Read Achang 2 SAMUEL 6 Bible Online

2 SAMUEL 6 - Achang bible

2 SAMUEL 6

¹Tsai, Dawi gas khyen toh dah Israel somh mons lyis tsainh toh.

²Housoeh Dawi gas Kherubim jo mas nyeis, Yomzains YHENSAIN dah nyings wons, Mangso dah Kwi lhyi yoeus das xiklyis, nyah dius jens yah Yuda mau Bala wus pheh loh.

³Nyamoq gas Mangso dah Kwi lyis boms mas joq Abinadab yhen mhayah yoeus thuq, lhyingh saiq mas kih las tyungh los. Abinadab dah lotang Uza yahge Ahio gas hauh Mangso dah Kwi bos lhyingh saiq tsain komp.

⁴Ahio gas xik pheh suh.

⁵Dawi yahge Israel dius dvnganh gas Mangso xikkhonh mas nyamoq dah yom dvnganh yah chunghthwe kat zis yahge toenk khvlhank vja ja nghuot dah toenk, janghau, zains bat las pwe kuot.

⁶Nyamoq Nakhon dah thanjang mas jweh lyis, noeu khyeiuh thungh las lains bah ge lyis Uza gas nyah loq yhonh kat las Thanghchvp Kwi lyis ma lop ma loeh das xiklyis zwi.

⁷YHENSAIN Mangso ka Uza housoeh zwi gvng mas nhaiqyo las, nyang lyis Mangso dah Kwi nvm mas sat.

⁸Housoeh YHENSAIN ka Uza lyis nhaiqyo las joeng yvmvyah, Dawi nhaiqyo las nyang hauh joqyos lyis Pere Uza[10] ge lui zis khvnyhik jweh shoq nghuot.

⁹Hauh nyeih lyis Dawi gas YHENSAIN lhyi gyuk las taiq zis gas, Gvshih ngos YHENSAIN dah Kwi lhyi ngos yah dvgeh khasoeh yoh yoeus loh das lah, ge.

¹⁰Housoeh Dawi gas YHENSAIN dah Kwi lhyi nyang yah dvgeh Dawi dah wus mas ma yoh cheh loh. Hauh gungsthaiq Dawi gas hauh zis lyis Giti dius Obed Edom yhen mha loh toh khoq.

¹¹Hauh YHENSAIN dah Kwi Obed Edom yhen mha lhamhmuh somh khyvp joq. YHENSAIN ka Obed Edom yahge nyah yhenbang dvnganh lyis shvmanh dyei.

¹²Mangso dah Kwi gvng mas Obed Edom yhen yahge nyang yoh zis dvnganh lyis YHENSAIN shvmanh dyei cho hwankti Dawi lyis taiq kyoh los. Housoeh las Dawi gas pwe zainsmuh kuot las Mangso dah Kwi lhyi Obed Edom yhen mhayah Dawi dah wus mas loh tyungh los.

¹³YHENSAIN dah Kwi dvng bang khyuk bes cheh thang lhyi Dawi noeulu dvdoeu yahge noeulo dvdoeu yah lomhxangh yoh lainh das xiklyis, nyamoq Dawi lyis no las langh.

¹⁴Dawi gas YHENSAIN dah xikkhonh mas phauh nyang zis yah nyang duot nyhoq goh; Dawi gas misyhwiq ephod wuot toh.

¹⁵Housoeh Dawi yahge Israel dius jens dvnganh gas lvbuh thwe eq kaiq hoeu zis yah eq YHENSAIN dah Kwi lhyi chi los.

¹⁶YHENSAIN dah Kwi Dawi dah wus mas wvng los nyeis lyis Saulo dah lonyi Mikha ka khomhbaiq masyah yoeuh lyis hwankti Dawi gas YHENSAIN xikkhonh mas goh las nyungs las los nyeis yvlyis nyvng las, nyah ehnyet mas nyang lyis yoeuh choqh, dius ngis yoeuh khyoq.

¹⁷Nyamoq YHENSAIN dah Kwi lhyi yoeus los las Dawi kuot toh zvng vkhau, nyah joqyos mas toh. Hauh thang lhyi Dawi gas YHENSAIN dah xikkhonh mas ngheq jyungshuk, nyenstap jyungshuk phudyei.

¹⁸Housoeh Dawi gas ngheq dyei jyungshuk, nyenstap jyungshuk dye phudyei lyis Maukhung Jesphung YHENSAIN nyings masyah dius jens lyis shvmanh dyei.

¹⁹Hauh thang lhyi nyang dius jens dvnganh, Israel moqjens gonh, vbusbih vmesbih yuk khanghmuh lyis ohlhyoq dvkoeuq, shoh dvkhyiq,[11] zvbiq shih kyuk gvm. Housoeh dius jens dvnganh hank eq hank nyang yhen pheh dyos loh.

²⁰Dawi eq nyah yhenbang lyis shvmanh dyei das ge tauh los. Saulo dah lo Mikha ka Dawi lyis thuq zes las taiq zis gas, Nhaiq ma bos, xoq zis ma bos vsainnyang dah dyimis shang tyamp teh, khvnyhik jyeidwis nyhiq jens xikkhonh mas dyimis khyuot dah Israel hwankti ka khvnyhik phunk kha iq bos goeus lah, ge.

²¹Dawi Mikha lhyi taiq zis gas, Nah uwus yahge nyah yhenbang dvnganh dah gungsthaiq ngos lyis khyen lha YHENSAIN dah dius, Israel lyis guon nhang dah YHENSAIN xikkhonh mas ngos goh goeus. Housoeh las YHENSAIN mha ngos gauslaus cho chixoeuq das xiklyis ngos koh soeu teh kuot das zis bauh.

²²Ngos hauh thoq lyis kuot shih das, nah xik mas xoqphuh teh nghuot laus eq, hau nvng taiq dah jyeidwis nyhiq jens gas ngos lyis chungh shih das, ge.

²³Housoeh las Saulo dah lo Mikha ka, dvcaiq yah lo ma bos khoq.