Read Achang 2 SAMUEL 1 Bible Online

2 SAMUEL 1 - Achang bible

2 SAMUEL 1

¹Saulo shei thang lhyi Dawi gas Amalek jens lyis sat masyah tauh los las Ziklag mas aiq nyeih nyeis goeus.

²Somh vnyeih lyis dius dvyuk gas dyi langchuiq, nyah uhloms mas tsoh lhyauq las, Saulo dah dvp masyah los. Nyang Dawi jyank mas jweh las nyeisjvng mas dupaiq gop joq.

³Dawi nyang lyis nyei zis gas, Nvng khalhye yah los, ge. Nyang gas, Ngos Israel dvp masyah luiq los, ge.

⁴Dawi nyang lyis taiq zis gas, Bweh goeus cho lhyi ngos lyis taiq kyoh aq, ge. Nyang phuk taiq zis gas, Dius jens jeszan masyah phang, dius eq nyoshoq gyoh goeus: Saulo yahge Yonathan eq shei goeus, ge.

⁵Dawi gas nyang lyis loeus los kyoh dah loyvm phoq lyis nyei zis gas, Saulo yahge nyah lo Yonathan shei goeus cho nvng khasoeh seq, ge.

⁶Nyang lyis los taiq kyoh dah loyvm phoq taiq zis gas, Ngos Gilboa boms mas zangh jweh loh lyis , Saulo ka nyah lham mha nges toh, jes lhyingh yahge nyang ji bang gas nyang lyis gyen gyen chank khat los.

⁷Nyang nungs pheh lhain yoeuh las ngos lyis nyvng lyis nyang ngos lyis lui. Ngos eq, Ngos heimha nyeis oen toeuh goeus.

⁸Nyang ngos lyis taiq zis gas, Nvng hank nghuot, ge. Ngos nyang lyis phuk taiq zis gas, Ngos Amalek dius nghuot, oen.

⁹Nyang ngos lyis doms taiq zis gas, Ngos lyis los jenh sat aq, ngah kang ma dyet shih las shanghsenh nyeis, ge.

¹⁰Lains thang lhyi ka kang ma yoh dwis lo yvlyis ngos seq yvmvyah ngos nyang lyis loh sat. Nyah uhloms mas dah buismuk yahge nyah loqyom mas dah thoengh phaiq las nvng yhensain jyank chi los, ge.

¹¹Housoeh Dawi gas kuk las nyah dyi dvp langchuiq, nyah dius jens dvnganh eq housoeh kuot.

¹²Saulo yahge nyah lo Yonathan eq, YHENSAIN dah dius jens eq, Israel jens jeszan yvmas sat zis xauh yvmvyah nyamoq gas nyenhthang jweh shoq kuk, ngaus las wom eq tsain kyi.

¹³Dawi gas hau loeus los kyoh soeu lhyi, Nvng khalhye yah los, ge. Nyang eq, Ngos gas nah mau mas nyeis dah Amalek dius nghuot, ge.

¹⁴Dawi nyang lyis taiq zis gas, YHENSAIN dah coeu juot zis xauh soeu lhyi sat das zis ma gyuk, nvng khasoeh nyang lyis womh sat lah, ge.

¹⁵Dawi loyvm dvyuk lyis khi lha taiq zis gas, Haih soeu lhyi loh shung tyamp aq, ge. Hauh loyvm phoq nyah sham yah nyang lyis loh thauh sat.

¹⁶Dawi nyang lyis taiq zis gas, Nah suih gas nah uhloms thoq mas joq bas jungh: khasoeh ge lyis YHENSAIN dah coeu juot zis xauh soeu lhyi ngos sat ge nah nhuot masyah kanghjyoeng kat goeus, ge.

¹⁷Dawi gas haih kukxi lvkhyank yah, Saulo yahge nyah lo Yonathan xiklyis kukxi.

¹⁸Thang pheh nyang haih zis lyis Yuda jens dvnganh lyis jyauh das xiklyis taiq toh. Hauh zis lyis Lyei lvkhyank ge lui las Yasha maussauh mas lhaih toh.

¹⁹Jing thoq mas, yah uhshe phvtang shei joq! Jes thoeuqzoe jens gyoh tyamp goeus!

²⁰Philisti lonyi jens ma yoh gausyis bas jungh, hauh loeus Gat wus mas vtaiq, vthyoh ma tyomh dah lonyi jens ma yoh gauslaus bas jungh, hauh loeus Ashkelon talhoeu mas vhoeuh.

²¹Gilboa boms jens eh, namoq thoq mas jyweh ma gyoh bas jungh, mau eq ma wus goeus jungh, houmha cha eq ma yuk bas jungh: khasoeh ge lyis houmha thoeuqzoe dah gos ma lhoq lo; Saulo dah gos gas khanhamp eq coeu yah buot zis ma xauh lo.

²²Saulo yahge Yonathan aiq yuk gonh nyah phvtang dah yombos thank jeswus jens lyis sat. Nyah phvtang ka jeszan masyah loq kom ma tauh los.

²³Saulo yahge Yonathan ka dwis nyeis lyis jyetdap, xamxonh, shei loh lyis eq ma gang. Nyah phvtang ka zonsmuh thoq lyis nyap, khangkhyi thoq lyis yombos.

²⁴Israel lonyi jens eh, Saulo xiklyis ngaus geh. Nyang namoq lyis nes dah misseh yah huot las namoq lyis xing yah shauq dyei goeus.

²⁵Jeszan yvmas thoeuqzoe jens gyoh goeus nyvng. Yonathan eh, jing nyhang mha nvng sat zis xauh goeus.

²⁶Ngah vmang Yonathan eh, ngos nah gvng mas nhaiqngis nyoqyaus, nvng gas ngah kangtwih nghuot. Nvng ngos lyis jyet cho ka mauhphoh nghuot; vmesbih jens dah jyetdap cho thoq lyis zes gis.

²⁷Thoeuqzoe jens gyoh tyamp goeus. Nyamoq dah jeszan kyonhkhyi dyoqbis goeus.