Read Achang 2 SAMUEL 8 Bible Online

2 SAMUEL 8 - Achang bible

2 SAMUEL 8

¹Hauh thang lhyi Dawi gas Philisti jens lyis zan ung lha Philisti jens loq masyah Metheg Ama wus lyis yoeus.

²Moab bang lyis eq zan ung. Nyang nyamoq lyis nyeisjvng mas lhain toh nhang lha twih yah keq las aiq khyoh goeu lyis sat, dvkhyoh lyis gas vdwis toh. Vdwis toh dah Moab jens gas Dawi dah jyeidwis jens bweh las nyang lyis khoengh kat.

³Dawi gas Uphrat lvng thoq pheh nyah mau doms yoeus das ge loh dah Zoba hwankti Rehob dah lo Hadadezer lyis zan.

⁴Dawi gas nyah jyank masyah jeslhyingh ji bang [15] dvkhyoengh nyhetxo, jeslo aiq mons xauh yoeus. Dawi gas nyamoq xiklyis luk ko jes lhyingh dvxo nyhenshang nyang nyhet toh las gohtoeu dvnganh dah langhkhank-gyi thyet tyamp.

⁵Damasku mas dah Siria jens gas Zoba hwankti Hadadezer lyis jes los bos pangh zan uhlyis Dawi gas Siria dius aiqmons aiq khyoengh lyis sat.

⁶Hauh thang lyis Dawi Siria mau Damasku wus mas zungh bang lyis toh. Hauh Siria jens Dawi jyank mas jyeidwis doeus gvng mas khoengh kat. Dawi loh joqyos khanghmuh mas YHENSAIN gomh toh.

⁷Dawi gas Hadadezer dah zau jens dah xing gos tsain yoeus las hauh yvlyis Yerusalem pheh chi loh.

⁸Hadadezer dah Beta wus yahge Berothai wus masyah hwankti Dawi gas thunk nyoshoq yoeus los.

⁹Dawi yah Hadadezer dah dvp lyis ung tyamp cho Hamat hwankti Toi xauhgyo lyis,

¹⁰Toi gas nyah loloeu Yoram lyis hwankti Dawi jyank mas loh jeshuh, loh shvmanh nhang: khasoeh ge lyis nyang nyoshoq lhain zan ku dah jes Hadadezer lyis Dawi jeszan ung yvmvyah nghuot. Yoram eq ngwis khuq, xing khuq, thunk khuq chi lha los.

¹¹Hwankti Dawi gas hauh yvlyis nyang dius nyau dvnganh mas ung los dah ngwis xing yah dvgeh YHENSAIN lhyi kyauh.

¹²Nyang ung dah dius nyau jens gas Siria, Moab, Amon, Philisti, Amalek yahge Zoba hwankti Rehob lo Hadadezer tsain nghuot.

¹³Dawi Coh langhkhau mha Edom dius dvmons xet khyoengh sat thang lhyi nyah nyings zes hoeuh los.

¹⁴Edom mau joqyos khanghmuh mas zungh bang lyis toh. Edom dius dvnganh gas Dawi dah jyeidwis jens bweh los. Dawi khalhye loh khalhye YHENSAIN ka nyang lyis gomh toh.

¹⁵Housoeh Dawi gas Israel dvnganh thoq mas guon nyeis. Dawi gas nyah dius dvnganh lyis jyoeng khyvlyis soetuon dyei.

¹⁶Ungwes Zeruia dah lo Yoab gas jeszau zainsmuh nghuot. Ahilud lo Yehoshaphat gas comh soeu nghuot.

¹⁷Ahitub lo Zadok yahge Abiatha lo Ahimelek tang ka phudyei tang nghuot. Seraia gas hwankti dah muhsain nghuot.

¹⁸Yehoiada lo Benaia gas Dawi dah gungszungh zau[16] nghuot. Dawi lo jens gas phudyei bang tsain nghuot.