Read Achang VPOM 42 Bible Online

VPOM 42 - Achang bible

VPOM 42

¹Gvshih Egutu mau mas wom joq cho Yakop xauhgyo. Housoeh las Yakop gas nyah lo jens lyis, Namoq nyang changh nyang chamus yoeuh goh nyeis goh.

²Egutu mas wom joq ge zis ngos xauhgyo. Houmha gyoh loh las yah nyhenshang wis los geh; housoeh lyis yang ma shei dyuk, dwis nyeis das, ge.

³Housoeh Yosep vmang moq dvci yuk wom e wis das ge Egutu mau pheh e.

⁴Yakop gas Yosep vnoeuh Benyamin gudwvng das zis chiq yvmvyah nyang lyis gas vmang moq yah ma nhang kat.

⁵Hau phanghkhauq gas Khanan mau mas eq gyoh yvmvyah, Egutu mau mas wom wis das ge jweh e bang yah dvgeh Yakop lo jens jweh e.

⁶Gvshih Yosep gas mungh zau nghuot las, dius jens dvnganhmoq lyis wom ungh dyei dah zau nghuot. Housoeh Yosep vmang moq gas jweh e lha nyah xikkhonh mas nyeisjvng mas dupaiq gop joq.

⁷Yosep gas nyah vmang moq lyis nyvng lyis seq. Nghuot laus eq ma seq guons kuot las dang than yah, Namoq khalhye yah los goh lah, ge nyamoq lyis nyeis. Nyamoq gas, Wom wis das xiklyis Khanan mau masyah lyih, ge toeuh.

⁸Yosep gas nyah vmang moq lyis seq laus eq nyamoq gas nyang lyis ma seq.

⁹Yosep gas nyamoq dah cho yhetmoq moq yvlyis soh zoh lyis, Namoq gas ngamoq mau mas yomnhuk cho lhyi joh lyih yoeuh bang nghuot, ge sang.

¹⁰Nyamoq gas, Ma nghuot yhensain eh, nah jyeidwis jens wom wis das oen dvlyih.

¹¹Ngamoq dvnganh gas uwus dvyuk dah lo jens dvnghuot; ehnyet dan dah dius dvtsain nghuot; ngamoq joh yoeuh bang ma nghuot, ge toeuh.

¹²Nyang gas, Ma nghuot, ngamoq mau mas yomnhuk cho yoeuh das ge, tsain lyih, ge nyamoq lyis doms sang.

¹³Nghuot laus eq nyamoq gas, Nah jyeidwis jens Khanan mau mas uwus dvyuk dah lo jens, ngamoq vmang vnoeuh dvci aiq yuk nghuot. Lothank gas uwus yah dvgeh nyeis khoq, dvyuk gas ma nyeis lo, ge doms taiq.

¹⁴Yosep gas, Ngos taiq zis yah dvyhangteh namoq gas joh yoeuh bang nghuot.

¹⁵Ngos namoq lyis heisoeh shi yoeuh bah. Namoq dah vnoeuh lothank ma shwih lyih lyis gas, Pharao dwis nyeis zis yah dvyhangteh namoq hei mhayah yoh thuq loh das zis ma nghuot.

¹⁶Namoq dah dang jus ma jus shi yoeuh las yoh seq shoq namoq mas dvyuk lyis namoq dah vnoeuh loh shwih lyih nhang aq; nyet bang lyis gas thung mha kat toh das. Housoeh ma nghuot lyis gas Pharao dwis nyeis zis yah dvyhangteh namoq jyoengh joh yoeuh bang nghuot, ge than than taiq.

¹⁷Housoeh las nyamoq dvnganhmoq lyis somh nyeih thung lhunk toh.

¹⁸Somh vnyeih lyis Yosep gas nyamoq lyis khi lha, Ngos eq Mangso lhyi gyukwoms soeu nghuot, housoeh las namoq kang dwis das xiklyis heisoeh kuot geh.

¹⁹Namoq dan jyoeng nghuot lyis gas nah nyvbih mas dvyuk lhunk toh nhang lha, namoq nyet bang dvnganhmoq yhen mha bang yuot nyeis das las, wom yoeus wons loh geh.

²⁰Housoeh namoq vnoeuh lothank ngah jyank mas shwih lyih geh; housoeh lyis namoq dang jyoeng das, namoq eq ma shei das, ge. Nyamoq eq housoeh kuot.

²¹Nyamoq nyang changh nyang taiq goh zis gas Yang yah vnoeuh gvng mas tswiwus jyoengh bos nyeis: nyang yang lyis sang lhyi, nyah ehnyet chiqjyen yvlyis nyvng laus eq yang ma gyo dyei; housoeh yvmvyah gvshih haih cho yah jyank mas jweh los, ge.

²²Ruben gas, Ngos loshang lhyi yobos vkuot goh oen taiq goeus ma nghuot lhyeh? Namoq yuk ma tsain gyo; housoeh las nyang shei loh gvng mas yang soetuon zis xauh, ge nyamoq lyis toeuh.

²³Nyamoq taiq goh dang Yosep seqgyo zis gas nyamoq ma seq: khasoeh ge lyis Yosep gas nyamoq yah nyingh thaiq yah dvjis.

²⁴Yosep gas nyamoq jyank masyah thuq las ngaus nyeis. Nyamoq jyank mas doms los las nyamoq yah dye jis goh thang lhyi Simon lyis nyamoq masyah lang she lha nyang lyis nyamoq xikkhonh mas twih.

²⁵Yosep gas, nyamoq dah thung mha wom tyink las yuk khanghmuh dah ngwis nyang yuk nyang thung mha doms kat dyei aq, gyung cho zokho eq dyei aq, ge vmingh dyei las kuot goeus.

²⁶Housoeh nyamoq gas mauhlyihzoe yah wom tsain thuq las thuq khoq.

²⁷Thoenggus jweh las nyamoq mas dvyuk gas mauhlyihzoe zos tsoh das ge tu phank lyis, yoeuh aq, nyah thung khonh mas ngwis nyvng.

²⁸Housoeh las nyang gas nyah vmang vnoeuh moq lyis, Ngah ngwis doms kat toh dyei nyvng, thung mha bos, ge. Hauh uhlyis nyamoq nhaiq chuot las gyuk nvn zoh lyis, Hai Mangso yang lyis kuot zis cha nghuot au, ge nyang changh nyang taiq goh nyeis.

²⁹Nyamoq gas Khanan mau mas nyeis, nyamoq uwus Yakop jyank mas jweh los las, nyamoq xauh cho dvnganh nyang lyis tsain taiq kyoh zis gas,

³⁰Hauh mau mas mungh zau gas ngamoq lyis, hauh mau lyis lyih yoeuh dah joh yoeuh bang ge than than tsuk.

³¹Ngamoq gas, Ngamoq dan bang dvnghuot: joh yoeuh bang ma nghuot:

³²Uwus dvyuk dah lo jens, ngamoq dvci aiq yuk nghuot: dvyuk gas ma nyeis lo, lothank gas Khanan mau mas uwus yah dvgeh nyeis khoq, oen nyang lyis taiq goeus.

³³Tsai, hau mungh zau gas, Namoq dan dius nghuot ma nghuot ngos yoh seq das zis gas, Nah nyvbih mas dvyuk ngah jyank mas toh khoq geh: namoq yhen mha bang yuot nyeis yvmvyah wom yoeus las loh geh.

³⁴Namoq dah vnoeuh lothank lyis ngah jyank mas shwih lyih geh: housoeh lyis namoq gas joh yoeuh bang ma nghuot, ehnyet dan bang dvnghuot yvlyis ngos yoh seq das: namoq vmang vnoeuh lyis eq ngos doms kat kat dyei das las namoq haih mau mas soenghi yoh kuot das ge, ge taiq kyoh.

³⁵Hauh thang lhyi nyamoq dah womtu tsain phank lyis nyang yuk nyang toeu dah ngwis koek nyang yuk nyang toeu thung mha tsain bos. Hauh ngwis koek lyis nyamoq eq nyamoq uwus eq nyvng lyis tsain gyuk nvn.

³⁶Housoeh las nyamoq uwus Yakop nyamoq lyis taiq zis gas, Namoq ngah lo jens lyis dye lhuot loh goeus; Yosep ma nyeis lo, Simon eq dyuk loh goeus, gvshih Benyamin lyis eq tsain shwih loh mes. Haih cho dvnganh gas ngos yah tyi zis kyingh nghuot, ge.

³⁷Hauh uhlyis Ruben gas nyah uwus lyis, Ngos nyang lyis nah jyank mas ma shwih jweh los goeus ya ngah lo tang lhyi sat aq; nyang lyis ngos yah nhang kat aq, ngos nyang lyis nah jyank mas doms shwih los dyei das, ge.

³⁸Nyah uwus gas, Ngah lo gas namoq yah ma yoh loh; nyah vmang shei goeus, nyang kyingh dvnyet lo, namoq loh cho mha nyang dvja ja gudwvng lyis gas ngos manglo lyis kuk zis yah shei loh nhang zis dvnghuot lo, ge.