Read Achang VPOM 37 Bible Online

VPOM 37 - Achang bible

VPOM 37

¹Gvshih Yakop gas nyah uwus nyeis khoq Khanan mau mas nyeis.

²Heika Yakop vkoq dah diusjangh caiq nghuot. Yosep gas dvci nyhet zvn bos lyis nyah vmang moq yah dvgeh yvng shvbeq yoeuh nyeis. Nyang gas nyah uwus dah yhensain nyhiq Bila yahge Zilpa dah lo jens yah zomh las nyamoq dah ma shop loeus nyah uwus lyis taiq kyoh kyoh kuot.

³Israel gas nyang mang thang lhyi Yosep dvyoh yvmvyah nyah lo jens gohyuk thoq lyis nyang lyis zes jyetdap. Nyang lyis dyixing yungh eq chop dyei.

⁴Nyamoq dah uwus gas Yosep lyis nyah lo jens dvnganhmoq thoq lyis zes jyet yvlyis nyah vmang moq nyvng lyis Yosep lyis hoeng lha, nyang lyis dang gis dvkhonh eq ma tsain mes jis.

⁵Dvlhain ka Yosep yhetmoq moq las, hauh zis nyah vmang moq lyis taiq kyoh goeus ya nyang lyis zes hoeng los.

⁶Housoeh nyang gas nyah vmang moq lyis, Hai ngos moq dah yhetmoq bos gyo dyei geh.

⁷Yang danh mas gukphu tsain dain nyeis lyis yoeuh aq, ngah gukphu ka zungh zungh toq yap joq. Namoq dah gukphu ka ngah gukphu lhyi lhaink las tsain paiq nyeis, ge.

⁸Nyah vmang moq gas, Nvng ngamoq thoq mas jyoengh hwankti kuot las guon das lhyeh, ge nyah yhetmoq yahge nyah dang gvng mas nyang lyis zes tsain hoeng.

⁹Nyang yhetmoq dvkoeuq doms moq las nyah vmang moq lyis, Yoeuh aq, ngos yhetmoq dvkoeuq doms moq. Buis, lhamhmuh yahge kyi dvci dvchvp ngos lyis tsain paiq, ge taiq kyoh.

¹⁰Housoeh nyah uwus yahge nyah vmang vnoeuh moq lyis taiq kyoh goeus ya, nyah uwus gas, Chah yhetmoq gah? Ngos yahge nah ungwes moq eq, nah vmang moq eq nah xikkhonh mas jyoengh dupaiq das lhyeh, ge nyho.

¹¹Nyah vmang moq gas nyang lyis noh; nyah uwus gas hauh dang lyis nghamh comh toh.

¹²Hauh thang lhyi nyah vmang moq gas nyah uwus dah yvng shvbeq phung lhyi Shekhem wus nvm mas loh yoeuh das ge tsain loh.

¹³Israel Yosep lyis taiq zis gas, Nah vmang moq Shekhem nvm mas yvng yoeuh nyeis ma nghuot lhyeh? Los aq, ngos nvng lyis nah vmang moq jyank mas nhang kat das, ge. Nyang gas, Ngos loh das, ge.

¹⁴Nyah uwus nyang lyis taiq zis gas, Nvng loh aq, nah vmang moq vyanghzan nyeis lah, yvng shvbeq phung vchentkhyi lah, loh yoeuh khoq las ngos lyis los taiq kyoh aq, ge Hebron langhkhau mhayah nyang lyis nhang kat. Housoeh nyang Shekhem nvm mas jweh loh.

¹⁵Nyang hauh pa mha suh whang yenh yvlyis dius dvyuk nyvng las, Nvng cha xo, ge nyang lyis nyei.

¹⁶Nyang gas, Ngos ngah vmang moq lyis xo, nyamoq yvng shvbeq khamha yoeuh nyeis, ngos lyis jenh taiq kyoh aq, ge.

¹⁷Hauh soeu ka, Nyamoq hei mhayah cheh loh goeus; Dothan mha cheh goh, ge taiq goh zis ngos xauhgyo, ge taiq kyoh. Yosep eq nyah vmang moq lyis chank xo lha nyamoq lyis Dothan pheh loh nyvng.

¹⁸Nyang we mas nghuot shih lyis nyamoq nyvng las, nyamoq jyank mas ma jweh los shih lyis nyang lyis sat das zis tsain lhaink.

¹⁹Nyamoq gas, Yhetmoq moq soeu los goeus.

²⁰Los geh, yamoq nyang lyis sat las jeisdwang cauh dvkoeuq koeuq mas khyoq tyamp goh, housoeh nyang lyis yewus yah ngat zo goeus oen taiq goh; hou lhyi nyah yhetmoq cha duot das zis yang yoeuh goh, ge.

²¹Ruben hauh zis xauhgyo lyis, Nyang lyis sat gas ma sat goh, ge nyamoq loq masyah khyuot yoeus toh.

²²Ruben gas, suih vlhoq thuq goh, vnos nhang goh, thyi mhanhdyvp dwang mas khyoq kat tyamp goh, ge. Houka Yosep lyis nyamoq loq masyah khyuot yoeus las nyah uwus jyank mas loh shwih kat das ge nghamh las nghuot.

²³Housoeh Yosep nyah vmang moq jyank mas jweh loh lyis nyamoq gas nyang wuot chi dah dyixing yungh khyuot yoeus lho lha,

²⁴Nyang lyis hau dwang lungh khau mha tsain nyhik doeuh kat toh. Hauh dwang gas jeis ma bos, vkom nghuot.

²⁵Hauh thang lhyi nyamoq wom zo das ge tsung toh. Housoeh nyamoq yoeuh nyeis lyis, Gilead mau mas dah Ishmael dius soenghi kuot bang jens los nyeis yvlyis nyvng. Hauh bang gas gola-u mas saiq xangh gyei, Balsam, mura tsain thuq las Egutu pheh gyoh e.

²⁶Hauh uhlyis Yuda gas nyah vmang vnoeuh moq lyis, Yang hai yah vnoeuh lyis sat las nyah suih nghop shung toh lyis yah xiklyis chah vmyat bos lah?

²⁷Lyoh geh, yang nyang lyis ma nos nhang nhang, Ishmael jens lyis ungh kat goh, nyang yah vnoeuh, yah suih shoh dvnghuot, ge. Vmang vnoeuh moq eq xamxonh.

²⁸Gvshih Midian soenghi jens lai loh nyeis: nyamoq eq Yosep lyis dwang masyah she toq yoeus las Ishmael jens lyis ngwis kyvp aiqci lyis yah ungh kat. Housoeh las Yosep lyis Egutu pheh shwih e.

²⁹Gvshih Ruben hauh dwang lungh mas tauh los lyis, dwang mas Yosep ma nyeis lo zis nyvng; Housoeh las nyang nhaiqngis las nyah dyixing langchuiq tyamp.

³⁰Nyang nyah vnoeuh moq jyank tauh los las, Dwang mas loshang ma nyeis lo, ngos khasoeh daq kuot lo das au, ge.

³¹Housoeh las nyamoq gas beqlus dvdoeu sat las, hauh suih mas Yosep dah dyi duon jens.

³²Hauh thang lhyi nyamoq gas hauh dyixing yungh nyamoq uwus jyank mas wons loh las, Haih dyi ngamoq nyvng; nah lo dah dyi nghuot ma nghuot yoeuh aq, ge.

³³Nyamoq uwus gas hauh dyi lyis comh toh las, Haih zis ngah lo dah dyi nyang nghuot; nyang lyis yewus yah ngat zo goeus; Yosep lyis jyoengh ngat chingh zo goeus nyvng, ge.

³⁴Housoeh Yakop gas nyah dyi langchuiq, yanghthung dyi wuot las nyah lo gvng mas nyoshoq nyeih kuk nyeis.

³⁵Nyah loloeu lonyi jens gas nyang lyis nhaiqtaink das ge loh. Nghuot laus eq nyang gas nhaiqtaink dang ma mes gyo las, Ngos gas ngah lo xiklyis kuk zis yah shei lo das, ge. Housoeh nyah uwus gas nyah xiklyis kuk nyeis.

³⁶Midian jens gas Yosep lyis Egutu mau, Pharao dah hwankti kang zungh zau Potipha jyank mas unghzo.