Read Achang 1 HWANKTI 11 Bible Online

1 HWANKTI 11 - Achang bible

1 HWANKTI 11

¹Solomon gas gohnyau vmesbih nyoshoq lyis jyet. Nyang gas Pharao dah lonyi lyis kyingh ma nghuot, Hiti vmesbih jens yahge Moab, Amon, Edom, Sidon vmesbih jens lyis eq yoeus toh.

²YHENSAIN ka Israel jens lyis, Haih gohnyau bang gas namoq lyis nyamoq dah mangso lhyi shwih paiq das nghuot gvng mas, haih gohnyau bang yah nyi yoeus yhenloh vkuot goh, ge dede taiq shet toh. Nghuot laus eq Solomon gas nyamoq lyis nyihwank.

³Nyang gas yhensain nyhiq hwankti lonyi jens nyhetxo, nyinhungh jens somhxo yuk yoh. Jyoengh nyang, nyamoq gas nyang lyis Mangso jyank masyah i loh nhang.

⁴Solomon mang loh lyis, nyah uwus Dawi teh YHENSAIN nyah Mangso lhyi kyingh lomsjingh das gungsthaiq, nyamoq gas nyah ehnyet lyis nyamoq dah mangso lhyi paiq das yvpheh thaiq tyamp.

⁵Solomon gas Sidon jens dah phvra nyih Astarte yahge Amon jens dah vchoqh vlhauq Molek phvra lyis paiq.

⁶Housoeh Solomon gas YHENSAIN dah nyoqlvtjvng mas ma gis zis kuot: nyah uwus Dawi teh YHENSAIN thang mha dyinghjet shoq chank das zis lyis he.

⁷Solomon gas Moab jens dah vchoqh vlhauq Khemosh phvra xiklyis, Amon jens dah vchoqh vlhauq Molek phvra xiklyis, Yerusalem buisthuq pheh joq dah boms mas nyhang dah joqyos mas yangh ci toh.

⁸Solomon gas nyah yhensain nyhiq gohnyau vmesbih jens dvnganhmoq xiklyis nyamoq dah mangso lhyi xangh ngheq dyei das zis yahge phudyei das xiklyis housoeh teh dah phon jens bat dyei.

⁹YHENSAIN ka Solomon lyis svsoh nhaiqyo, khasoeh ge lyis nyah ehnyet gas nyah jyank mas aiq lhain thuq xoeuq, YHENSAIN, Israel dah Mangso jyank mhayah phanh loh goeus.

¹⁰Nyang gas Solomon lyis gohtoeu mangso jens lyis vpaiq ge jyuk yang zaih nhang goeus, nghuot laus eq Solomon gas YHENSAIN dah tyingtoh dang lyis ma gyo yoeus.

¹¹Housoeh las gvshih, YHENSAIN Solomon lyis taiq zis gas, Nvng heisoeh kuot las ngos nvng yah chvp toh thanghchvp thang ma chank, ngah lyi lyis domsyos ma gyo yvmvyah ngos nah munghdan lyis jyoengh gvm las nah zau dvyuk lyis dyei das.

¹²Nghuot laus eq nah uwus Dawi gvng mas nah caiq mas ngos hauh yvlyis ma kuot das. Nah lo dah loq masyah gvm tyamp das.

¹³Nah munghdan dvkoeuq gonh lyis ma yoeus tyamp. Ngah jyeidwis Dawi yahge ngos khyen yoeus toh Yerusalem gvng mas ngos nah lo lyis dvkoq dyei das, ge.

¹⁴Housoeh las YHENSAIN ka Solomon lyis tyi das xiklyis Edom dius Hadad lyis jyonh kat. Nyang gas Edom hwankti vnyau nghuot.

¹⁵Lai loh goeus zvnlom nyoshoq lyis, Dawi gas Edom lyis zan ung. Nyah jeszau Yoab lyis jes mas gyoh dah Israel jens lyis nyhop das xiklyis Edom pheh nhang kat. Nyang yahge nyah dius jens houmha lhamhmuh khyuk khyvp ko nyeis uhlyis Edom yukgis dvnganh lhyi sat.

¹⁷Nghuot laus eq Hadad yahge nyah uwus dah jyeidwis, Edom dius jens dvyhamh gas Egutu pheh phang loh. Hauh uhlyis Hadad gas svsoh ngis loshang lo dvnghuot shih.

¹⁸Nyamoq gas Midian masyah cangh khoq las Paran pheh jweh loh. Nyang Paran mas dius dvyhamh nyang yah los xonh zis yah Pharao jyank mas e xauhgoh. Nyang nyamoq yah dvgeh Egutu mau pheh gyoh e lha hwankti jyank loh. Pharao gas nyamoq lyis yhen eq zonoms eq, maunyeis eq dyei.

¹⁹Hadad gas Pharao dah xikkhonh mas nyoqnho svsoh yoh las Pharao gas nyang lyis hwankti nyhiq Tapene dah vnoeuh sain yah nyihwank dyei.

²⁰Tapene dah vnoeuh gas nyah xiklyis Genubat ge dah loloeu dvyuk khoeu dyei. Hwankti nyhiq Tapene gas hauh lo lyis Pharao dah yhen mha nyhoeu kuh kat. Housoeh nyang gas hwankti yhen mha Pharao dah loloeu jens yah dvgeh kuh los.

²¹Gvshih Hadad gas Egutu masyah, Dawi shei goeus cho yahge jeszau Yoab eq shei goeus cho xauhgyo. Hauh uhlyis nyang Pharao lyis taiq zis gas, Ngos lyis ngvnyang mau pheh loh nhang aq, ge.

²²Pharao gas nyang lyis, Chamus lah? Ngos yah nyeis lyis nvng mas chah zis cha bos lah, ge nyei. Nyang gas, Chah zis ma bos. Nghuot laus eq ngos ngah mau pheh tauh loh chah, ge toeuh. Nyang nyah mau pheh tauh loh. Hadad gas Edom mau lyis guon las Israel jens lyis hoeng zis yah jes kuot.

²³Mangso ka Solomon lyis jes duot das xiklyis Eliada lo Rezon lyis yombos los nhang. Rezon gas nyah yhensain Zoba hwankti Hadadezer jyank masyah phang lha,

²⁴gomloeus dvphung dah uhshe soeu bweh los. (Haih cho ka Dawi gas Zoba hwankti Hadadezer lyis zan ung lha hauh hwankti dah Siria buisnoms lyis zan ung shishenh lyis nghuot.) Rezon yahge nyah dius jens gas Damasku pheh phang loh las houmha nyeis. Rezon gas Siria mau hwankti bweh los.

²⁵Rezon gas Solomon guon dah dvcaiq gonh Israel jens dah jeswus khoh nghuot las Hadad teh nyang eq Israel jens lyis chiqjyen cho dyei. Nyang gas Israel jens lyis gvgis hoeng las Siria mas guon nyeis.

²⁶Gomloeus toq uhshe soeu gohtoeu dvyuk gas Solomon nyah zau, Zereda wus mas dah Ephraim dius Nebat dah lo Yeroboam nghuot, nyah ungwes gas chauhmuh Zerua nghuot.

²⁷Hwankti lhyi nyang gomloeus toq cho ka heisoeh nghuot. Solomon gas Dawi dah wus buisthuq pheh tsoh nhangh nyeis zis yahge wusciank doms soq ci nyeis.

²⁸Yeroboam gas yombos thoeuqzoe nghuot. Nyang gas yom seq kat dah loyvm nghuot zis Solomon nyvng lyis nyang lyis Ephraim yahge Manase vkoq zwi chah muhchangh dvnganh thoq mas gungh nhang.

²⁹Dvnyeih Yeroboam Yerusalem wus masyah thuq loh nyeis lyis, Shilo wus mas dah lvpe Ahiya gas shanhzoe saiq wuot zis cho mha xauhgoh, pa mha nyah aiq yuk kyingh dvnghuot.

³⁰Ahiya gas nyah gungs mas dah shanhzoe saiq lyis dvci aiq khyamh chuiq tyamp.

³¹Housoeh nyang Yeroboam lyis taiq zis gas, Nvng hai dvci chuq yoeus aq. YHENSAIN, Israel Mangso heisoeh ge. Yoeuh aq, munghdan lyis Solomon loq masyah gvm yoeus las nvng lyis dvci koq dyei das.

³²Nghuot laus eq ngah jons Dawi xiklyis eq, Israel dvmau gonh mas ngos khyen yoeus toh Yerusalem wus xiklyis eq nyang gas Israel mas dvkoq xauh yoeus das.

³³Khasoeh ge lyis Solomon gas ngos lyis tyamp las Sidon gywes lonyi Astarte, Moab phvra Khemosh, Amon jens phvra Mikhom lyis paiq. Nyah uwus Dawi teh, ngah xikkhonh mas dan cho kuot das zis yahge ngah lyi yahge tyingtoh dang lyis ma chank.

³⁴Nghuot laus eq hwankti mau dvmau gonh ngos nyah loq masyah ma yoeus shih: khasoeh ge lyis ngos khyen yoeus las ngah tyingtoh dang yahge lyi lyis chank dah ngah jyeidwis Dawi xiklyis, ngos Solomon lyis guon soeu nyah dvcaiq kuot nhang.

³⁵Nghuot laus eq ngos hauh mau lyis nyah lo loq masyah nvng lyis dvci koq dyei das.

³⁶Ngos lyis paiq das xiklyis ngos khyen toh dah Yerusalem wus mas, ngah xikkhonh mas ngah jyeidwis dah vkoq gas vjangh guon nyeis das xiklyis ngos Solomon dah lo lyis dvkoq dyei das.

³⁷Ngos nvng lyis Israel hwankti kuot nhang das las nvng nah ehnyet omes khyvlyis dvmau gonh lyis guon das.

³⁸Nvng ngos taiq toh zis gyo las ngah jyeidwis Dawi teh ngah domsyos gyo las, ngos o khyvlyis kuot lyis ngos nvng yah dvgeh vjangh nyeis das. Nvng lyis Israel hwankti khyvlyis kuot toh thang lhyi Dawi dah nyei nyet xiklyis ngos kuot teh, nah nyei nyet jens eq nah thang mha jyoengh nyang hwankti duot das.

³⁹Nghuot laus eq Solomon dah yaunos gvng mas ngos Dawi dah vnyau lyis joeng das laus eq vcaiq vto ma nghuot, ge.

⁴⁰Solomon gas Yeroboam lyis sat das ge xo. Nghuot laus eq Yeroboam gas Egutu mau, Egutu hwankti Shishak jyank mas phang lha Solomon shei shoq Egutu mas nyeis.

⁴¹Solomon kuot cho nyet shih goeu dvnganh yahge nyah joeui dang gas Solomon dah Sungson Buk mas lhaih toh.

⁴²Solomon gas Yerusalem mas nyeis las Israel lyis guon zis nyeici zvn nghuot.

⁴³Solomon shei lhyi nyah uwus Dawi dah wus mas nyhop. Hauh thang lhyi nyah joqyos mas nyah lo Rehoboam guon.