Read Achang VPOM 44 Bible Online

VPOM 44 - Achang bible

VPOM 44

¹Gvshih Yosep nyah ziszom lyis taiq zis gas, Haih bang dah thung mha wom nyamoq yoh thuq nyhoq tyink dyei aq; nyamoq nyang yuk nyang toeu ngwis lyis nyang yuk nyang dah thung khonh mas kat dyei aq.

²Hau ngah ngwis kom yahge nyah wom phauh ngwis eq hau vnoeuh lothank thung khonh mas kat dyei kat aq, ge. Ziszom eq Yosep taiq khyvlyis kuot.

³Nyoqnyvng yah dvyih hauh bang lyis nyamoq mauhlyihzoe yah tsain nhang kat.

⁴Nyamoq wus nghe mha dvyoh thuq loh shih lyis, Yosep gas nyah ziszom lyis, Hauh bang lyis lvnyap chank khat aq; duons lyis heisoeh oen aq: Namoq gas jyehjuh lyis ma gis zis yah chamus tsain phuk.

⁵Houka ngah yhensain shuk dah kom ma nghuot lhyeh. Jyoengh botthyet dah kom eq nghuot, ma nghuot lhyeh. Namoq gas ma gis zis yah dvtsain kuot oen aq, ge.

⁶Housoeh nyang chank duons lyis vgus taiq.

⁷Nyamoq gas, Yhensain eh, hau cha ge dah dang nghuot lah? Housoeh teh muh gas ngamoq khanhamp eq ma kuot.

⁸Yoeuh aq, xikpheh ngamoq thung khonh mas nyvng dah ngwis yangh Khanan mau masyah nah jyank mas doms chi lyih goeus. Housoeh dvnghuot zis, nah yhensain yhen mha dah ngwis xing ngamoq khasoeh khauh das.

⁹Ngamoq hank jyank mas hauh zis nyvng lyis hauh vyuk shei goeus jungh, ngamoq eq hauh yhensain dah jyeidwis duot das, ge nyang lyis taiq.

¹⁰Hauh soeu ka, Namoq dang yah dvyhangteh nghuot bas jungh, nghuot laus eq hank jyank mas bos lyis hauh soeu ka ngah jyeidwis, namoq nyet bang gas luiq das, ge.

¹¹Hauh uhlyis nyamoq vsainnyang dah tu lvnyap khyoq las, nyang yuk nyang toeu thung nyang yuk nyang toeu tsain phank yoeuh.

¹²Ziszom eq kuh mas zis ngis jweh shoq xo lha Benyamin dah thung mha hauh kom nyvng.

¹³Hauh uhlyis nyamoq gas nhaiqkuk las vsainnyang dah dyi lang chuiq zis yah nyang yuk nyang toeu mauhlyihzoe tu huon lha wus khau mha tauh loh.

¹⁴Gvshih Yuda yahge nyah vmang vnoeuh moq gas Yosep yhen mha doms jweh los. Yosep eq yhen mha nyeis shih las, nyamoq gas nyah xikkhonh mas nyeisjvng mas jweh shoq dupaiq gop joq.

¹⁵Yosep gas, Namoq cha kuot goh? Ngos soeh teh dius gas bot daq thyet yvlyis namoq ma seq goh lhyeh, ge nyamoq lyis lhom sang.

¹⁶Housoeh las Yuda gas, Nvng yhensain lhyi ngamoq cha yoh toeuh das. Ngamoq cha daq taiq lo das. Yobos khasoeh yoh khyuot lo das? Mangso ka ngamoq dah yobos yen las nyvng goeus: nyah loq mas kom bos soeu yahge ngamoq dvnganh gas nah jyeidwis nghuot goeus, ge.

¹⁷Yosep gas, Ngos housoeh khanhamp eq ma kuot; hauh kom hank jyank mas bos lyis hauh soeu kyingh ngah jyeidwis duot bas jungh; namoq gas namoq nyang uwus jyank mas nyenstap zis yah loh geh, ge.

¹⁸Nghuot laus eq Yuda Yosep jyank mas loh dung zis gas, Ngah yhensain eh, ngos lyis nah no mas dang dvkhonh jenh taiq nhang aq. Ngos lyis nhaiq vjenh yo, nvng gas Pharao teh nghuot.

¹⁹Nvng yhensain ngos lyis, Namoq uwus vyoh lo lah, vnoeuh vyoh lo lah, ge nyei las,

²⁰ngamoq eq, Uwus manglo yoh; nyang mang thang lhyi dah lo mhauhlo dvyuk eq nyeis; nyah vmang gas shei goeus, nyah ungwes mas zis nyang kyingh dvnyet lo las, nyah uwus gas nyang lyis jyet, oen nvng yhensain lhyi taiq kyoh goeus.

²¹Hauh uhlyis nvng eq, Hauh soeu lhyi ngos nyvng shoq ngah jyank mas shwih lyih geh, ge ngamoq lyis taiq lyis,

²²ngamoq gas, Hauh vnoeuh uwus yah ma yoh kangh; uwus yah gang lyis uwus shei das, oen nvng yhensain lhyi taiq kyoh laus eq,

²³nvng yuk, Namoq vnoeuh ma bos lyis namoq ngah nyoqnho lhyi thang pheh ma xauh nyvng das, ge ngamoq lyis taiq kat.

²⁴Housoeh ngamoq gas, ngamoq uwus jyank jweh lyis nvng yhensain dah dang vgus taiq kyoh.

²⁵Ngamoq uwus eq, Yah xiklyis wom dvtsiq e doms tsain wis los geh, ge sang.

²⁶Hauh uhlyis ngamoq gas, Ma yoh das; ngamoq vnoeuh bos lyis gas yoh e das, ngamoq vnoeuh ma bos lyis gas hauh soeu dah nyoqnho ma yoh nyvng das, oen tsain sang.

²⁷Housoeh las ngamoq uwus taiq zis gas, Ngah yhensain nyhiq ngos lyis yukgis lo aiq yuk kyingh dvkhoeu dyei zis gas namoq seq.

²⁸Dvyuk gas ngah jyank masyah thuq loh goeus, nyang lyis jyoengh nyang vchingh chingh ngat chingh tyamp goeus nyvng. Nyang loh masyah gvshih jweh shoq ngos nyang lyis ma nyvng lo.

²⁹Gvshih haih soeu lhyi eq, ngah jyank masyah shwih loh las, nyang dvja ja gudwvng lyis gas namoq ngos lokhoq lyis kuk zis yah shei nhang zis dvnghuot, ge.

³⁰Housoeh las ngah uwus jyank mas ngos jweh loh lyis hauh vnoeuh ma bos lyis gas, ngah uwus dah ehnyet hauh loshang lhyi twih yvmvyah,

³¹hauh loshang ma bos zis nyang nyvng lyis nyang shei das. Housoeh las ngah uwus manglo kuk zis yah shei nhang zis dvnghuot das.

³²Hauh thoq lyis ngos nah jyeidwis gas, ngos hauh vnoeuh lyis nvng uwus jyank mas ma doms shwih jweh los dyei lyis gas, ngos nah xikkhonh mas vcaiq caiq yobos yoh nyeis bas jungh, oen uwus jyank mas kham toh.

³³Housoeh yvmvyah, ngos yuk loshang gungsthaiq nah jyank mas jyeidwis duot bah: vnoeuh lyis gas vmang moq yah dvgeh loh nhang aq.

³⁴Ngah uwus mas jweh das dah ma gis zis ngos nyvng shoq hauh vnoeuh ngos yah ma bos lyis ngos ngah uwus jyank mas khasoeh yoh loh das lah, ge.