya Zilpa lotang ka Gad yahge Asher nghuot. Haih lo jens gas Padan Aram mas khoeu bang nghuot.

²⁷Yakop gas Abraham yahge Isak nyeis khoq, Mamre mau Hebron ge Kiriat Arba mas nyeis uwus Isak jyank mas jweh loh.

²⁸Isak gas dvxo xetci zvn nyeis khoq.

²⁹Nyang mang shei lha nyah vnyau huom yvmas jweh loh. Nyah loloeu tang Esau yahge Yakop gas nyang lyis ba nyhop.