Read Achang 2 SAMUEL 11 Bible Online

2 SAMUEL 11 - Achang bible

2 SAMUEL 11

¹Zvn lai las hwankti jeszan nyos jweh los. Dawi gas Yoab yahge nyah jyeidwis jens, Israel dvnganh lyis nhang kat. Nyamoq gas Amon jens lyis mhont las Raba wus lyis lhaink toh. Dawi gas Yerusalem mas nyeis khoq.

²Dvnyenh thang ka Dawi nyah yhetyos masyah toq los las hwankti yhenkhung [17] thoq mha suh nyeis. Hou mhayah yungh dah vmesbih dvyuk gungs cheih nyeis yvlyis nyvng.

³Housoeh las Dawi gas hauh vmesbih cho nyei gyo nhang. Dvyuk taiq zis gas, Eliam dah lonyi, Hiti dius Uria dah yhensain nyhiq Batsheba nghuot, ge.

⁴Hauh thang lhyi Dawi gas loeuskyoh bang lyis yah nyang lyis shwih nhang. Nyang hwankti yhen mha jweh los lyis Dawi gas nyang yah yhet goh. (Batsheba gas mesmus thang lyis cheihshang lyi thungh dye kuot zis ma nyangh shih.) Hauh thang lhyi Batsheba yhen pheh tauh loh.

⁵Ma nyangh lyis Batsheba nyang loshang gungs lyis chi los zis seq lyis Dawi lyis loeus kyoh kat.

⁶Hauh thang lhyi Dawi Yoab jyank kyoh kat zis gas, Hiti dius Uria lyis ngah jyank mas nhang kat aq, ge. Yoab eq Uria lyis Dawi jyank mas nhang kat.

⁷Uria jweh los lyis Dawi nyei zis gas, Yoab khasoeh nghuot? Dius jens khasoeh nghuot? Jes khasoeh ung goeus lah, ge.

⁸Dawi Uria lyis taiq zis gas, Nah yhen pheh loh las no yoeus aq, ge. Uria gas hwankti yhen mhayah thuq khoq. Hwankti ka nyang lyis jyungshuk chank huon kat.

⁹Nghuot laus eq, Uria gas nyah yhen pheh ma loh. Hauh nyenhyo nyang hwankti dah gohtoeu jyeidwis jens dvyhamh yah hwankti yhen khomh mas nyeis.

¹⁰Uria gas nyah yhen pheh ma loh, ge nyamoq Dawi lyis tsain taiq kyoh lyis Dawi Uria lyis taiq zis gas, Nvng gyung cho mhayah los ma nghuot lhyeh? Vmvn, nvng nah yhen pheh chamus ma loh, ge.

¹¹Uria Dawi lyis taiq zis gas, Israel jens, Yuda jens jeszan khyomp mas jweh nyeis. Kwi eq nyamoq yah dvgeh nghuot, ngah yhensain Yoab yahge nyah zau jens gas pa mha dvtsain thoeng nyeis. Ngos gas ngah yhen mha loh las zo shuk, ngah yhensain nyhiq yah yhet das lah? Ngos housoeh teh dah ma jus cho khanhamp eq ma kuot das oen maukhi, ge.

¹²Dawi gas Uria lyis, Khvnyhik heimha nyeis shih aq, phvnaq nyeihyo ngos nvng lyis loh nhang das, ge. Housoeh las nyang gas hauh nyeih yo eq nungs nyeih eq Yerusalem mas nyeis.

¹³Housoeh Dawi gas nyang lyis nyenhcon khi tsoh las yet shoq gvmshuk. Nghuot laus eq nyang gas Uria lyis nyah yhen pheh nyah yhensain nyhiq jyank ma yoh nhang kat. Uria gas hwankti yhen khomh mas dvdoms yhet.

¹⁴Nungsnvp lyis Dawi gas Yoab lyis maussauh lhaih las hauh zis Uria loq lyis yah huon.

¹⁵Nyang lhaih zis gas, Jeszan xungh dah yvpheh Uria lyis toh aq, nyang houmha zangh las shei bas jungh, jesphung lhyi nungsjik yoeus aq, ge.

¹⁶Yoab eq taiq vgus kuot las wus lhaink yvmas yoeuh las jeszan xungh yvmas Uria lyis nhang.

¹⁷Housoeh wus mas bang thuq los las Yoab lyis zan. Israel jeslo jens dvyhamh gyoh; Hiti dius Uria eq shei.

¹⁸Hauh thang lhyi Yoab gas hau moengzan cho yah sen zis dvnganh Dawi lyis taiq kat.

¹⁹Nyang loeuskyoh soeu lhyi taiq kyoh zis gas, Moengzan cho dvnganh hwankti lhyi taiq kyoh aq.

²⁰Nghuot laus eq hwankti nhaiqlom dyis las, Jeslo jens jeszan uhlyis chamus wus yah ni los? Wusciank masyah baiq das yvlyis nyamoq ma seq lhyeh?

²¹Yerubeshet lo Abimelek lyis hank sat? Vmesbih dvyuk wusciank mas mhoq dvshan khyoq kat las nyang Thebez mas shei ma nghuot lhyeh, ge nyei das. Hauh uhlyis, Nah jyeidwis Hiti dius Uria eq shei goeus, oen aq, ge.

²²Housoeh loeuskyoh soeu Yerusalem pheh loh las Dawi lyis loeus dyinghjet shoq taiq kyoh.

²³Loeuskyoh soeu Dawi lyis taiq zis gas, Jyoengh nyang jes jens gas ngamoq lyis ung lha pa mha jweh shoq khat zan los. Ngamoq eq wus khomh jweh shoq yoh tauh zan.

²⁴Lyei baiq bang wusciank masyah nah jyeidwis jens lyis baiq las Hiti dius Uria eq cheq ngamoq dah dius dvyhamh sat zis xauh goeus, ge.

²⁵Dawi loeuskyoh soeu lhyi taiq zis gas, Nvng Yoab lyis heisoeh taiq aq: Haih gvng mas ehnyet vnyo, moengsa ka dvyuk dvlhain seq nyhau. Yom yoeus las wus lyis xungh shoq zan zis yah thyoq thyi tyamp geh. Heisoeh taiq las Yoab lyis yomdyei aq, ge.

²⁶Batsheba gas nyah yhensain phoq shei cho xauhgyo lyis nyang nyah xiklyis kukxi.

²⁷Kukxi shishenh lai thang lhyi Dawi gas nyang lyis hwankti yhen mas shwih los nhang. Housoeh nyang gas nyah yhensain nyhiq jens mas dvyuk bweh los. Ma nyangh lyis nyang yukgislo dvyuk khoeu los. Nghuot laus eq YHENSAIN ka Dawi kuot cho lhyi nhaiq dvtsiq eq ma doeus.