Read Achang VPOM 45 Bible Online

VPOM 45 - Achang bible

VPOM 45

¹Hauh uhlyis Yosep gas nyah jyank mas nyeis bang dah xikkhonh mas ma yoh zain lo yvmvyah, Dius dvnganhmoq thuq loh geh, ge kaiq. Yosep gas nyah vmang vnoeuh moq lyis nyang hank nghuot cho taiq kyoh uhlyis gohyuk hank eq ma nyeis.

²Yosep kaiq ngaus las Egutu dius eq xauhgyo, Pharao yhenbang eq Yosep ngaus cho xauhgyo.

³Yosep gas nyang nyah vmang vnoeuh moq lyis eq, Ngos Yosep nghuot; ngah uwus vdwis nyeis lo lah, ge. Vmang vnoeuh moq gas nyah xikkhonh mas mauh, gyuk yvmvyah dang ma yoh phuk.

⁴Yosep gas nyah vmang vnoeuh lyis, Ngah jyank mas ywi los geh, ge lyis, nyamoq eq nyah nvm mas ywi loh. Hauh uhlyis nyang gas, ngos gas namoq Egutu mau mas ungh kat, namoq vnoeuh Yosep nghuot.

⁵Nghuot laus eq namoq ngos lyis heimha ungh kat gvng mas ehnyet vnyo goh; namoq nyang gungs nyang lyis eq nhaiq vyo goh: khasoeh ge lyis dius kang kyoeu bas jungh ge Mangso ngos lyis namoq xik mas nhang kat.

⁶Haih mau mas phanghkhauq gyoh zis aiq zvn nghuot goeus: danh ma yoh phuk jyo ma xauh yhomh das zis oeng zvn chah shih.

⁷Nyeisjvng thoq mas namoq lyis nyet joq nhang das zis eq, khyuot yoeus cho zainsmuh yah namoq lyis kang dwis nhang das xiklyis Mangso ngos lyis namoq xik mas nhang kat.

⁸Housoeh las ngos lyis heimha namoq nhang kat zis ma nghuot; Mangso yah dvnhang kat. Gvshih ngos lyis Pharao dah uwus teh yhaugyen soeu duot das xiklyis eq, nyah hwankti yhen zom das zis yahge Egutu mau gonh lyis guon das zis taiq toh.

⁹Gvshih uwus jyank mas lvnyap doms loh geh; uwus lyis eq nah lo Yosep heisoeh ge, Mangso ka ngos lyis Egutu mau gonh dah yhensain kuot nhang, ngah jyank mas lyih geh, vsheq nyeis.

¹⁰Nvng Goshen mau mas lyih yoh nyeis das; nvng yahge nah lo jens nyei jens eq, nah yvng shvbeq, gaunyhauq kyunk dvnganh, nvng yoh ya yoh zis dvnganh yah dvgeh, ngos yah ni ni nyeis das.

¹¹Houmha ngos namoq lyis khoeu das. Housoeh ma nghuot lyis gas phanghkhauq oeng zvn bos shih yvmvyah, nvng uwus yahge nah yhenbang dvnganh shohjyen xauh das ge, oen lha taiq geh.

¹²Yoeuh aq, ngos namoq yah xauh jisgoh zis gas, namoq eq, ngah vnoeuh Benyamin nyang eq nyvng goeus.

¹³Egutu mau mas ngah nyoqnho ngelang yahge namoq nyvng ya nyvng zis uwus lyis loh taiq kyoh das: lvnyap loh las haih mau mas uwus shwih lyih geh, ge.

¹⁴Nyah vnoeuh Benyamin lyis po lha ngaus. Benyamin eq nyang lyis po lha ngaus.

¹⁵Nyang vmang vnoeuh dvnganhmoq lyis eq bvlot tanh las ngaus. Hauh thang lyis nyah vmang vnoeuh moq gas nyang yah jisgoh.

¹⁶Yosep dah vmang vnoeuh moq jweh lyih, ge dah loeus Pharao yhenbang xauhgyo lyis, Pharao yahge nyah jyeidwis jens gyo ngwis.

¹⁷Housoeh las Pharao gas Yosep lyis khi lha, Nah vmang vnoeuh moq lyis heisoeh oen lha choshet aq; Namoq dah tu huon lha Khanan mau pheh tauh loh geh.

¹⁸Namoq uwus yahge namoq yhenbang dvnganh shwih las ngah jyank mas lyih geh; Egutu mau mas gis thank maunyeis ngos namoq lyis dyei das las, namoq haih mau mas dah nyeis coeu xauh zo das.

¹⁹Gvshih ngos nvng lyis taiq toh zis yah dvyhangteh, heisoeh kuot geh: Namoq dah lo mebih moq xiklyis Egutu mau mas dah lhyingh yoeus loh las namoq uwus lyis shwih gyoh los geh.

²⁰Namoq dah yhenzis lyis vyu goh; Egutu mau gonh dah gis thank maunyeis gas namoq zis nghuot, ge.

²¹Taiq khyvlyis Yakop lo jens kuot las, Yosep gas Pharao vmingh yah dvyhangteh nyamoq lyis lhyingh eq zokho eq dyei kat.

²²Vmang vnoeuh dvnganhmoq lyis dyi saiq tsain dyei: Benyamin lyis gas ngwis kyvp somhxo yahge dyimis oeng thau puk dyei.

²³Nyah uwus jyank mas eq Egutu mau mas dah zisgis mauhlyihzoe ci tu, nyah uwus gyung cho xiklyis wom, ohlhyoq yahge zonoms mauhlyihzoe zains ci tu huon kat.

²⁴Namoq cho mha vdyoqgoh goh, ge tying uhjyangh nyamoq lyis pont kat las, nyah nyvbih thuq loh.

²⁵Nyamoq gas Egutu masyah thuq loh las Khanan mau, nyamoq uwus Yakop jyank mas jweh loh.

²⁶Nyamoq gas, Yosep kang dwis nyeis shih; Egutu mau gonh nyang guon nyeis, ge taiq goeus ya, Yakop nhaiq chuot las nyamoq taiq dang ma jingh dyei.

²⁷Nyamoq eq Yosep tying dang dvnganh taiq kyoh: Yakop eq nyang lyis shwih ji das lhyingh nyvng lyis doms huiq los.

²⁸Housoeh las Yakop gas, Nghuot goeus, ngah lo Yosep dwis nyeis shih, ngos ma shei shih lyis nyang yah e xauhgoh das, ge.