Read Achang 1 HWANKTI 10 Bible Online

1 HWANKTI 10 - Achang bible

1 HWANKTI 10

¹Sheba hwankti nyih gas YHENSAIN dah nyings lyis phauh nyang nhang dah Solomon dah nyings hoeuh cho xauhgyo lyis, Solomon lyis yau dah nyeidang yah shiyoeuh das ge jweh los.

²Nyang gas xangh ja, xing nyoshoq, phauhdap luk tsain thuq dah gola-u jens, chank bang nyoshoq yah dvgeh Yerusalem mas jweh los. Nyang Solomon yah xauhgoh lyis, nyang yoh nghamh dah nyeidang dvnganh Solomon lyis nyei.

³Solomon gas nyang nyeidang dvnganh lyis phuk dyei. Hwankti ka nyang lyis ma yoh phui kyoh das iq dah dang cha eq ma bos.

⁴Sheba hwankti nyih gas, Solomon dah joeui bos cho dvnganh xauhgyo, nyang tsuk toh dah hwankti yhen lhyi eq nyvng.

⁵Nyang gas Solomon dah kihgus mas wom, nyah zau jens tsung joqyos, jyeidwis jens kuot dyei cho eq nyamoq dah wuot dyi wuot mis eq, nyah kom zwi bang eq, Solomon YHENSAIN Yhenmuh mas ngheq phudyei cho lhyi eq nyvng lyis dyos dvchvp eq ma dap los shoq mauh.

⁶Nyang hwankti Solomon lyis taiq zis gas, Ngos ngah mau masyah nah cho yahge nah joeui xauhgyo cho ka jus.

⁷Nghuot laus eq ngos ngvnyang nyoq yah ma nyvng shih lyis ngos hauh dang lyis ma jingh. Jyoengh ngos gas haih zis dvgohyih yangh ma xauhgyo shih, nah joeui yahge nah dis cho ka ngos xauhgyo dah loeus thoq lyis zes.

⁸Haih dius jens gas khasoeh gauslaus chank bos! Nah xikkhonh mas nyeih yau nyeih yap las nah joeui dang lyis xauhgyo nyeis, nah zau jens dah toeuh cha nghuot!

⁹YHENSAIN, nah Mangso ka jyoengh nyang vzainsmuh nghuot. Nyang nvng lyis nhaiqdoeus las Israel hwankti tank mas tsung nhang. YHENSAIN ka Israel vnyau lyis vcaiq vto jyetdap cho yah jyet yvmvyah, nyang gas nvng lyis hwankti toh goeus. Housoeh las nvng jyoeng cho yahge dan cho yah yoh guon.

¹⁰Hauh thang lhyi nyang hwankti lhyi xing gau khyoengh paung, xangh ja nyoshoq, yahge phauhdap luk tsain dyei. Hwankti nyih Sheba hwankti Solomon lyis dyei dah xangh ja nyhoq nyoshoq khanhamp eq ma xauh lhom yoeus ku.

¹¹Ophira masyah xing thuq los, Hiram dah sangpho jens Ophira masyah algum saiq vbomsdom yahge phauhdap luk eq tsain thuq los.

¹²Hwankti ka algum saiq ya YHENSAIN dah Yhenmuh yahge hwankti yhen dah yhen khyei eq tsuk, chunghthwe kat bang xiklyis toenk, khvlhank eq tsain kuot. Housoeh teh algum saiq khvnyhik jweh shoq khanhamp eq ma nyvng ku.

¹³Hwankti Solomon gas Sheba hwankti nyih lyis thungh bos zis yah dvyhangteh jyungshuk mes nyhoq dyei thoq lyis magoh, nyang sang zis dvnganh dyei. Hauh thang lhyi nyang yahge nyah thang chank bang gas Sheba mau pheh tauh loh.

¹⁴Solomon jyank mas dvzvn lyis wvng dah xing ka aiqci oeng tan[8] ko nghuot.

¹⁵Houmha lai las soenghi kuot yenh bang, hu ungh bang, Arab hwankti jens dvnganh, mungh zau jens jyank masyah los dah xing bos shih.

¹⁶Hwankti Solomon gas, dvkoeuq mas xing dvci oeng paung[9] bos dah xing gos kuh aiqxo kuot.

¹⁷Dvkoeuq mas xing nyei paung[10] bos dah xing gos ngis somhxo kuot. Hwankti ka hauh yvlyis Lebanon Saiqkhyam yvpmuh mas toh.

¹⁸Hwankti ka cang zwis yah hwankti tank eq kuot las xing gyingh yah shauq toh.

¹⁹Hau hwankti tank gas zvmlhangh khyuk keq bos. Hauh tank nungs pheh noeulu uhloms lho dap. Houmha loq kih gus dvshot dvkoeuq bos las hauh vyvm mas khangkhyi aiq doeu yap joq.

²⁰Vkeq khyuk koeuq mas thyi shot haq shot khangkhyi lho dvnganh lyis dvci aiq doeu nghuot. Housoeh teh hwankti tank khah munghdan mas eq ma joq ku.

²¹Hwankti Solomon dah jeis shuk khuq dvnganh gas xing yah kuot toh. Lebanon Saiqkhyam yvpmuh mas dah khuq dvnganh gas xing gyingh nghuot. Ngwis dvkoeuq eq ma bos. Solomon zaih lyis ngwis phauh ma dap las ngwis yah kuot dah kyahsoe ma chi.

²²Hwankti ka soenghi sangpho tsain yoh las thomh mas Hiram dah sangpho yah dvgeh loh. Somh zvn dvlhain ngwis, xing, cang zwis, lvnyuk yahge khanghkyih thuq los.

²³Hwankti Solomon gas nyeisjvng thoq mas nyeis ya nyeis dah hwankti jens thoq lyis joeui yahge dis cho zes yoh.

²⁴Nyeisjvng gonh mas bang gas nyang lyis Mangso dyei dah joeui lhyi los tsain gyo yoeus mes.

²⁵Zvn yau zvn nyah jyank los soeu khanghmuh ngwis kom, xing kom, dyimis, jeszis, xangh ja, nyang, luzoe jyungshuk tsain chi los.

²⁶Solomon gas jeslhyingh yahge nyang dah thoenkgus jesdvp zainsmuh dvkoeuq kuot. Nyang gas jeslhyingh dvkhyoengh nyeixo, nyang dvmons aiq khyoengh[11] yoh. Nyang gas dvkhamh lyis Yerusalem nyah jyank mas toh las nyet goeu lyis jeslhyingh toh wus jens mas tsain toh.

²⁷Hwankti ka Yerusalem mas ngwis lyis lukgoq teh, arit zains lyis Yuda jing khyei mha yuk dah lvhomp zains teh nyo nhang.

²⁸Egutu[12] mau masyah lhyingh yahge, Cilicia[13] wus masyah nyang jens hwank kat cho lhyi Hwankti dah soenghi jens zwi toh.

²⁹Hauh uhlyis Egutu masyah lhyingh yoeus los las dvkoeuq lyis ngwis kyvp 600, nyang dvdoeu lyis ngwis kyvp 150 yoh ungh. Hiti hwankti jens yahge Siria hwankti jens lyis nyoshoq doms ungh dyei.