Read Achang VPOM 39 Bible Online

VPOM 39 - Achang bible

VPOM 39

¹Gvshih Ishmael jens gas Yosep lyis Egutu mau pheh shwih e lha hwankti Pharao dah kang zungh zau, Egutu dius Potipha lhyi ungh dyei.

²YHENSAIN ka nyang yah dvgeh nghuot yvmvyah nyang gas yoh ung soeu bweh los. Housoeh nyang gas nyah yhensain Egutu dius yhen mha nyeis.

³YHENSAIN ka nyang yah dvgeh nghuot las nyang zwi loh muh dvnganh mas YHENSAIN yah ung nhang yvlyis nyah yhensain nyvng.

⁴Yosep eq nyah xikkhonh mas nyoqnho yoh zis yah nyah yhensain lhyi phuqsoe nyeis. Nyah yhensain eq yhen lhyi yoeuh nhang, nyah vyhang dvnganh Yosep lyis yoeuh nhang.

⁵Housoeh yhen gonh, vyhang dvnganh sain nhang shishenh masyah yhensain ka Yosep dah gvng mas hau Egutu dius mebih lyis shvmanh dyei: housoeh las yhen mha eq, yos mas eq, nyang yoh ya yoh yvmas YHENSAIN dah jyehjuh xauh yoeus.

⁶Nyang yoh ya yoh zis dvnganh gas Yosep lyis kyauh toh las, nyang gas nyang zo dah wom mas lai las gohtoeu nyang cha ma yoeuh lo noh. Yosep gas gungs khyank eq nyoqnho eq yungh.

⁷Hauh thang lyis nyah yhensain dah yhensain nyhiq gas Yosep lyis yoeuh ngwis las, Ngos yah yhet goh, ge.

⁸Yosep gas ma gyo. Nyang nyah yhensain dah yhensain nyhiq lyis taiq zis gas, Yoeuh aq, ngah yhensain ka nyang yoh ya yoh zis ngos lyis kyauh toh las haih yhen mha cha joq zis nyang ma yoeuh lo.

⁹Haih yhen mha ngah thoq lyis zes kuh zis hank ma nyeis; nvng mas lai las ngos lyis cha eq ma tomp toh; nvng gas nyah yhensain nyhiq dvnghuot: Ngos Mangso xikkhonh mas hau ma shop muh zains shuot las yaunos khasoeh yoh kuot das lah, ge.

¹⁰Hauh vmesbih Yosep lyis nyeih yau nyeih sang laus eq Yosep gas nyang yah yhet das zis eq, dvgeh nyeis das zis eq ma gyo dyei.

¹¹Dvnyeih gas Yosep yhen khau mha muh zwi das ge wvng loh uhlyis uhkung jens hank eq ma nyeis jus.

¹²Hauh uhlyis hauh vmesbih gas, Ngos yah yhet goh, ge nyah dyi masyah she loh: nghuot laus eq nyang gas nyah thoq dyi hauh vmesbih loq mas toh khoq las nghe pheh phang wuih thuq loh.

¹³Hauh vmesbih gas nyah loq mas dyi toh khoq las nghe pheh phang thuq loh zis nyvng lyis,

¹⁴nyang hauh yhen mha dah uhkung jens lyis lui las, Yoeuh aq, yang lyis ma phauh ma danh kuot nhang das ge, nyang Hebre dius dvyuk yhen mha shwih toh: Nyang ngos yah yhet das ge wvng los las ngos kaiq.

¹⁵Ngos yomkat las kaiq goeus ya, nyah thoq dyi toh khoq las nghe pheh phang thuq loh, ge taiq kyoh.

¹⁶Nyah yhensain phoq jweh los shoq hauh dyi nyah jyank mas toh.

¹⁷Nyah yhensain phoq jweh los lyis nyang gas, Nvng shwih kat toh dah Hebre jyeidwis ma phauh kuot das ge, ngah jyank mas wvng los.

¹⁸Ngos yomkat las kaiq goeus ya nyah thoq dyi ngah nvm mas toh khoq las phang thuq loh ge, vkhang vgus lhom taiq langh.

¹⁹Nah jyeidwis ngos lyis heisoeh kuot, ge taiq langh dah nyah yhensain nyhiq dang lyis xauhgyo lyis nyang svsoh nhaiqyo las,

²⁰Yosep lyis nyhik lho lha hwankti lhunk dah dius jens lungh thung mha kat toh. Housoeh las Yosep thung lungh nyeis.

²¹Nghuot laus eq YHENSAIN ka nyang yah dvgeh nyeis. Nyang lyis nhaiqnyen las thung nhaiqbos dah xikkhonh mas nyoqnho yoh nhang.

²²Housoeh las thung nhaiqbos gas lhunk toh bang dvnganhmoq lyis Yosep lyis yoeuh nhang lha, thung muh dvnganh nyang yoeuh.

²³YHENSAIN ka Yosep yah dvgeh nyeis las, nyang kuot muh dvnganh YHENSAIN yah bweh los nhang yvmvyah thung nhaiqbos gas nyang yah sen muh dvkoeuq eq ma doms yoeuh lo noh.