Read Achang VPOM 49 Bible Online

VPOM 49 - Achang bible

VPOM 49

¹Hauh thang lhyi Yakop nyah loloeu jens lyis khi tsainh toh las taiq zis gas, Heimha ywi huom geh, ngos namoq lyis thang pheh cha bweh los das cho tsain taiq bah, ge.

²Yakop loloeu jens eh, los huom lha gyo yoeus geh, Namoq uwus Yakop dah dang gyo yoeus geh.

³Ruben eh, nvng ngah loxeih nghuot, ngah phunk, ngah yom monh nyoqnho ngelang yahge yomzains soq zains nvng nghuot.

⁴Nvng gas guons dah jeis baus teh nghuot laus eq nvng ma yoh zes. Nvng nah uwus jung mas doq las hauh yvlyis vwot v-oeu kuot - nvng ngah jung mas doq nyvng.

⁵Simon yahge Lewi vmang vwik, nyah zomh dah moengsa ma gis ma shop jes tsain nghuot.

⁶Ngos nyah zomh gauh xam yvmas ma bos; nyah zomh huom mha ma wvng. Nyah zomh nhaiqyo zis yah dius sat goeus. Vsainnyang ehnyet chank las noeulu langhkhank-gyi thyet goeus.

⁷Nyah zomh nhaiqyo zis than, nyah zomh khonh changh yvmvyah ngah nhoengh khonh zangh bas jungh. Ngos nyah zomh lyis Yakop masyah kangh das, ngos nyah zomh lyis Israel masyah sanh tyamp das.

⁸Yuda eh, nah vmang vnoeuh moq nvng lyis chungh lo das. Nvng gas nvng lyis jes sont bang lyis ung das. Nah uwus lo jens nah xikkhonh mas gop das.

⁹Yuda gas khangkhyi lo teh nghuot: Ngah lo eh, nvng dyvm nyhik zo masyah doq los los kuot: Khangkhyi yahge khangkhyi zains teh whop las lhom nyeis: Nyang lyis hank womh zeh das lah.

¹⁰Nyenstap YHENSAIN jweh las dius nyau jens nyah dang gyo shoq Yuda jyank mas hwankti dunghkuq, nyah khyei jo mas guon dunghkuq ma gang loh das.

¹¹Nyang nyah mauhlyihzoe lyis nyah zvbiq zains mas, nyah mauhlyihzoe lo lyis gis thank zvbiq nwis mas twih las, nyah dyi zvbiq jeis mas, nyah dyimis zvbiq shih jeis nes mas cheih das.

¹²Nyah nyoqjeih zvbiq yah nes das, nyah zwis eq noeu nauh yah thyoeu das.

¹³Zebulun gas thomh yvm mas nyeis las sangpho goeukhanh duot das. Nyah maukyo Sidon nvm mas jweh shoq dvm das.

¹⁴Isakha ka nyangtu jo mas whop joq; yombos dah mauhlyihzoe nghuot.

¹⁵Nyang gas noyos gis dah maunyeis gis lyis nyvng. Nyang yvwons wons das ge kvtoq kham lha tungh zwi khank chah dah jyeidwis duot das.

¹⁶Dan gas, Israel mas dah dvnyau soeh teh nyah dius jens lyis soetuon das.

¹⁷Dan gas talhoeu mha lhangnyis, choyvm mas ywimuhtsanh teh duot las, nyang ji bang lyis dyetgyoh nhang das ge, nyang dah khyeichuk mas chweh das.

¹⁸YHENSAIN eh, ngos nah khyuot yoeus cho langh nyeis.

¹⁹Gad gas nyang lyis jesphung tsain lhaink nyhamh toh laus eq nyang nyamoq lyis yoh tauh zan das.

²⁰Nghamh dah zonoms gas Asher masyah thuq las, hwankti zo nghamh ja nyang dyei das.

²¹Napthali gas kat kat goeus cvtzains teh nghuot, Dang nauh chau.

²²Yosep gas vshih shih dah saiqko nghuot. Jeis thuq dwang nvm mas vshih shih dah vko nghuot. Ciank thoq mas mau toh.

²³Lyei baiq soeu nyang lyis hoeng lha nyang lyis toeuq baiq las tsain shoeuhshih.

²⁴Nghuot laus eq nyah lyei gas yombos las nyah loqyom tsain yangh zis gas, Yakop dah Yomzains Mangso dah loq yah eq, Yvng yoeuh soeu ge, Israel dah luk masyah eq, nvng lyis pangh nyeis nah uwus dah Mangso yahge,

²⁵maukhung mha dah shvmanh jyehjuh, nyeisjvng khau jeisnoq thomh mas dah shvmanh jyehjuh, dyei nauh yahge ung dah shvmanh jyehjuh gas nvng lyis shvmanh dyei das Yomzains masyah eq nghuot.

²⁶Nah phauh thyeih moq dyei dah shvmanh jyehjuh gas, vcaiq vto boms jens thoq lyis eq, vcaiq caiq joq jing cauh jens mas yoeuh o phoh vyhang thoq lyis eq zes. Hauh jyehjuh gas Yosep dah uhloms thoq mas, nyah vmang vnoeuh moq mas dah zau thoq mas joq lo das.

²⁷Benyamin gas lhuot zo dah cauhpau nghuot: Nvp lyis khat shoh zo, nyenh lyis yoh los lvnyhvp gvm das, ge taiq.

²⁸Hai dvnganh gas Israel vnyau dvci aiq nyau nghuot. Haih dang eq nyamoq dah uwus nyamoq lyis taiq las shvmanh dyei zis nghuot. Nyang yuk nyang toeu yoh vvng dah jyehjuh yah dvyhangteh nyamoq lyis shvmanh dyei.

²⁹Hauh thang lhyi nyang gas nyamoq lyis, ngos gas ngah vnyau huom nyeis yvmas loh lo das; housoeh las ngos lyis Hiti dius Ephron pa mha dah lukkhyung, ngah phauh thyeih moq yah dvgeh nyhop geh.

³⁰Khanan mau Mamre xik Makpela pa mha joq hauh lukkhyung lhyi Abraham, nyang sain toh das nyhenshang lop-yos lyis, hauh jangpa yah dvgeh Hiti dius Ephron jyank masyah wis toh.

³¹Houmha Abraham yahge nyah yhensain nyhiq Sara lyis nyhop. Isak yahge nyah yhensain nyhiq Rebeka lyis eq houmha nyhop. Ngos Lea lyis eq houmha nyhop.

³²Houka Hiti lo jens jyank masyah wis yoeus dah pa yahge houmha bos dah lukkhyung nghuot, ge tyeh taiq kyingh toh.

³³Yakop gas nyah loloeu jens lyis jyuk yang dye taiq goeus ya, nyah khyei jung mas she yoeus zis yah soq dom las nyah vnyau huom nyeis yvmas jweh loh.