Read Achang VPOM 9 Bible Online

VPOM 9 - Achang bible

VPOM 9

¹Mangso ka Noa yahge nyah loloeu jens lyis shvmanh las taiq zis gas, Nyoshoq jebais los zis yah nyeisjvng lyis tyink geh.

²Nyeisjvng thoq mas gaunyhauq, dang dah nghoq dvnganh, thomh mas dah oengdoq dvnganh, nyeisjvng thoq mas soq bos las dwis zis gas namoq lyis gyukwoms das. Hauh zis lyis ngos namoq loq mas kyauh goeus.

³Soq bos las dwis loh ja dvnganh gas, namoq xiklyis zonoms nghuot bas jungh. Ngos namoq lyis anghnyaus phoqywi dyei teh, gvshih ngos dvnganh namoq lyis dyei.

⁴Nghuot laus eq suih bos shih dah shoh ma gis zo: khasoeh ge lyis kang ka suih mas bos.

⁵Dvyuk yuk nyah vmang vnoeuh kang thyet lyis, hau shei soeu dah suih cangjau lyis sat soeu jyank masyah top nyang sang das. Dius kang thyet dah yewus khanghmuh lyis eq hau suih cangjau doms sang das.

⁶Hank laus eq dius suih huot soeu ka, nyah suih lyis eq dius loq yah huot das: khasoeh ge lyis Mangso ka dius lyis nyah gungsdoeus lho yah dvyhangteh kuot toh.

⁷Namoq gas lo bos las je los geh. Nyeisjvng thoq mas nyoshoq jebais los geh, ge.

⁸Hauh thang lhyi Mangso ka Noa yahge nyah loloeu jens lyis taiq zis gas,

⁹Ngos gas, namoq yahge namoq dah vnyau vshih,

¹⁰namoq yah dvgeh dah, soq bos las dwis nyeis zis dvnganh, namoq yah dvgeh sangpho mhayah thuq los dah nghoq, gaunyhauq, gaudu dvnganh, nyeisjvng yewus dvnganh yah thanghchvp chap toh.

¹¹Ngos namoq yah toh dah thanghchvp gas, dvjeis lhyi zis yah kang bos ya bos zis lyis ma monh nhang lo, nyeisjvng lyis mhont das zis dvjeis ma doms lhyi nhang lo das, ge zis nghuot.

¹²Mangso taiq zis gas, Heika ngos yahge namoq, namoq yah dvgeh nyeis, dwis ya dwis zis dvnganh dah vjo mas toh dah thanghchvp vlho nghuot. Houka jweh los das namoq dah dius caiq dvnganh xiklyis nghuot.

¹³Ngos, ngah sainyvng yoqgan lyis jyommauh mas toh: houka Ngos yahge nyeisjvng dah vjo mas toh dah thanghchvp vlho duot das.

¹⁴Ngos nyeisjvng thoq mas jyommauh noengh nhang uhlyis jyommauh mas sainyvng yoqgan thuq los das.

¹⁵Hauh uhlyis ngos yahge namoq, kang bos gaunyhauq gaudu dvnganh dah vjo mas toh dah, ngah thanghchvp lyis ngos soh las, suihshoh dvnganh lyis mhont das zis dvjeis khanhamp eq ma doms lhyi lo das.

¹⁶Jyommauh mas sainyvng yoqgan thuq los khanghmuh ngos yoeuh las Mangso yahge nyeisjvng thoq mas kang bos las dwis zis dvnganh dah vjo mas dah vcaiq vto thanghchvp lyis ngos soh das, ge.

¹⁷Mangso Noa lyis taiq zis gas, Heika ngos yahge nyeisjvng thoq mas kang bos zis dvnganh dah vjo mas ngos toh dah thanghchvp vlho nghuot, ge.

¹⁸Sangpho mhayah thuq los, Noa dah loloeu jens gas, Shem, Ham, Yaphet nghuot. Ham ka Khanan dah uwus nghuot.

¹⁹Hauh bang somh yuk gas Noa lo jens nghuot las, nyamoq masyah nyeisjvng goms shoq jebais loh.

²⁰Noa gas yos zwi soeu nghuot las zvbiq dvkhyam lhyi cangxeih tsungh soeu nghuot.

²¹Zvbiq shuk yet las nyah zvng khau mha dyimis ma wuot lhain toh.

²²Khanan uwus Ham ka, nyah uwus shohchen nghuot yvlyis nyvng lyis, nghe mha nyeis, nyah vmang nhaiqtang lhyi taiq kyoh.

²³Shem yahge Yaphet gas shanhzoe kvtoq mas jweh shoq chi lha nungsjik jik loh las nyamoq uwus shohchen nghuot yvlyis tsain phomh dyei: nyah aiq yuk nungs phuk toh las nyamoq uwus dah shohchen lhyi ma nyvng.

²⁴Noa gas gying las soh los lyis nyah lothank nyang lyis cha kuot zis seq.

²⁵Housoeh las nyang taiq zis gas, Khanan gas nhoengh zis xauh bas jungh, vmang moq dah nyhen thank jyeidwis duot bas jungh.

²⁶Shem dah YHENSAIN Mangso ka ngelhoq bas jungh, Khanan gas Shem dah jyeidwis duot bas jungh.

²⁷YHENSAIN ka Yaphet dah mau lyis jelvm nhang lha Shem dah zvng mas nyeis bas jungh, Khanan gas Yaphet dah jyeidwis duot bas jungh, ge.

²⁸Noa gas dvjeis lhyi thang lhyi somhxo oengci zvn nyeis shih.

²⁹Nyah nyenhkyi dvnganh lyis gauxo oengci zvn nyeis khoq las shei.