Read Achang 1 HWANKTI 12 Bible Online

1 HWANKTI 12 - Achang bible

1 HWANKTI 12

¹Rehoboam gas Israel jens dvnganh nyang lyis hwankti toq das ge zain joq dah Shekhem pheh loh.

²Nebat lo Yeroboam gas Solomon masyah Egutu pheh e phang nyeis zis Solomon shei goeus cho xauhgyo lyis Egutu masyah tauh los.

³Israel uhshe bang gas Yeroboam lyis khi yoeus lha Israel moq dvphung gonh Rehoboam jyank mas los tsain taiq.

⁴Nyamoq taiq zis gas, Nah uwus gas than dah uhshe soeu nghuot khoq. Nah uwus ngamoq lyis huon khoq dah muhchangh lyis lwis nhang lha lyei dah khoengh lyis siq nhang aq, housoeh lyis ngamoq nvng lyis phuqsoe das, ge.

⁵Rehoboam nyamoq lyis taiq zis gas, Ngos hauh cho nghamh yoeuh das xiklyis somh nyeih shishenh dyei geh. Hauh thang lhyi ngos namoq lyis taiq das, ge. Housoeh las dius jens eq dyos loh.

⁶Hwankti Rehoboam gas nyah uwus Solomon kang dwis nyeis shih yoq lyis nyah xamchangh logis jens lyis xam lha nyei zis gas, Namoq joeui cha dyei das lah? Haih dius jens lyis ngos khasoeh phuk taiq das lah, ge.

⁷Nyang lyis nyamoq taiq zis gas, Nvng khvnyhik haih dius jens dah phuqsoe soeu duot las nyamoq o cho lhyi gyo dyei nghuot lyis, nyamoq gas vjangh yah lomluk shomeh las nah jyeidwis duot das, ge.

⁸Nghuot laus eq nyang gas logis jens nyang lyis dyei dah joeui lhyi peq tyamp las, hauh gungsthaiq nyang yah dvgyamh bang nghuot dah nyah joeui dyei bang lyis joeui nyei.

⁹Nyang nyamoq lyis nyei zis gas, Namoq ngos lyis joeui cha dyei das lah? Ngah uwus huon khoq dah yvwons lyis siq nhang aq ge sang nyeis dah dius jens lyis ngos khasoeh toeuh das lah, ge nyei.

¹⁰Loyvm jens nyang lyis taiq zis gas, Hauh lop nyeis bang lyis heisoeh oen aq: Ngah loqlogamhthang ka ngah uwus dah thyikdom thoq lyis zes kuh.

¹¹Ngah uwus gas namoq lyis lyei dah muhchangh huon, ngos namoq lyis hauh thoq mas lung shih das. Ngah uwus gas namoq lyis lvxuk yah xuk, ngos gas gungsgauh yah joeng das oen aq, ge.

¹²Hwankti sang toh zis yah dvyhangteh somh nyeih thang lhyi Yeroboam yahge dius jens dvnganh gas Rehoboam dah nghamh thyet cho lhyi los gyo yoeus.

¹³Nghuot laus eq Rehoboam gas nhaiq bos bang dyei dah joeui lyis peq tyamp las than than taiq.

¹⁴Wotyamh jens joeui dyei bang dyei dah joeui lhyi lhom yoeus. Ngah uwus gas namoq dah yvwons lyis lyei shoq huon, ngos namoq dah yvwons thoq mas lung das. Ngah uwus gas namoq lyis lvxuk yah xuk, ngos gas gungsgauh yah joeng das, ge.

¹⁵Housoeh hwankti ka dius jens dah dang ma gyo dyei: khasoeh ge lyis hauh cho ka YHENSAIN nyang Shilo dius lvpe Ahiya nhuot masyah Nebat dah lo Yeroboam lyis taiq toh dang doengs das xiklyis YHENSAIN jyank masyah thuq los cho nghuot.

¹⁶Gvshih hwankti ka nyamoq dah dang ma gyo dyei zis Israel dvnganhmoq sohseq lyis, nyamoq hwankti lhyi phuk taiq zis gas, Ngamoq gas Dawi mas chah gvmboms yoh lah? Yese dah lo yah vso ma bos, Israel jens gas, Vsainnyang yhen pheh tauh loh goh. Dawi eh, nah yhen lhyi yoeuh aq, ge. Housoeh Israel jens gas nyamoq nyang yhen pheh loh lo.

¹⁷Nghuot laus eq Rehoboam gas Yuda wus mas nyeis bang lyis guon nyeis.

¹⁸Hwankti Rehoboam gas moeng soq tamp das xiklyis uhkung jens lyis gungh soeu Adoram lyis nhang lhyi, Israel jens dvnganhmoq yah nyang lyis luk yah doeuh sat. Hauh loeus hwankti Rehoboam jyank jweh loh lyis, hwankti Rehoboam gas nyah jeslhyingh thoq mas lvnyap doq ji las Yerusalem pheh phang loh.

¹⁹Mautsung pheh nyeis Israel vnyau jens gas khvnyhik jweh shoq Dawi yhenbang[14] lyis tyi lha gomloeus toq.

²⁰Yeroboam Egutu mau masyah doms jweh los cho Israel jens xauhgyo lyis, nyamoq gas moqhuom khi tsainh lha Yeroboam lyis Israel dius dvnganh lyis guon dah hwankti toh. Housoeh lha Dawi dah yhenbang thang mha ka Yuda vnyau mas lai las hank ma chank.

²¹Rehoboam Yerusalem mas jweh lyis nyang gas Israel jens lyis zan las hwankti mau lyis nyang doms yoh yoeus shoq Yuda vnyau dvnganh yahge Benyamin vnyau mas jes thoeuqzoe dvsens xetmons tsainh.

²²Nghuot laus eq Mangso ka Mangso dah dius Shemaia lyis yah taiq zis gas,

²³Solomon lo Yuda hwankti Rehoboam, Yuda vnyau yahge Benyamin vnyau dvnganh lyis taiq aq.

²⁴YHENSAIN heisoeh ge: Namoq dah boekyis lyis zan das oen vdoq loh goh. Haih zis gas ngos kuot zis nghuot yvmvyah namoq hank eq hank nyang yhen pheh tauh loh geh, ge. Housoeh yvmvyah nyamoq YHENSAIN dang gyo las, YHENSAIN dah dang yah dvyhangteh tauh loh.

²⁵Hauh thang lhyi Yeroboam gas, Ephraim boms mas Shekhem wus kuot las houmha nyeis. Hauh wus gas nyah dah wuszains bweh los. Hauh thang lhyi nyang Penuel wus eq loh kuot.

²⁶Yeroboam nyah nhaiqlom mas taiq zo zis gas, Ngos ma zaih lhyi ka haih hwankti mau gas Dawi yhenbang jyank mas doms jweh loh mvbeh.

²⁷Dius jens gas YHENSAIN dah Yhenmuh mas phudyei das ge Yerusalem mas tsoq loh nyeis lyis gas, nyamoq dah nhaiqlom gas, nyamoq yhensain Yuda hwankti Rehoboam shot phanh loh zis yah ngos lyis sat las nyamoq gas Yuda hwankti shot pheh tauh loh das, ge.

²⁸Hwankti ka housoeh nghamh thang lhyi, xing noeulu lo aiq doeu kuot las dius jens lyis taiq zis gas, Namoq Yerusalem mas loh paiq zis nyangh los goeus. Israel jens eh, haih zis gas namoq lyis Egutu masyah shwih los dah phvra nghuot, ge.

²⁹Nyang gas hauh yvlyis Bethel mas dvdoeu, Dan mas dvdoeu toh.

³⁰Dius jens gas noeu lho lhyi paiq das zis Bethel yahge Dan mas loh zis yah yaunos tsain kuot.

³¹Yeroboam gas nyhang dah joqyos mas eq phvra yhen kuot las, phudyei muh wons dah Lewi vkoq ma nghuot dah dius jens lyis phudyei muh wons nhang toh.

³²Yeroboam gas xet vkhyvp dvci oeng vnyeih lyis Yuda mau mas zvng pwe kuot teh pwe yoq toh las kuot, phon mha lomhxangh lainh. Bethel mha nyang kuot dah noeulho jens lyis nyang lomhxangh lainh. Bethel mha nyang kuot toh, nyhang joqyos mas paiq das xiklyis phudyei bang lyis toh.

³³Housoeh Yeroboam gas nyah ehnyet kyingh chank las toeuq toh buisnyeis xet vkhyvp, dvci oeng vnyeih lyis, Bethel mas nyang kuot toh dah phon mha phudyei cho kuot. Nyang Israel jens xiklyis pwe toh las xangh ngheq nhamp das ge, hauh phon pheh loh.