Read Achang 2 SAMUEL 5 Bible Online

2 SAMUEL 5 - Achang bible

2 SAMUEL 5

¹Hauh thang lhyi Israel vkoq dvnganh gas Hebron wus, Dawi jyank los taiq zis gas, Yoeuh aq, ngamoq gas nah suih shoh nghuot.

²Xikpheh Saulo ngamoq dah hwankti nghuot yoq lyis eq nvng gas Israel vnyau lyis shwih uhshe soeu nghuot. YHENSAIN eq nvng lyis, Nvng gas ngah vnyau Israel lyis yoeuh das yvng yoeuh soeu nghuot das. Nvng nyamoq dah uhshe soeu nghuot das, ge taiq toh.

³Housoeh Hebron wus mas Dawi gas Israel uhshe bang yah YHENSAIN xikkhonh mas thanghchvp toh. Nyamoq gas nyang lyis coeu juot zis yah Israel thoq mas hwankti toh.

⁴Dawi gas nyang guon xi uhlyis nyah nyenhkyi somhci zvn nghuot las, nyeici zvn guon.

⁵Nyang Hebron mas Yuda jens lyis nyhet zvn lhamhmuh khyuk khyvp guon las, Yerusalem mas nyang Israel jens dvnganh yahge Yuda jens lyis guon zis gas somhci somh zvn nghuot.

⁶Hwankti Dawi yahge nyah dius jens gas Yebusi jens nyeis dah Yerusalem lyis loh zan. Yebusi jens gas Dawi lyis, Nvng haih wus khau mha khanhamp eq ma yoh wvng das. Nyoqjet, khyei gyau bang yangh namoq lyis yoh zan tyamp, ge taiq. Yebusi moq nghamh zis gas nyamoq gau joqyos mas nyeis ge.

⁷Nghuot laus eq Dawi gas hauh goengtoenk Zion wus lyis zan yoeus. Gvshih hauh wus lyis Dawi dah wus ge.

⁸Wus khau mha lhom zan bang dah jwangh loeus Dawi jyank jweh los uhlyis nyang gas nyah jesphung lhyi taiq zis gas, Wus khau pheh jeiskhyoh chank yah wvng loh las hauh khyeigyau, nyoqjet dah Yebusi moq lyis sat geh. Ngos nyamoq lyis svsoh hoeng, ge. Hauh zis gas, Nyoqjet soeu yahge khyeigyau soeu yhen mha ma wvng bas jungh, ge dah sangkhyangh bweh los vpom nghuot.[7]

⁹Hauh goengtoenk wus lyis yoh zan yoeus thang lhyi Dawi houmha nyeis las hauh wus lyis Dawi dah wus ge lui. Dawi gas Milo[8] masyah xi lha yvmlhaink eq yhen tsain tsuk toh.

¹⁰Dawi gas zes zes kuhxing los: khasoeh ge lyis Maukhung Jesphung YHENSAIN Mangso ka nyang yah dvgeh nghuot.

¹¹Taire hwankti Hiram gas Dawi lyis hwankti yhen tsuk dyei das ge loeuskyoh bang yah dvgeh Arit saiq, luktsan bang yahge soehfuh jens lyis Dawi jyank mas nhang kat las nyamoq gas Dawi xiklyis hwankti yhen tsain tsuk.

¹²YHENSAIN ka nyang lyis Israel jens dah hwankti kuot nhang zis yahge nyah dius Israel jens gvng mas nyah munghdan kuhxing los nhang yvlyis Dawi yoh seq.

¹³Dawi gas Hebron masyah Yerusalem pheh thuot los thang lhyi yhensain nyhiq jens yahge nyinhungh jens doms yoeus lung shih las nyang loloeu lonyi jens nyoshoq yoh.

¹⁴Heika Yerusalem mas khoeu, Dawi dah loloeu jens dah nyings tsain nghuot. Shamua, Shoba, Nathan, Solomon,

¹⁵Ibha, Elishua, Nepheg, Yaphia,

¹⁶Elishama, Eliada, Eliphelet nghuot.

¹⁷Dawi gas Israel dvnyau gonh thoq mas hwankti duot das xiklyis coeu juot kham ge cho Philisti jens dvnganh xauhgyo lyis, nyamoq gas Dawi lyis nyhik das ge tsain los. Hauh cho Dawi xauhgyo lyis, nyang goengtoenk joqyos pheh e loh.

¹⁸Philisti jens eq los las Rephaim langhkhau mha nyoh loh.

¹⁹Dawi, YHENSAIN lhyi nyei zis gas, Ngos Philisti jens lyis vzan das lah? Nvng ngos lyis ung cho vdyei das lah, ge. YHENSAIN Dawi lyis taiq zis gas, Ngos nvng lyis ung cho dyei das, loh zan aq, ge.

²⁰Dawi gas Bala Perazim mas nyamoq lyis zan ung. Nyang taiq zis gas, YHENSAIN ka kvkhyot khyot teh ngah jeswus lyis ngah xikkhonh mas khyoq tyamp goeus ge nyang hauh joqyos lyis Bala Perazim ge nyhink.

²¹Nyamoq houmha nyamoq dah gungslho tyamp khoq yvlyis Dawi yahge nyah dius jens yah tsain yoeus loh.

²²Philisti jens eq Rephaim langhkhau mha los doms nyoh loh.

²³Tsai, Dawi YHENSAIN lhyi nyei lyis YHENSAIN taiq zis gas, Zungh zungh vdoq loh, nungsthank cho lhain lha nyvng saiq khyam[9] yah twi twi mhayah zan aq.

²⁴Nyvngzains thyoh mas jes los sam teh xauhgyo lyis dyvm zan lo aq. Hauh uhlyis YHENSAIN ka Philisti dvp lyis zan das zis nah xik mas loh das.

²⁵Dawi eq YHENSAIN nyang lyis vmingh dyei zis yah dvyhangteh kuot las Philisti jens lyis Geba masyah Gezer jweh shoq khat tyamp.