Read Achang 2 SAMUEL 3 Bible Online

2 SAMUEL 3 - Achang bible

2 SAMUEL 3

¹Housoeh Saulo yhenbang yahge Dawi yhenbang gas jes nyangh nyangh zan-goh. Dawi gas yom mvno zes bos los; Saulo yhenbang gas yom mvno nhuk loh.

²Hebron mas khoeu, Dawi dah lo jens gas, lomons yuk gas Yezrel lonyi Ahinoam khomh mas Amnon;

³aiq vyuk gas Khamel mas Naba dah chauhmuh Abigai khomh mas Kileab; somh vyuk gas Geshu hwankti dah lonyi Makha khomh mas Absalom;

⁴nyei vyuk gas Hagit khomh mas Adoniya; oeng vyuk gas Abital khomh mas Shephatia;

⁵khyuk vyuk gas Dawi dah nyi Egla khomh mas Ithream tsain nghuot. Haih goeu gas Hebron mas khoeu los, Dawi dah lo jens nghuot.

⁶Saulo yhenbang yahge Dawi yhenbang jes zan-goh uhlyis Abna gas Saulo yhenbang shot pheh goeng goeng yap.

⁷Saulo ka Aia dah lonyi, Rizpa ge nyinhungh dvyuk bos. Housoeh Ishboshet Abna lyis taiq zis gas, Nvng ngah uwus dah nyinhungh chamus shoeuh, ge.

⁸Hauh dang gvng mas Abna Ishboshet lyis nhaiqgis yo las taiq zis gas, Ngos gas Yuda vnyau lyis tyi lha nah uwus Saulo yhenbang, nyah vmang vnoeuh, buisnoms jens lyis khvnyhik jweh shoq jyehjuh kuot las nvng lyis Dawi loq mas ma kyauh. Nvng gas ngos lyis lvkhuih teh dvnghamh las, khvnyhik nvng ngos lyis haih vmesbih gvng mas yobos huon lhyeh?

⁹YHENSAIN ka haih munghdan lyis Saulo yhenbang masyah cheh las, Dan wus masyah Besheba wus jweh shoq ge Israel mau, Yuda mau gonh thoq mas Dawi dah hwankti tank toh das ge, maukhi zis yah dvyhangteh, ngos eq Dawi lyis ma pangh dvnyeis nghuot lyis gas YHENSAIN ngos lyis hauh thoq lyis kuot bas jungh, ge.

¹¹Ishboshet gas Abna lyis gyuk yvmvyah, dang dvkhonh eq ma womh taiq.

¹²Housoeh Abna gas Dawi jyank mas nyah gungsthaiq loeuskyoh bang nhang lha taiq kat zis gas, Munghdan hank guon das? Ngos yah xamxonh cho kuot aq, Israel jens dvnganh lyis nah shot pheh lhain los shoq ngos nvng lyis pangh bah, ge.

¹³Dawi taiq zis gas, Gis, ngos nvng yah xamxonh cho kuot das. Nghuot laus eq ngos dvja sang bah. Nvng ngos yah los xauhgoh das lyis Saulo dah lonyi Mikha lhyi shwih los dyei chah. Housoeh ma nghuot lyis gas nvng ngah nyoqnho lhyi ma yoh nyvng das, ge.

¹⁴Dawi Saulo dah lo Ishboshet jyank mas mangkat zis gas, Ngos Philisti jens dah vthyoh dvxo yah wis toh ngah yhensain nyhiq Mikha lyis nhang kat aq, ge.

¹⁵Housoeh Ishboshet eq dius nhang lha hauh vmesbih lyis nyah yhensain phoq Laish dah lo Patiel jyank masyah yoeus.

¹⁶Nyah yhensain phoq eq Bahurim jweh shoq chank ngaus loh. Hauh thang lhyi Abna nyang lyis, Tauh loh aq ge lyis, nyang tauh loh.

¹⁷Abna gas Israel uhshe bang yah xam zis gas, Xikpheh namoq Dawi lyis hwankti toh mes zis yah dvyhangteh,

¹⁸gvshih nyang lyis namoq hwankti toh geh: khasoeh ge lyis YHENSAIN Dawi dah cho taiq toh zis gas, Ngah jyeidwis Dawi loq masyah ngah vnyau Israel lyis Philisti loq masyah eq, jeswus dvnganh dah loq masyah eq ngos khyuot yoeus das, ge.

¹⁹Tsai, Abna gas Benyamin vnyau mas dah uhshe bang yah eq taiq goh. Hauh thang lhyi Abna gas Israel jens dvnganh yahge Benyamin vnyau xamxonh cho dvnganh, Hebron mas Dawi lyis taiq kyoh das ge loh.

²⁰Abna gas aiqci yuk yah dvgeh Hebron wus Dawi jyank mas jweh loh lyis, Dawi eq Abna yahge nyah dius jens xiklyis pwe kuot dyei.

²¹Abna Dawi lyis taiq zis gas, Israel dius jens dvnganh nvng hwankti shot dap das xiklyis ngos gvshih loh kuot das. Nyamoq nvng lyis hwankti khyvlyis lhom yoeus das. Houlho lhyi nvng o mes khyvlyis nvng dvmau gonh yoh guon das. Dawi gas Abna lyis nyenstap zis yah nhang kat.

²²Hauh thang ma nyangh lyis, Dawi dah gohtoeu zau jens yahge Yoab gas jeswus lhyi chank khat mhayah tauh los. Nyamoq yah lvnyhvp nyoshoq bos los. Abna gas Dawi yah dvgeh Hebron mas ma nyeis; nyang lyis nhang kat goeus las nyang nyenstap zis yah loh lo goeus.

²³Yoab yahge nyang yah dvgeh nghuot dah jesphung jweh los lyis nyamoq Yoab lyis taiq kyoh zis gas, Ner dah lo Abna gas hwankti jyank mas los las hwankti ka Abna lyis nyenstap zis yah nhang kat goeus, ge.

²⁴Housoeh las Yoab gas hwankti jyank mas loh taiq zis gas, Nvng cha kuot? Yoeuh aq, Abna nah jyank mas los. Nvng nyang lyis chamus nyenstap zis yah nhang kat?

²⁵Ner dah lo Abna gas nvng lyis mhuih las nvng khapheh gyangh loh cho yahge nvng kuot cho dvnganh lyis yoh seq das xiklyis nah jyank mas dvlos zis gas nvng seq das, ge.

²⁶Yoab gas Dawi jyank masyah thuq loh las Abna thang mha loeuskyoh bang chank nhang. Sira jeisdwang masyah nyang lyis shwih tauh los. Hauh cho Dawi gas ma seq.

²⁷Abna Hebron mas tauh jweh lyis Yoab gas nyang yah dang samlo jisgoh das teh wus khomh nvm mas shwih loh las, nyah vnoeuh Asahel dah suih gvng mas nyang nyah womdau mas thauh las nyang shei.

²⁸Hauh cho Dawi xauhgyo las nyang taiq zis gas, Ner dah lo Abna dah suih yobos gas ngos mas eq, ngah munghdan mas eq ma bos zis YHENSAIN seq.

²⁹Hauh gvng mas joeng cho ka Yoab dah uhloms thoq mas, nyah uwus yhenbang dah uhloms thoq mas joq bas jungh. Yoab dah yhenbang mas dyings nyuk soeu, dvmjot dap soeu, nungs goeuh soeu, sham mha shei soeu, yuot shet soeu malyen bos bas jungh, ge.

³⁰Housoeh Yoab yahge nyah vnoeuh Abishai gas Abna lyis sat. Khasoeh ge lyis Abna gas Gibeon mas jes zan-goh yvmas nyah zomh dah vnoeuh Asahel lyis sat.

³¹Dawi Yoab yahge nyang yah dvgeh nghuot bang dvnganhmoq lyis taiq zis gas, Namoq dah dyimis lang chuiq tyamp geh, yanghthung dyi lyet las Abna xiklyis kukxi geh, ge. Hwankti Dawi nyang eq dius nyhop loh yvmas chank.

³²Abna lyis Hebron mas nyhop. Hwankti ka Abna dah lop mas kaiq ngaus. Dius jens dvnganh eq ngaus.

³³Hwankti Abna lyis uhngauh zis gas, Chamus las Abna gas vkoh vbang teh shei lhyeh!

³⁴Nah loq mas twih ma huot, khyei mha kyomh ma kyomh, ma shop soeu dah loq mas shei teh nvng shei zis xauh goeus nyvng, ge. Dius jens dvnganh eq doms ngaus.

³⁵Hauh shei pwe mha dius jens gas Dawi lyis wom zo goh ge laus eq Dawi maukhi lha taiq zis gas, Ngos buis ma wvng shih lyis ohlhyoq, zonoms cha eq chaq goeus ya, Mangso ngos lyis sat bas jungh, ge.

³⁶Hauh cho lhyi dius jens dvnganh nhaiq yoeuh doeus. Hwankti kuot ya kuot zis lyis dius jens dvnganh nhaiqdoeus.

³⁷Hwankti ka Ner dah lo Abna lyis sat mes zis ma nghuot yvlyis hauh nyeih lyis Israel jens yahge dius jens seq.

³⁸Tsai, hwankti nyah zau jens lyis taiq zis gas, Khvnyhik Israel mas kuh dah uhshe soeu yahge dius zains dvyuk gyoh zis namoq ma seq goh lhyeh?

³⁹Ngos gas coeu juot xauh las hwankti nghuot joq laus eq khvnyhik yomnhuk nyeis. Zeruia dah lo tang haih vzomh gas ngah thoq lyis yom tsain bos. Haih lhung vzomh lyis Mangso ka nyah zomh dah yobos yah dvyhangteh phauh shangh bas jungh, ge.