Read Achang VPOM 48 Bible Online

VPOM 48 - Achang bible

VPOM 48

¹Hauh zis tsain dye dah thang lhyi, Yosep lyis, Nah uwus nos, ge shet los. Housoeh las nyang gas nyah lotang Manase yahge Ephraim lhyi shwih las loh.

²Yakop lyis, Nah lo Yosep jweh los ge taiq kyoh. Housoeh las Israel gas yom yoeus las jung mas toq tsung.

³Yakop Yosep lyis taiq zis gas, Yomzains Mangso ka Khanan mau Luza wus mas ngos lyis thuq xoeuq, shvmanh dyei las taiq zis gas,

⁴Yoeuh aq, ngos nvng lyis jebais los nhang das: Ngos nvng masyah dius nyau nyoshoq kuot das. Thang pheh nah vnyau vshih haih mau lyis vcaiq caiq yoh sain nyeis das xiklyis ngos dyei das ge, ge.

⁵Ruben yahge Simon gas ngah zis nghuot teh, ngos Egutu mau, nah jyank mas ma jweh shih lyis nvng Egutu mas yoh dah loloeu tang Ephraim yah Manase ka ngah zis nghuot.

⁶Thang pheh nah gungs mas yaus lo jens gas nah zis nghuot las, nyamoq xauh yoeus das vso lhyi nyamoq vmang vzomh Manase yahge Ephraim dah nyings yah yoh tsain nyhink das.

⁷Ngos Padan mau masyah doms los uhlyis, Khanan mau Ephrat wus ma jweh shih, hauh cho mha Rakhel ka ngah nvm mas shei lha ngos nhaiqkuk zis yah nyang lyis Betlehem ge, Ephrat pheh loh choyvm mas nyhop, ge.

⁸Housoeh Yakop gas Yosep dah lotang lhyi nyvng las, Heika hank tsain nghuot, ge.

⁹Yosep gas nyah uwus lyis, Haih mau mas Mangso ngos lyis dyei, ngah lotang nghuot, ge. Yakop gas, Nyah zomh lyis ngah jyank mas los nhang aq, ngos nyah zomh lyis shvmanh dyei bah, ge.

¹⁰Gvshih Yakop gas mang las nyoq thop goeus. Nyah aiq yuk lyis nyah jyank mas ywi los nhang lha, nyah zomh lyis po lha tanh.

¹¹Israel gas Yosep lyis, Ngos nah nyoqnho xauh nyvng lo das oen lha ma nghamh, nghuot laus eq gvshih gas nah vnyau vshih jweh shoq ngos lyis Mangso chixoeuq, ge.

¹²Yosep gas nyah lotang lhyi nyah uwus dah phvlukchvp yvm masyah po yoeus lho lha nyah nyoqnho nyeisjvng mas jweh shoq gop joq.

¹³Tsai Yosep gas Ephraim lhyi nyah loqyos loq yah she lho lha Yakop dah loqwi nvm mas, Manase lhyi nyah loqwi loq yah she lha Yakop dah loqyos nvm mas tsain shwih toh.

¹⁴Yakop gas loxeih nghuot laus eq joeui yah nyah loq kaiq las nyah loqyos loq lyis vnoeuh yuk Ephraim dah uhloms mas kih dyei. Nyah loqwi loq gas Manase uhloms mas kih dyei.

¹⁵Housoeh Yosep lyis shvmanh dyei zis gas, Ngah vphauh Abraham yahge ngah uwus Isak lomsjingh dah Mangso, xikpheh yah khvnyhik jweh shoq ngos lyis gomh dah Mangso ge,

¹⁶shanghsenh cho khanghmuh masyah loeuswons soeu lhyi yah ngos lyis khyuot yoeus dah soeu ka, haih lotang lhyi shvmanh dyei bas jungh. Ngah nyings yah eq, ngah vphauh Abraham yahge ngah uwus Isak dah nyings yah eq nyah zomh lyis tsank nyhink bas jungh. Nyah zomh nyeisjvng thoq mas nyoshoq jebais los bas jungh, ge.

¹⁷Nyah uwus gas Ephraim uhloms mas nyah loqyos loq kih dyei yvlyis Yosep nyvng lyis nyang ehnyet ma tap las nyah uwus lyis,

¹⁸Uwus eh, housoeh ma nghuot, haq yuk loxeih dvnghuot, haq yuk uhloms mas loqyos loq dvkih aq, ge taiq uhjyangh nyah uwus dah loq lyis Ephraim dah uhloms masyah Manase uhloms mas cheh kih dyei das ge nyah uwus loq lyis zwi.

¹⁹Nyah uwus gas, Alo eh ngos seq, ge ma gyo. Manase eq dius dvnyau duot las kuhxing los das: nghuot laus eq nyah vnoeuh gas nyah thoq lyis zes kuhxing los das las, nyah vnyau vshih gas dius nyoshoq nyau bweh los das, ge.

²⁰Tsai nyang gas, Mangso ka nvng lyis Ephraim yahge Manase lhyi teh bweh nhang bas jungh, ge Israel jens nah gvng mas shvmanh dang taiq nyeis lo das, ge hauh nyeih lyis nyah zomh lyis shvmanh dyei. Housoeh Manase dah joqyos mas Ephraim lhyi toh.

²¹Yakop Yosep lyis taiq zis gas, Gvshih ngos shei bah ge, nghuot laus eq Mangso ka namoq yah dvgeh nyeis las namoq phauh thyeih moq nyeis mau mas namoq lyis doms shwih loh das.

²²Hauh thoq lyis nah vmang vnoeuh moq lyis dyei thoq lyis ngos nvng lyis jyeq dyei zis gas, ngah sham ngah lyei yah Amori dius jens jyank masyah yoh toh maunyeis nghuot, ge.