Read Achang VPOM 50 Bible Online

VPOM 50 - Achang bible

VPOM 50

¹Housoeh las Yosep gas nyah uwus nyoqnho mas gop las ngaus zoh lyis bvlot tanh.

²Hauh thang lhyi Yosep gas nyah uwus lyis cheih xangh yah toh das xiklyis nyah jyeidwis mvcheih svra moq lyis vmingh dyei las hauh bang eq Yakop lyis cheih xangh tsain ba kat.

³Cheih xangh ba kat zis yah dvyhangteh, nyang lyis nyeici nyeih toh. Egutu bang eq Yakop gvng mas nyhetci nyeih top ngaus.

⁴Hau ngaus buisnyeis lai thang lhyi Yosep gas Pharao zau jens lyis khi lha taiq zis gas, Ngos namoq xikkhonh mas nyoqnho bos nghuot lyis gas, Pharao lyis heisoeh taiq dyei geh.

⁵Ngah uwus ngos lyis maukhi lha taiq toh zis gas, Ngos shei loh lo das. Khanan mau mas ngos ngah xiklyis kyungh toh dah lukkhyung mha ngos lyis nyhop aq, ge. Housoeh las ngos ngah uwus lyis loh yoh nyhop khoq das toeuh dyei aq, housoeh ngos doms los das ge, oen taiq dyei geh, ge.

⁶Pharao gas, Loh aq, nah uwus nvng lyis maukhi nhang toh zis yah dvyhangteh nyang lyis loh nyhop aq, ge.

⁷Housoeh las Yosep gas nyah uwus lyis loh nyhop das ge loh. Pharao zau jens dvnganh, nyah yhen mha dah kuh bang, Egutu mau mas uhshe bang dvnganh eq,

⁸Yosep yhenbang dvnganh, nyah vmang vnoeuh moq, nyah uwus yhenbang nyang yah dvgeh loh. Nyamoq gas loshang jens, yvng shvbeq gaunyhauq phung lhyi kyingh Goshen mau mas toh khoq.

⁹Lhyingh eq, nyang ji bang eq nyang yah dvgeh loh las houka svsoh nyo dah moqphung nghuot.

¹⁰Yodan lvng yvm Atad dah thanjang jweh lyis nyamoq houmha nyhet nyeih top nyah uwus xiklyis kukxi lha kuknyingh shohthang thauh zainsmuh yah tsain kuk ngaus.

¹¹Housoeh Atad dah thanjang mas tsain ngaus zis lyis Khanan bang nyvng lyis nyamoq gas, Hau ngaus zis gas Egutu jens mas svsoh kuh nyvng, ge. Housoeh las hauh joqyos lyis Abel Mizraim nyhink. Houka Yodan lvng yvm mas nghuot.

¹²Housoeh Yakop loloeu jens gas nyamoq uwus nyamoq lyis taiq tying toh zis yah dvyhangteh kuot.

¹³Nyah loloeu jens gas nyang lyis Khanan mau mas dvng loh las, Abraham nyah xiklyis lop-yos ge, Hiti dius Ephron jyank masyah pa eq cheq wis yoeus, Mamre xik Makpela pa mha dah lukkhyung mha nyang lyis nyhop.

¹⁴Nyamoq uwus dye ba nyhop thang lhyi Yosep gas nyah vmang vnoeuh moq yahge nyah uwus bos nyhop loh bang dvnganh yah dvgeh Egutu pheh tauh e.

¹⁵Gvshih nyamoq uwus shei thang lhyi Yosep vmang vnoeuh moq gas, Yosep yang lyis hoeng lha, nyang yang kuot dah ma gis cho dvnganh yang lyis lvto phuk mvbeh, ge tsain chiq.

¹⁶Housoeh las nyamoq gas Yosep jyank mas loeuswons dvyuk nhang lha taiq zis gas, Nah uwus ma shei shih lyis tying toh.

¹⁷Houka, Nah vmang vnoeuh moq nvng lyis ma gis cho tsain kuot shuot dah yobos khyuot dyei aq, oen dung geh, ge. Housoeh las nah uwus dah Mangso dah jyeidwis jens lyis yobos khyuot dyei aq, ge. Housoeh tsain taiq los las Yosep ngaus nyeis.

¹⁸Vmang vnoeuh moq eq wvng las nyah xikkhonh mas gop las, Yoeuh aq, ngamoq nah jyeidwis jens nghuot, ge.

¹⁹Yosep gas, Vchiq goh, ngos gas Mangso dah gungsthaiq nghuot lhyeh.

²⁰Namoq ngos lyis ma gis khyvlyis kuot laus eq, khvnyhik namoq nyvng zis yah dvyhangteh, dius nyoshoq kang dwis das xiklyis Mangso hauh yvlyis gis khyvlyis kuot.

²¹Housoeh las vgyuk goh; namoq yahge namoq lo jens lyis ngos nyhoeu nyeis das, ge nyamoq lyis nhaiqtaink las dang chau jis.

²²Yosep gas nyah uwus yhenbang yah Egutu mas tsain nyeis. Yosep gas dvxo dvci jweh shoq nyeis.

²³Ephraim dah lo, nyei, somh caiq jweh shoq Yosep nyvng khoq. Manase dah lo jens, Makir lo jens lyis eq Yosep xauh dyangh kat khoq.

²⁴Yosep gas nyah vmang vnoeuh moq lyis, Ngos shei lo das; Mangso ka namoq lyis jyoengh lyih komh yoeuh das las, haih mau masyah namoq lyis Abraham, Isak, Yakop moq lyis maukhi lha dyei toh mau mas shwih loh das, ge taiq toh.

²⁵Tsai nyang gas, Jyoengh namoq lyis Mangso lyih yoeuh uhlyis namoq ngah shohyau lyis hei mhayah yoh yoeus loh das, ge Israel jens lyis maukhi toh nhang.

²⁶Yosep dvxo dvci zvn lyis shei. Nyah mvng lyis cheih xangh kat las Egutu mas koncaih yah toh.