Read Achang 2 SAMUEL 16 Bible Online

2 SAMUEL 16 - Achang bible

2 SAMUEL 16

¹Dawi gas boms thyoh dvtsiq lai loh lyis Mephiboshet dah jyeidwis Ziba gas mauhlyihzoe aiq tu mha ohlhyoq aiqxo, zvbiq kyuk dvxo dyoms, maiphang shih dvxo dyoms yahge zvbiq shohyeis thung dvthung wons las nyang yah los xauhgoh.

²Hwankti Ziba lyis nyei zis gas, Haih zis gas cha xiklyis lah, ge. Ziba gas, Mauhlyihzoe aiq doeu gas nah dius jens ji das zis, ohlhyoq yahge maiphang shih gas loyvm jens zo das zis, zvbiq eq mhanhdyvp mas nyungdaus bang shuk das xiklyis nghuot, ge toeuh.

³Hwankti nyang lyis nyei zis gas, Mephiboshet khamha nyeis, ge. Ziba toeuh zis gas, Yerusalem mas nyeis. Nyang taiq zis gas, Khvnyhik ngos ngah vphauh Saulo dah hwankti munghdan doms yoh das ge, ge.

⁴Hwankti Ziba lyis taiq zis gas, Hauh gvng mas, Ngos Mephiboshet yah sen zis dvnganh nvng lyis dyei, ge. Ziba gas, Nhaiqshoqlang yhensain eh, ngos gas nvng kuot nhang mes zis cha nghuot laus eq vjangh yah kuot das, ge.

⁵Dawi yahge nyah dius jens Bahurim mas lai loh lyis vbusbih dvyuk nyamoq lyis nhoengh thuq los. Nyang gas Saulo yhenbang, Gera dah lo Shimei nghuot.

⁶Nyang gas hwankti, hwankti dah zau jens yahge nyamoq lyis lhaink toh dah yomzains thoeuqzoe jens dvnganh lyis lukzains yah doeuh.

⁷Nyang Dawi lyis kaiq zis gas, Nvng dius sat soeu, nvng ma gis soeu, hei mhayah thuq loh aq.

⁸Saulo yahge nyah yhenbang lyis sat dah yobos dvnganh lyis YHENSAIN ka nah uhloms thoq mas jweh nhang nyeis goeus. Nvng Saulo dah hwankti tank khauh, gvshih YHENSAIN ka hauh zis lyis nah lo Absalom lyis dyei goeus. Nvng dius sat soeu, thang thank lyis nvng kuot khyvlyis nvnyang doms xauh kham zo das, ge.

⁹Zeruia dah lo Abishai sang zis gas, Haih khuih shei ngah yhensain hwankti lhyi chamus nhoengh das lah? Ngos nyah uhloms loh jenh thyet tyamp bah, ge.

¹⁰Hwankti taiq zis gas, Zeruia dah lo tang eh, haih cho ka nah zomh yah ma sen? YHENSAIN ka ngos lyis nhoengh das xiklyis nyang lyis taiq toh lyis gas, ngos hank nghuot las nyang lyis tomp das lah, ge.

¹¹Tsai, Dawi Abishai yahge nyah zau dvyhamh lyis taiq zis gas, Ngah gungs mas yaus dah ngah lo gyingh yangh ngah kang lhyi xo yvlyis yoeuh aq. Hau Benyamin vkoq gas hauh thoq lyis yoh kuot. Nghuot goeus jungh, nyang nhoengh goeus jungh, YHENSAIN nyang lyis taiq toh.

¹²YHENSAIN ka ngah nhaiqngis nyoqyaus cho[24] lhyi yoeuh las khvnyhik nyang nhoengh gvng mas ngos lyis gis cho dyei mvbeh, ge.

¹³Dawi gas nyah dius jens yah loh nyeis lyis, Shimei gas Dawi yah twi twi dvyuk dvjing loh las nhoengh zis yah Dawi lyis luk yah doeuh, tsohmop eq lhank.

¹⁴Hwankti yahge nyah thang chank dah dius dvnganh gas nyungdaus las nyamoq Yodan lvng[25] mas jweh lyis daus tsain no nyeis.

¹⁵Hauh gyo lyis Absalom yahge nyah dius jens dvnganh gas Yerusalem mas jweh los; Ahithophe eq bos.

¹⁶Dawi dah dyenschangh Arkhi dius Hushai eq Absalom jyank mas thyet thyet e lha kaiq taiq zis gas, Hwankti kang xing bas jungh, hwankti kang xing bas jungh, ge.

¹⁷Absalom Hushai lyis taiq zis gas, Haih zis nah dyenschangh lyis jyehjuh kuot zis nghuot lhyeh? Nah dyenschangh yah chamus ma loh, ge.

¹⁸Hushai toeuh zis gas, Ma nghuot, YHENSAIN yahge Israel jens dvnganh khyen yoeus soeu jyank mas ngos muhwons das oen nyeis.

¹⁹Khasoeh nghuot laus eq ngos nvng lyis chamus ma phuqsoe vvng lah? Ngos gas nah uwus lyis pangh goeus las gvshih nvng lyis pangh das, ge.

²⁰Hauh thang Absalom Ahithophe jyank pheh xoeu lha nyang lyis nyei zis gas, Ngos cha kuot chah shih lah, ge.

²¹Ahithophe nyang lyis taiq kyoh zis gas, Nah uwus yhen zungh das xiklyis toh khoq dah nyah nyinhungh jens jyank mas nvng wvng yhet aq. Housoeh lyis Israel dvnganh gas mehoq yoh tamp das cho ma bos lo shoq nvng nyang lyis maphauh manyang kuot goeus cho seq los das las, nyamoq nvng lyis pangh cho dyei das.

²²Housoeh nyamoq gas dvnganhmoq nyvng dah yhenkhung mha zvng kuot las Absalom ka hauh zvng mas nyah uwus dah nyinhungh jens jyank mas wvng yhet.

²³Dawi kuot khoq teh Absalom eq Ahithophe dyei dah joeui lhyi yhung. Khasoeh ge lyis Ahithophe taiq dah dangkhonh khanghmuh gas Mangso dah nhuot masyah taiq dah dangkhonh teh joeui bos.