Read Achang VPOM 8 Bible Online

VPOM 8 - Achang bible

VPOM 8

¹Nghuot laus eq Mangso ka Noa yahge nyang yah dvgeh sangpho khau mha dah yewus yahge gaunyhauq dvnganh lyis soh las nyeisjvng thoq mas lyeis muot los nhang lha jeis kanh loh.

²Noq dah jeisthuq dwang lungh yahge maukhung Jeis Khomh eq tsain nyheih lyis mau wus zis eq nghan goeus.

³Jeis gas nyeisjvng thoq masyah dvtsiq dvtsiq yoms loh las, dvxo oengci nyeih lyis gas kanh goeus.

⁴Lhamhmuh nyhet vkhyvp, dvci nyhet vnyeih lyis sangpho ka Ararat boms mas loh no joq.

⁵Jeis eq lhamhmuh dvci vkhyvp jweh shoq mvno kanh loh las, hauh vkhyvp canh dvnyeih lyis boms thyoh tsain nyvng zoh loh.

⁶Hou mhayah nyeici nyeih thang lhyi Noa gas nyang kuot dah sangpho khomhbaiq lyis phank las,

⁷kvnhoq dvdoeu nhang kat lyis, houka nyeisjvng thoq mas jeis kanh shoq e los dang nyeis.

⁸Nyeisjvng mas jeis kanh ma kanh seq das xiklyis nyang gas khotjyauh dvdoeu lyis doms nhang kat.

⁹Nyeisjvng gonh jeis dwings joq shih las, khotjyauh gas nyah khyei nang das nogus ma nyvng yvmvyah Noa nyeis dah sangpho mha doms los. Noa eq nyah loq yhonh kat las khotjyauh lyis yoeus lho lha sangpho khau, nyah joqyos mas doms kat.

¹⁰Hou mhayah nyang nyhet nyeih jweh shoq langh thang lhyi, khotjyauh lyis sangpho mhayah doms nhang kat.

¹¹Hauh khotjyauh gas nyenhthang lhyi nyah nhuot mas tsanlun huq jen chweh dvng las Noa jyank mas doms los. Housoeh las nyeisjvng mas jeis kanh loh goeus zis nyang seq.

¹²Nghuot laus eq nyhet nyeih doms langh shih lho lha hauh khotjyauh lyis doms nhang kat lyis, hauh khotjyauh gas nyah jyank mas ma tauh los lo.

¹³Noa khyukxo das vzvn, cangxeih vkhyvp canh dvnyeih lyis nyeisjvng thoq mas jeis kanh goeus las Noa gas sangpho nghop phank las yoeuh lyis nyeisjvng kyuk loh nyeis yvlyis nyvng.

¹⁴Lhamhmuh nyhet vkhyvp aiqci nyhet vnyeih lyis nyeisjvng vlhomuh kyuk goeus.

¹⁵Hauh thang lhyi Mangso Noa lyis taiq zis gas,

¹⁶Nvng yahge nah yhensain nyhiq, nah lo jens yahge nah doeusmuh jens sangpho mhayah thuq loh geh.

¹⁷Nvng yahge soq bos las dwis ya dwis zis - nghoq, gaunyhauq, nyeisjvng thoq mas du shweh zis dvnganh gas nyeisjvng thoq mas nyamoq nyoshoq jebais los bas jungh, shwih thuq loh aq, ge.

¹⁸Housoeh las Noa yahge nyah lo jens, nyah yhensain nyhiq yahge nyah doeusmuh jens eq thuq loh.

¹⁹Nyeisjvng thoq mas dwis loh dah yewus, gaunyhauq, gaudu, nghoq dvnganh yah nyang ja nyang sangpho mhayah tsain thuq loh.

²⁰Noa gas YHENSAIN xiklyis phon ci lha, shangkyei dah gaunyhauq yahge shangkyei dah nghoq vja ja masyah tsain yoeus las hauh phon thoq mas lomhxangh lainh ngheq phudyei.

²¹YHENSAIN eq hauh xangh shom nam yoeus las YHENSAIN nyah ehnyet mas taiq zis gas, Dius gvng mas ngos nyeisjvng lyis khanhamp eq ma nhoengh lo das. Khasoeh ge lyis dius nhaiqlom gas loshang yoq lyis yah ma gis zis bos. Kang dwis zis dvnganh yvlyis ngos mhont khoq yhangteh thang pheh khanhamp eq ma kuot lo das.

²²Nyeisjvng joq dvchank, jyo khyoq yoq, jyo yhomh yoq, ngamh zis gywes zis, cungh zvn, nyeih nyenh khanhamp eq ma thank lo das, ge.