Read Achang 1 HWANKTI 1 Bible Online

1 HWANKTI 1 - Achang bible

1 HWANKTI 1

¹Hwankti Dawi gas svsoh mang goeus las nyah jyeidwis jens nyang lyis mis nyoshoq phomh dyei laus eq nyang ma yoh nywe lo.

²Housoeh las nyah zau jens nyang lyis taiq zis gas, Yhensain hwankti eh, ngamoq nah xiklyis lonyi gyingh dvyuk xo dyei bah. Nyang gas nvng yah dvgeh nyeis las nvng lyis phuqsoe bas jungh. Nyang gas nah sainhkhonh mas yhet las nvng lyis nywe nhang bas jungh, ge.

³Housoeh nyamoq gas Israel mau gonh mas yungh dah lonyi lo lyis xo lha Shunem mau mas housoehteh dah lonyi Abishag ge soeu lhyi nyvng las nyang lyis hwankti jyank mas shwih los dyei.

⁴Hauh lonyi lo gas svsoh yungh. Nyang hwankti lhyi yoeuh phuqsoe nyeis. Nghuot laus eq hwankti ka nyang yah ma yhetgoh.

⁵Hauh uhlyis Dawi yahge Hagit dah lo Adoniya gas nyenhkyi bos goeus dah nyah uwus dah gungsthaiq nyang nyang hwankti kuot das ge nghamh thyet. Nyang gas jeslhyingh eq nyang eq, nyah xik pheh wuih das xiklyis dius oengci sont toh.

⁶Nyah uwus Dawi gas nyang lyis ma jyauh ku, Nvng cha kuot nyeis, ge yangh ma nyei ku. Adoniya gas svsoh yungh soeu nghuot. Nyah ungwes gas nyang lyis Absalom dah thang mha khoeu.

⁷Nyang gas Zeruia lo Yoab yahge phudyei Abiatha yah xam lha, nyah aiq yuk gas Adoniya lyis pangh das zis xihhonh.

⁸Nghuot laus eq phudyei Zadok, Yehoiada dah lo Benaia, lvpe Nathan, Shimei, Rei yahge Dawi dah gungszungh bang ka Adoniya shot ma dap.

⁹Adoniya gas En Rogel jeislo lvng nvm mas Zohelet Luk nvm mas yvng, noeu, coeu dah noeulo phudyei las nyah vmang vnoeuh hwankti lo jens - Dawi dah loloeu jens yahge hwankti dah zau jens nghuot dah Yuda jens dvnganh lyis eq yus.

¹⁰Nghuot laus eq lvpe Nathan, Benaia, hwankti dah gungszungh bang yahge nyah vnoeuh Solomon moq lyis gas ma yus.

¹¹Housoeh las Nathan Solomon dah ungwes Batsheba lyis taiq zis gas, Hagit lo Adoniya hwankti kuot cho lhyi seq goeus lah? Yah yhensain Dawi eq hauh yvlyis ma seq.

¹²Housoeh las, nvng eq nah lo Solomon eq kang dwis nyeis das xiklyis ngos nvng lyis joeui dyei bah.

¹³Nvng hwankti Dawi jyank mas lvnyap wvng taiq das zis gas, Nvng ngah yhensain hwankti eh, nah lo Solomon gas jyoengh nyang ngah thang mha hwankti duot las ngah hwankti tank mas tsung das, ge nah jyeidwis lyis nvng dangthoengh toh lhyeh? Housoeh lyis gvshih chamus Adoniya hwankti kuot nyeis lah, oen aq.

¹⁴Yoeuh aq, nvng hwankti lhyi taiq nyeis shih lyis ngos chank wvng los las nah dang lyis bos jyoeng das, ge.

¹⁵Batsheba gas khaulhunk yvp hwankti jyank mas wvng loh. Gvshih hwankti ka svsoh mang goeus las Shunem lonyi Abishag nyang lyis phuqsoe nyeis.

¹⁶Batsheba gas hwankti lhyi dupaiq. Housoeh hwankti nyei zis gas, Nvng cha o, ge.

¹⁷Nyang gas, Ngah yhensain eh, nah lo Solomon gas ngah thang mha hwankti jyoengh duot las ngah hwankti tank mas tsung das ge YHENSAIN, nah Mangso lhyi lui las nvng ngos lyis dangthoengh toh.

¹⁸Housoeh lyis gvshih yoeuh aq, Adoniya gas hwankti kuot nyeis; ngah yhensain hwankti, nvng hauh yvlyis ma seq.

¹⁹Nyang gas noeu, coeu dah noeulo yahge yvng nyoshoq phudyei las, hwankti lo jens dvnganh, phudyei Abiatha yahge jeszau zainsmuh Yoab lyis tsain yus. Nghuot laus eq nah lo Solomon lyis gas ma yus.

²⁰Ngah yhensain hwankti eh, ngah yhensain hwankti dah thang mha hwankti tank mas hank tsung das ge dah nah nghamh thyet cho lhyi Israel dvnganh langh nyeis.

²¹Housoeh ma nghuot lyis gas, ngah yhensain hwankti ka shei lhyi, ngah metang Solomon gas yobos kuot bang lyis teh kuot zis xauh das.

²²Nyang gas hwankti yah dang taiq goh nyeis shih lyis yoeuh aq, lvpe Nathan eq wvng los.

²³Housoeh las hwankti dah joeui dyei bang hwankti lhyi taiq kyoh zis gas, Lvpe Nathan jweh los, ge. Nathan ka hwankti jyank mas wvng las hwankti xikkhonh mas nyeisjvng mas jweh shoq dupaiq.

²⁴Hauh thang lhyi Nathan taiq zis gas, Ngah yhensain hwankti eh, nvng, Ngah thang mha Adoniya guon las ngah hwankti tank mas tsung chah oen taiq toh vnghuot lah?

²⁵Nyang khvnyhik e lha noeu, nyhuk toh noeulo, yvng nyoshoq sat phudyei las, hwankti lo jens dvnganh, jeszau zainsmuh Yoab, phudyei Abiatha lyis tsain yus. Nyamoq gas Adoniya xikkhonh mas zo shuk las, Hwankti Adoniya kang xing bas jungh, tsain ge nyeis.

²⁶Nghuot laus eq ngos, phudyei Zadok, Benaia yahge Solomon lyis gas ma yus.

²⁷Nvng hwankti dah thang mha hwankti tank mas hank tsung das zis lyis nah jyeidwis jens lyis ma taiq, haih cho lhyi ngah yhensain kuot nhang lah, ge.

²⁸Hwankti Dawi phuk taiq zis gas, Batsheba lyis ngah jyank mas khi los aq, ge. Housoeh nyang gas hwankti dah xikkhonh mas los yap joq.

²⁹Hwankti taiq zis gas, Ngos yaukyenh dah cho khvt khanghmuh masyah ngah kang lhyi khyuot yoeus dah YHENSAIN nyang nyeis zis yah dvyhangteh,

³⁰nah lo Solomon gas jyoengh ngah thang mha hwankti kuot las ngah gungsthaiq ngah hwankti tank mas tsung das oen YHENSAIN, Israel dah Mangso mha ngos nvng lyis dangthoengh toh vgus khvnyhik ngos kuot das, ge.

³¹Batsheba gas hwankti lhyi nyeisjvng mas dupaiq las taiq zis gas, Ngah yhensain hwankti Dawi gas vcaiq vto dwis nyeis bas jungh, ge.

³²Housoeh hwankti Dawi taiq zis gas, Phudyei Zadok, lvpe Nathan, Yehoiada lo Benaia moq lyis ngah jyank mas khi los geh, ge. Housoeh nyamoq gas hwankti xikkhonh mas los.

³³Hwankti eq nyamoq lyis taiq, Namoq hwankti yhen mha dah zau jens lyis shwih las ngah lo Solomon lyis ngah luzoe ji nhang lha Gihon jeislo lvng mas shwih loh geh.

³⁴Houmha phudyei Zadok yahge lvpe Nathan ka nyang lyis coeu juot las Israel hwankti kuot nhang bas jungh. Housoeh lvbuh muot las Hwankti Solomon kang xing bas jungh oen kaiq geh.

³⁵Namoq nyang lyis heimha doms shwih tauh los lyis nyang ngah hwankti tank mas tsung das. Nyang ngah gungsthaiq hwankti duot das, khasoeh ge lyis ngos nyang lyis Israel yahge Yuda lyis guon das soeu toeuq toh, ge.

³⁶Yehoiada lo Benaia hwankti lhyi taiq zis gas, Amen. YHENSAIN ngah yhensain hwankti dah Mangso eq housoeh ge bas jungh.

³⁷YHENSAIN ka ngah yhensain hwankti yah nghuot zis yah dvyhangteh, Solomon yah eq nghuot bas jungh. YHENSAIN ka Solomon dah hwankti tank lyis ngah yhensain hwankti Dawi dah hwankti tank thoq lyis zes kuhxing shoq kuot dyei bas jungh, ge.

³⁸Housoeh las phudyei Zadok, lvpe Nathan, Yehoiada lo Benaia, Kreti yahge Pelet jens gas Solomon lyis hwankti Dawi dah luzoe mas ji nhang lha Gihon pheh shwih loh.

³⁹Phudyei Zadok gas gyingshang zvng masyah yoeus lyih dah coeu khyau yoeus las Solomon dah uhloms mas juot dyei. Hauh thang lhyi lvbuh muot lholhyi dius jens dvnganh gas, Hwankti Solomon kang xing bas jungh, ge kaiq.

⁴⁰Dius jens dvnganh gas khvlhank muot las svsoh gausyis zis yah kaiq las Solomon thang mha Yerusalem pheh tauh los. Hauh pwe ka svsoh pyo ngon, svsoh hoeu lha nyeisjvng gas hauh thwe gvng mas nonh loh.

⁴¹Adoniya yahge nyang yah dvgeh dah nyah boengh jens dye zo shuk loh lyis hauh pwe thwe yahge kaiq thwe lhyi xauhgyo. Housoeh Yoab hauh lvbuh thwe xauhgyo las taiq zis gas, Cha bweh nyeis lah? Wus gonh hoeu zis gas chamus lah, ge.

⁴²Housoeh nyang taiq nyeis shih lyis phudyei Abiatha lo Yonathan los. Adoniya nyang lyis taiq zis gas, Wvng los aq, nvng gas dius gis nghuot las loeus gis kyoh das, ge.

⁴³Yonathan Adoniya lyis phuk taiq zis gas, Ngamoq dah yhensain hwankti Dawi gas jyoengh Solomon lyis hwankti toq goeus.

⁴⁴Hwankti ka phudyei Zadok, lvpe Nathan, Yehoiada lo Benaia, Kheret jens, Pelet jens lyis nhang lha nyamoq gas Solomon lyis hwankti dah luzoe mas ji nhang goeus.

⁴⁵Housoeh las phudyei Zadok yahge lvpe Nathan ka Gihon mas Solomon lyis hwankti duot das coeu juot dyei goeus. Nyamoq gas hou mhayah gvshih shih tauh los las dvwus gonh pwe kuot, gausyis nyeis. Nvng xauhgyo zis hauh hoeu thwe nghuot.

⁴⁶Hauh thoq lyis ma goh, Solomon eq gvshih hwankti khyvlyis munghdan hwankti tank mas tsung toh.

⁴⁷Hauh thoq lyis hwankti dah zau jens eq, yah hwankti Dawi lyis loh shvmanh zis gas, Mangso ka Solomon dah nyings lyis nah nyings thoq lyis, nyah hwankti tank gas nah hwankti tank thoq lyis kuhxing nhang bas jungh, ge. Hwankti ka nyah jung mas paiq gop joq.

⁴⁸Hwankti eq heisoeh ge, Ngos kang dwis nyeis uhlyis ngah hwankti tank mas tsung soeu lhyi ngah nyoq yah nyvng das xiklyis, khvnyhik ngah hwankti tank mas dvyuk tsung nhang dah YHENSAIN, Israel dah Mangso ka ngelhoq bas jungh, ge.

⁴⁹Hauh uhlyis Adoniya dah boengh jens dvnganh gyuk dvn las zoshuk kihgus mhayah dyvm toq las nyang yuk nyang cho loh.

⁵⁰Adoniya eq Solomon lyis gyuk las gyingshang zvng pheh gyis wuih e lha phon khyau jens lyis zwi toh.

⁵¹Hauh cho Solomon lyis taiq kyoh los. Hou ka Adoniya hwankti Solomon lyis gyuk las phon khyau lhyi zwi toh las dung nyeis, Solomon hwankti ka ngos lyis ma sat das ge khvnyhik, nyang maukhi bas jungh, ge.

⁵²Solomon taiq zis gas, Nyang dius gis nghuot lyis gas nyah cam dvkhvt eq nyeisjvng mas yoh gyoh das zis ma nghuot. Nyang mas yobos bos lyis gas xauh shei das, ge.

⁵³Housoeh las Solomon gas nyamoq lyis nhang lha, nyang lyis phon mhayah shwih thuq los. Nyang gas Solomon xikkhonh mas los paiq gop joq. Solomon gas nyang lyis, Nah yhen mha loh aq, ge thuq loh nhang.