Read Achang 2 SAMUEL 17 Bible Online

2 SAMUEL 17 - Achang bible

2 SAMUEL 17

¹Tsai, Ahithophe Absalom lyis taiq nhauh zis gas, Khvnyens nyang toq las Dawi lyis chank khat das xiklyis ngos lyis dius dvmons aiq khyoengh khyen nhang aq.

²Nyang nyung las yomnhuk nyeis uhlyis ngos nyang lyis chank duons das. Nyang yahge nyah thoenkgus jesdvp dvn las dvnganhmoq tsain phang loh das. Housoeh lyis ngos hwankti lhyi kyingh sat das.

³Hauh thang lhyi lonyi saiq gas nyah yhensain phoq jyank tauh los teh ngos dius jens dvnganh lyis nah jyank mas shwih tauh los das. Nvng xo zis gas haih dius yuk dah kang nghuot. Housoeh lyis dius dvnganh gas gudwvng cho ma bos nyenstap cho yoh das, ge.

⁴Hauh toeuq cho ka Absalom yahge Israel uhshe bang dvnganhmoq xiklyis gis.

⁵Nghuot laus eq Absalom gas, Arkhi dius Hushai lyis eq khi aq, nyang haih cho lhyi khasoeh nghamh zis gyo yoeuh goh, ge.

⁶Hushai jweh lyis Absalom gas Ahithophe taiq zis lyis nyang lyis taiq kyoh. Hauh thang lhyi nyang nyei zis gas, Nvng khasoeh nghamh? Yang Ahithophe dyei joeui chank vvng das lah? Ma nghuot lyis gas nvng taiq aq, ge.

⁷Hushai phuk taiq zis gas, Ahithophe dyei dah joeui haq lhain ka ma jus oen ngos nghamh.

⁸Nah uwus yahge nyah dius jens; nyamoq gas yomzains thoeuqzoe jens nghuot zis nvng seq. Gvshih nyamoq gas lo jens chithyuk dah womszains teh nhaiqlom phot phot tsoeu nyeis mvbeh. Nah uwus gas jes thoeuqzoe nghuot zis eq soh aq. Nyang nyenh lyis nyah jesphung yah dvgeh nyeis das zis ma nghuot.

⁹Nyang gas dwang mas, nghuot ya luk-uk dvyos yos mas tamh joq hah das. Nyang thuq zan las nah dius jens dvyhamh gyoh lyis, nah jesphung mha gyukdvn cho bweh los las nah dius jens sat zis xauh nyeis ge, yuk khanghmuh tsain kaiq los das.

¹⁰Hauh uhlyis svsoh womh, khangkhyi nhaiqlom teh zis bos bang nhaiqlom thank tyamp das. Khasoeh ge lyis nah uwus gas jes thoeuqzoe nghuot zis, nyang yah nghuot bang eq ma gyuk ma yet bang nghuot zis Israel jens dvnganh seq.

¹¹Dan wus masyah Besheba wus jweh shoq nyeis dah Israel thoenkgus jesdvp dvnganh lyis tsainh aq oen ngos nvng lyis joeui dyei. Housoeh lyis thomh yvm mas sihsho nyhoq nyo dah thoenkgus jesdvp lyis nvng yoh das. Housoeh nvnyang hauh jesphung lhyi uhshe vvng oen ngos nghamh.

¹²Yang nyang lyis loh xo nyvng lyis yang nyeisjvng mas jyweh gyoh teh nyang lyis nghop goh, housoeh lyis nyah dius jens dvyuk eq kang yoh luiq das zis ma nghuot.

¹³Dawi dvwus wus mas tamh joq lyis eq, Israel thoenkgus jesdvp dvkoeuq gonh nah vmingh o mha nghuot joq das. Housoeh lyis yang dvnganh hauh wusciank lyis twih yah twih las luklo dvlom eq ma nyvng lo shoq zes ni thank langhkhau mha yoh she khyoq das.

¹⁴Housoeh Absalom yahge Israel dius jens dvnganh taiq zis gas, Arkhi dius Hushai dyei dah joeui ka Ahithophe dyei dah joeui thoq lyis zes gis, ge. Khasoeh ge lyis YHENSAIN ka Ahithophe dyei dah joeui gis lyis dyoq shoq dye sont toh goeus, housoeh lyis nyang Absalom thoq mas dyoqbis cho yoh jweh nhang das.

¹⁵Housoeh Hushai ka Ahithophe cha taiq goeus zis yahge hauh gungsthaiq nyang cha joeui dyei goeus zis lyis phudyei vzomh Zadok yahge Abiatha lyis taiq kyoh.

¹⁶Nyang nyah zomh lyis taiq kyoh zis gas, Nyap mus geh! Dawi lyis xo lha khvnyens Yodan lvng yvm mas vnyeis lo oen nyang lyis taiq kyingh aq. Nyang thyitvp pheh mhanhdyvp pa lai shoq gvshih nyang goeu loh chah. Ma nghuot lyis gas, nyang gas nyang yah dvgeh loh dah nyah jesphung gonh yah dvgeh shei das, ge.

¹⁷Wus mas thuq wvng kuot cho gohyuk ma nyvng das xiklyis Yonathan yahge Ahima gas En Rogel mas nyeis. Nyah zomh hwankti Dawi lyis loh taiq kyoh chah dah loeus lyis jyeidwis nyelo dvyuk nyah zomh lyis los dih dyei.

¹⁸Nghuot laus eq nyah zomh gas hwankti Dawi jyank loh das xiklyis En Rogel masyah thuq loh nyeis zis lyis yukgis lo dvyuk nyvng las nyang gas hauh cho lhyi Absalom lyis loh taiq kyoh. Hauh uhlyis nyah aiq yuk Bahurim mas lvnyap loh, houmha vbusbih dvyuk gas nyah zomh lyis nyah yhenkhyam mha bos jeisdwang khau mha shung toh.

¹⁹Hauh vbusbih dah yhensain nyhiq gas jeisdwang lyis misseh yah nghop las hauh thoq mas wom lhap toh: housoeh las nyah zomh jeisdwang mas lungh joq zis lyis hank eq ma khamkhvv.

²⁰Absalom dah dius jens hauh yhen mha jweh lyis nyamoq nyang lyis nyei zis gas, Ahima yahge Yonathan lyis nvng vnyvng lah, ge. Vmesbih toeuh zis gas, Nyah zomh heimha jweh los, nghuot laus eq nyah zomh jeislo lvng thyitvp pheh goeu loh goeus, ge. Absalom dah dius jens nyah zomh lyis xo ma nyvng las Yerusalem pheh tauh loh.

²¹Hauh thang lhyi nyah aiq yuk jeisdwang masyah du thuq las hwankti Dawi jyank lvnyap loh. Nyah aiq yuk Dawi lyis taiq zis gas, Khvnyens nyang Yodan lvng thyitvp pheh lvnyap goeu loh geh, ge. Nyah aiq yuk gas nyang lyis nyhik las sat das cho Ahithophe joeui khasoeh dyei goeus cho lhyi nyang lyis taiq kyoh.

²²Dawi yahge nyang yah dvgeh nyeis bang dvnganh gas, hauh nyens lyis Yodan lvng tsain goeu las nyoq ma nyvng shih lyis nyamoq dvnganh gas thyitvp pheh jweh goeus.

²³Hauh uhlyis Ahithophe gas nyang dyei dah joeui lhyi Absalom ma chank kuot las dius dvnganhmoq xikkhonh mas xoqphuh. Housoeh las nyang nyah mauhlyihzoe lyis anhzoe kih las nyah yhen pheh loh. Nyah yhen jweh lyis nyah yhenbang lyis taiq toh lholha nyang e lhangh shei zo. Nyang lyis nyah uwus nvm mas nyhop.

²⁴Dawi gas ma nyangh lyis Mahanaim mas jweh loh. Hauh uhlyis Absalom gas Israel jesphung gonh lyis tsainh toh las, hau nyah jesphung lhyi uhshe lha Yodan lvng goeu loh.

²⁵Absalom gas Amasa lyis Yoab dah gungsthaiq jeszau toh. (Amasa ka Yoab dah boek nghuot. Nyah uwus gas Ishmael dius Ithra nghuot. Nyah ungwes, Abigai gas Nahash dah lonyi, Yoab dah ungwes Zeruia dah vnoeuh nghuot.)

²⁶Israel jens yahge Absalom gas Gilead mau mas dvp tsain thoeng.

²⁷Dawi Mahanaim mas jweh lyis Raba wus mas Nahash dah lo Shobi Amon dius, Lo Deba wus mas Amiel dah lo Makhi, Gilead dius Rogelim wus mas Bazilai moq gas nyang lyis gauslaus gausseq zes langh.

²⁸Nyamoq gas yhetyos, jyauq zo auh, khuqpan, sunghso yahge bali phih, lhyi toh wom, nuk, lentil nuk xing,

²⁹dyoyhei, nauhcoeu, yvng, nauhjyen lhyi Dawi yahge nyang yah nghuot bang zo das xiklyis sho los. Khasoeh ge lyis nyamoq tsain taiq zis gas, Nyamoq gas svsoh we shoq mhanhdyvp lai las suh jens los las yuot shet nyungdaus nyeis, ge.