Read Achang 2 SAMUEL 13 Bible Online

2 SAMUEL 13 - Achang bible

2 SAMUEL 13

¹Gvshih Dawi lo Absalom gas Tamar ge nhamhmuh yungh dvyuk yoh. Goh nyi khomh mas dah Dawi lo Amnon gas nyang lyis svsoh ngwis.

²Amnon gas nyah nhamhmuh Tamar lyis nyo nghamhzains toh las nos los: khasoeh ge lyis Tamar gas lonyi gyingh nghuot las Amnon nyah jyetdap cho lhyi yangh nyang lyis ma yoh chixoeuq mus las gis bweh das teh ma nghuot.

³Gvshih Amnon mas Yonadab ge dah dyenschangh dvyuk bos. Nyang gas Dawi dah vmang Shimea dah lo nghuot. Yonadab gas svsoh yik.

⁴Dvnyeih Yonadab ka Amnon lyis, Yau cho cha nghuot lah? Nvng hwankti dah lo nghuot toh las dvnyeih dvnyeih chamus nyhauh loh, ge. Amnon nyang lyis taiq kyoh zis gas, Ngos ngah vnoeuh Absalom dah nhamhmuh Tamar lyis ngwis, ge.

⁵Yonadab taiq zis gas, Gis goeus, Nvng cha kuot das zis ngos taiq bah. Nah yhetyos mas nos guons kuot lhain toh aq. Nah uwus nvng lyis los yoeuh lyis, Tamar lhyi los nhang lha nah xiklyis wom ba tsoh nhang aq oen nyang lyis sang aq. Tamar nvng lyis los ba tsoh lyis nvng zes gis los das oen nyang lyis taiq kyoh aq, ge.

⁶Housoeh Amnon gas nos guons kuot lhain toh. Hwankti nyang lyis los komh lyis Amnon hwankti lhyi taiq zis gas, Ngos lyis dyangh las ngah xiklyis zonoms dvja ja ba dyei das xiklyis Tamar lhyi jenh nhang kat aq, ge.

⁷Housoeh Dawi bauh las zonoms dvja ja ba das xiklyis Amnon yhen mha Tamar lyis nhang kat.

⁸Tamar gas Amnon yhen mha jweh loh lyis, nyang ohlhyoq nis zis Amnon yoh yoeuh das xiklyis Amnon lhain toh dah yap pheh wvng loh. Housoeh nyang nyah xiklyis senhtyau ohlhyoq piq dyei.

⁹Nghuot laus eq, nyang ohlhyoq bvn nyah xikkhonh mas toh dyei lyis nyang ma zo. Amnon nyah jyeidwis jens lyis sang zis gas, Yuk khanghmuh thuq loh geh, ge. Housoeh las nyamoq thuq loh.

¹⁰Hauh uhlyis Amnon ka Tamar lyis, Gvshih hauh zonoms lyis ngah yhetyvp mas dvng los las ngos lyis houmha los tsoh aq, ge. Housoeh las Tamar gas hauh zis nyah jyank dvng loh.

¹¹Nghuot laus eq nyang Amnon lyis gvmtsoh nyeis lyis, Amnon nyang lyis dvp she lha, Ngah jyetdap nhamhmuh eh, ngos yah los yhet aq, ge.

¹²Nyang taiq zis gas, Vkuot vmang eh, ngos lyis dius ngis vkhyoq. Ngos lyis heisoeh vkuot. Israel mas heisoeh teh ma jus, lyi ma chi cho ma gis kuot zis nvng seq.

¹³Housoeh kuot lyis ngos khasoeh yoh thoq xoq das. Nvng eq Israel mas koh thank soeu dvyuk bweh das. Housoeh las hwankti jyank mas dung aq, ma dyei gas ma nyeis das, ge.

¹⁴Nghuot laus eq nyang nyah dang ma gyo dyei. Nyang nyah thoq lyis yombos las nyang Tamar lyis dap yoeus las shwih yhet tyamp.

¹⁵Hauh thang lhyi Amnon gas Tamar lyis dvlhain dvm svsoh hoeng tyamp las, vkhang ngwis thoq lyis gvshih zes hoeng tyamp. Amnon gas nyang lyis, Toq las loh aq, ge nhant.

¹⁶Tamar gas nyang lyis, Ngos loh chank ma bos. Ngos lyis kuot thoq lyis gvshih khat thuq zis gas zes chah, ge. Nghuot laus eq nyang ma gyo dyei.

¹⁷Nyang nyah jyeidwis dvyuk lyis kaiq taiq kat zis gas, Haih vmesbih lyis ngah jyank masyah duon thuq las khomh kyank toh aq, ge.

¹⁸Housoeh jyeidwis gas nyang lyis duon thuq. Tamar gas hauh caiq dah thungh yah dvyhangteh hwankti lonyi gyingh jens gyangh wuot, xing lha yungh dah dyixing wuot chi.

¹⁹Nghuot laus eq gvshih Tamar gas nyah dyixing langchuiq, uhloms mas nyiyvp lhyauq. Housoeh nyah nyoq mas nyah loq nghop zis yah nyang ngaus las loh lo.

²⁰Nyah mungs Absalom nyang lyis nyvng las nyei zis gas, Nah mungs Amnon nvng yah dvgeh nyeis goeus lhyeh? Nghuot laus eq ngah nhamhmuh eh, samlo nyeis aq. Nyang gas nah mungs nghuot; haih cho lhyi cha vnghamh, ge. Housoeh las Tamar gas nyah mungs Absalom yhen mha nhaiqkuk nhaiqngis samlo nyeis.

²¹Hai bweh cho dvnganh hwankti Dawi xauhgyo lyis nyang svsoh nhaiqyo.

²²Absalom gas nyah vmang Amnon lyis hauh cho khanhamp eq ma taiq: nghuot laus eq nyang Amnon lyis svsoh hoeng: khasoeh ge lyis Amnon gas nyah nhamhmuh Tamar lyis dius ngis khyoq.

²³Aiq zvn dyingh thang lhyi Ephraim nvm Bala-hazor mas Absalom dah jyeidwis jens yvng mauh gom nyeis lyis Absalom ka hwankti lo jens dvnganh lyis pwe mha khi.

²⁴Absalom hwankti jyank mas loh taiq zis gas, Ngah jyeidwis jens gas gvshih yvng mauh gom nyeis. Nvng hwankti yahge nah jyeidwis jens gas ngos yah dvgeh houmha pwe loh kuot goh, ge.

²⁵Nghuot laus eq hwankti Absalom lyis taiq zis gas, Ma nghuot, ngah lo eh, nah yvwons ma lyei bas jungh, ngamoq dvnganh lyis vloh nhang ge las, Absalom tungh sang laus eq nyang ma loh loh, nyang lyis shvmanh dyei kat.

²⁶Absalom taiq zis gas, Ma nghuot lyis eq ngah vmang Amnon ngamoq yah loh nhang aq, ge. Hwankti nyang lyis taiq zis gas, Nyang chamus nvng yah loh das, ge.

²⁷Nghuot laus eq Absalom tungh sang lha, hwankti ka Amnon yahge hwankti lo jens dvnganh nyang yah loh nhang.

²⁸Absalom nyah jyeidwis jens lyis taiq zis gas, Amnon shuk yet shoq langh geh. Ngos namoq lyis, Amnon lyis hwe geh oen vlho dyei lyis, nyang lyis sat geh. Vgyuk goh, ngos namoq lyis taiq toh. Yomhuont las womh womh kuot geh, ge.

²⁹Absalom taiq toh zis yah dvyhangteh Absalom dah jyeidwis jens gas Amnon dah kang khyoq. Housoeh hwankti lo jens dvnganh gas toq las hank eq hank nyang luzoe thoq mas dyvm tsung lha phang.

³⁰Nyamoq Yerusalem loh cholvt mas loh nyeis lyis hauh loeus Dawi jyank mas taiq los zis gas, Absalom gas hwankti lo jens dvnganh lyis dvyuk eq ma nyet lo shoq sat goeus, ge.

³¹Housoeh las hwankti ka nyah dyi toq langchuiq tyamp las tsoh mas lhain toh, nyah joeui dyei bang dvnganh eq phauh nyang zis yahge nhaiqkuk zis yah nyamoq dah dyi langchuiq.

³²Dawi dah vmang Shimea lo Yonadab taiq zis gas, Nah lo jens dvnganh lyis ma sat. Amnon dvyuk dvshei. Absalom gas nyah nhamhmuh Tamar lyis Amnon dius ngis khyoq nyeih masyah haih cho nghamh thyet goeus.

³³Housoeh las gvshih ngah yhensain hwankti lo jens dvnganh shei goeus oen nhaiq ma tap vmus. Amnon kyingh dvshei, ge.

³⁴Hauh uhlyis Absalom gas phang loh. Hauh uhlyis zungh dah loyvm lo Yerusalem wusciank thoq masyah tyoeuq kat lyis, buiswvng pheh yah wus pheh dius dvphung los nyeis. Nyang hwankti lhyi loh wuih taiq zis gas, Horonaim cho[18] jing chank yah dius dvphung los nyeis zis ngos nyvng, ge.

³⁵Yonadab hwankti lhyi taiq zis gas, Yoeuh aq, hwankti lo jens los nyeis. Ngos taiq zis yah dvyhangteh jus, ge.

³⁶Nyang housoeh dye taiq yah dvyih hwankti lo jens jweh los las nyamoq kaiq ngaus. Hwankti yahge nyah zau jens dvnganh eq svsoh ngaus.

³⁷Dawi gas nyeih yau nyeih nyah lo xiklyis kukxi nyeis. Absalom gas nyah vphauh Geshu hwankti Amihud lo Tamai jyank mas phang loh.

³⁸Absalom gas Geshu mas phang loh las somh zvn nyeis.

³⁹Hwankti Dawi gas Absalom jyank mas loh mes nyeis. Khasoeh ge lyis Amnon gas shei goeus yvmvyah nyang yah sen yvmas nhaiq yoh taink goeus.