Read Achang 2 SAMUEL 23 Bible Online

2 SAMUEL 23 - Achang bible

2 SAMUEL 23

¹Haih zis gas Dawi dah dang thang nghuot. Yakop dah Mangso dah coeu juot zis xauh las nyhang mha toq zis xauh soeu, Israel mas lvkhyank khonh noeuh kat soeu, Yese dah lo Dawi heisoeh ge.

²YHENSAIN dah Dyos gas ngos masyah taiq; Nyah dang gas ngah lhyo mha bos.

³Israel dah Mangso taiq. Israel dah Lukmuh lom ngos lyis taiq: Dius lyis dan khyvlyis guon, Mangso lhyi gyukwoms zis yah guon soeu ka,

⁴nyang gas nvpsangh lyis dah bvng zis teh, jyommauh ma dap dah maukhung mha canh thuq los dah buisloq teh, maunyeis mas mhanh noeuh yuk los nhang dah mau nhamh teh nghuot.

⁵Mangso ngah yhenbang lyis khyen yoeus goeus. Nghuot, nyang ngos yah vcaiq vto thanghchvp chvp goeus. Nyah thanghchvp gas goeng toenk joq, vcaiq vto nghuot, thang thank zis nghuot. Nyang gas ngos jesluiq das cho yahge ngah ung cho xiklyis vjangh yoeuh gomh das nghuot.

⁶Nghuot laus eq Mangso ma bos bang gas doeuh tyamp zis xauh, zoeuzains teh nghuot. khasoeh ge lyis hauh yvlyis zwi bang gas loq mas zoeu zoeu.

⁷Hauh yvlyis dvyuk yuk yah zoeu lyis zwi das thyeq nghuot ya lham yau yhung lha tu tyamp chah; hauh zoeu gas nyi yah ngheq tyamp zis xauh das.

⁸Heika Dawi yoh dah thoeuqzoe jens dah nyings tsain nghuot. Cangxeih vyuk gas Takhemon vhuh mas dah Yosheb Bashebet nghuot. Nyang gas Dawi dah thoeuqzoe zainsmuh somh yuk mas jeszau zainsmuh nghuot. Dvlhain ka nyang jeszan khyomp dvkoeuq mas nyah lham yah jeswus thoeuqzoe jens xetxo lhyi sat.

⁹Aiq vyuk gas Ahohi vnyau Dodo dah lo Eleaza nghuot. Jeszan khyomp dvkoeuq mas Israel thoenkgus jesdvp dvkoeuq gonh nungs jik loh lyis, Eleaza yahge Dawi gas Philisti lyis thoenk zan.

¹⁰Nyang gas nyah loq nyung las nyah sham ma yoh toeu lo shoq Philisti jens lyis zan sat. Hauh nyeih lyis YHENSAIN ka ung zainsmuh dyei los. Jes dye zan lyis Israel jens gas shei bang mas dah kyonhkhyi yoeus das xiklyis Eleaza nyeis yvmas tsain tauh los.

¹¹Somh vyuk gas Hara mau mas soeu Agee lo Shama nghuot. Dvlhain ka Philisti jens gas Lehi mha zain las nuk dyingh dyingh bos dah yos dvkoeuq mas Israel jens lyis jeszan. Israel jens gas Philisti jens jyank masyah loh.

¹²Nghuot laus eq Shama gas yos gungs mas thoenk yap las Philisti jens lyis sat. Housoeh YHENSAIN ka hauh nyeih lyis ung cho zainsmuh dyei.

¹³Jyo yhomh nyos dvnyos lyis Dawi gas Adulam dah lukkhyung mha nyeis uhlyis Philisti jens gas Rephaim pa mha dvp thoeng nyeis. Khyen toh thoeuqzoe somhci mha hauh somh yuk moq gas Dawi yah xauhgoh das xiklyis houmha gyoh e.

¹⁴Hauh uhlyis Dawi gas jing thoenkgus jesdvp khau mha nyeis. Philisti jens dvphung ka Betlehem mas dvp thoeng toh.

¹⁵Dawi gas Betlehem lyis hwangh las, Dvyuk yuk Betlehem wus khomh nvm mas joq dah jeisdwang mas dah jeis lyis kham lha ngos lyis dyei phoh ya lheih, ge.

¹⁶Housoeh hau thoeuqzoe somh yuk gas Philisti dvp lyis thyoq wvng las Betlehem khomh nvm mas joq dah jeisdwang mas jeis kham lha Dawi jyank mas chi los. Nghuot laus eq nyang hauh yvlyis ma shuk, YHENSAIN lhyi dvhuot dyei.

¹⁷Nyang taiq zis gas, YHENSAIN eh, Haih jeis shuk cho ka ngos yah we bas jungh. Haih jeis gas nyamoq kang lhyi ma yu lo ngah xiklyis jeis loh kham los dah haih somh yuk dah suih shuk teh nghuot. Housoeh las nyang hauh yvlyis ma shuk. Haih zis gas hauh thoeuqzoe somh yuk dah womh kuot cho dangtoeuq dvkoeuq nghuot.

¹⁸Zeruia lo Yoab vnoeuh Abishai gas thoeuqzoe somhci yuk mas uhjyung nghuot. Nyang gas dvlhain ka jeszan khyomp dvkoeuq mas lham yah jeswus thoeuqzoe jens somhxo sat yvmvyah thoeuqzoe somh yuk teh nyings yoh.

¹⁹Abishai ka hauh somh yuk mas ma bos laus eq, hauh somhci mha nyings hoeuh thank soeu yahge nyamoq dah zau nghuot.

²⁰Kabzel mas Yehoiada dah lo womh dah thoeuqzoe Benaia ge soeu eq bos. Nyang gas Moab yomzains thoeuqzoe aiq yuk lyis sat teh svsoh womh cho nyoshoq kuot goeus. Dvlhain ka dwang dvkoeuq mas khangkhyi dvdoeu lyis chank khat. Housoeh nyang gas gyu gyoh nyeis las nyeisjvng jyuot laus eq hauh khangkhyi lhyi nyhik las sat.

²¹Dvlhain ka nyang Egutu dius thoeuqzoe zains dvyuk lyis eq sat. Hau Egutu dius gas nyah loq mas lham chi toh. Nyang gas lhamloq dvkoeuq yah nyah jyank mas e lha hau Egutu dius dah lham dap lhuot las hauh zis yah nyang lyis sat.

²²Haih zis gas somhci[28] yuk mas dvyuk nghuot dah Benaia dah womh cho tsain nghuot.

²³Nyang gas hauh thoeuqzoe somh yuk mas ma bos laus eq, thoeuqzoe somhci yuk thoq lyis ngelang zes bos. Housoeh Dawi gas nyang lyis nyah gungs zungh uhjyung toeuq kat.

²⁴Hauh somhci yuk mas bos bang gohyuk gas: Yoab dah vnoeuh Asahel; Betlehem mas Dodo dah lo Elhanan; Harod wus mas zis Shama yahge Elika; Pelet mas zis Helez; Tekoa mas Ikesh dah lo Ira; Anothot mas Abiezer; Hushat mas Mebunai; Ahohi mas Zalmon, Netopha mas Maharai; Netopha mas Bana lo Heleb; Benyamin vnyau Gibea mas dah Ribai dah lo Ithai; Pirathon mas Benaia; Gash langhkhau mha dah Hidai; Araba mas Abialbon; Bahurim mas Azmawet; Sha Albon mas Eliaba; Yashen lo Yonathan; Hara mas Shama; Hara mas Shara lo Ahiam; Makha mas Ahabai lo Eliphelet; Gilo mas Ahithophe lo Eliam; Kharmeli mas Hezro; Arbi mas Parai; Zoba mas Nathan lo Igal; Gad vkoq mas Bani; Amon dius Zelek; Zeruia lo Yoab dah jeszis chi dyei soeu Berot mas Naharai; Ithri mas Ira yahge Gareb; Hiti dius Uria, Dvnganh lyis somhci nyhet yuk nghuot.