Read Achang 1 HWANKTI 13 Bible Online

1 HWANKTI 13 - Achang bible

1 HWANKTI 13

¹Mangso dah dius dvyuk YHENSAIN dah vmingh yah dvyhangteh, Yuda mau masyah Bethel wus mas loh las Yeroboam xangh ngheq das ge phon nvm mas yap joq uhlyis houmha jweh los.

²YHENSAIN dang yah dvyhangteh nyang phon lhyi tyi lha kaiq zis gas, Phon eh, phon eh, YHENSAIN heisoeh ge: Dawi hwankti vkoq mas Yosia ge dah loshang dvyuk khoeu los das. Nyang gas nah thoq mas xangh los ngheq dah nyhang joqyos mas phudyei kuot bang lyis nah thoq mas thauh sat das, cangsoeu dius dah shohyau lyis nah thoq mas ngheq das, ge.

³Hauh nyeih lyis Mangso dah dius vlho yah chixoeuq las taiq zis gas, Phon gwi las hauh phon thoq mas dah nyiyvp dyaus gyoh das. Houlhyi nvng gas YHENSAIN ka ngos lyis yah taiq zis lyis seq das, ge.

⁴Mangso dah dius Bethel mha phon lhyi tyi lha taiq dang Yeroboam xauhgyo lyis, nyah loq Mangso dius lyis tuonh las taiq zis gas, Nyang lyis nyhik geh, ge. Hauh uhlyis nyang, nyah loq tuonh kat zis ma doms yoh kuih lo.

⁵YHENSAIN dang yah Mangso dah dius chixoeuq dah vlho yah dvyhangteh, phon eq gwi las nyiyvp eq phon mhayah dyaus tyamp.

⁶Hwankti Mangso dah dius lyis taiq zis gas, Ngah loq yhoh dyei das xiklyis nvng ngah nyhenshang shvmanh dung las nah YHENSAIN xikkhonh mas bos shangphu aq, ge. Mangso dius gas YHENSAIN lhyi dung las hwankti dah loq xikpheh teh doms gis los.

⁷Hwankti Mangso dah dius lyis taiq zis gas, Ngos yah yhen mha loh las zonoms zo goh, ngos nvng lyis phauh shangh das, ge.

⁸Nghuot laus eq Mangso dah dius hwankti lhyi taiq zis gas, Nvng ngos lyis nvng yoh zis dvgohyih dyei laus eq ngos nvng yah ma loh, haih joqyos mas ohlhyoq ma zo, jeis eq ma shuk.

⁹YHENSAIN dah dang ngos lyis vmingh dyei zis gas, Nvng ohlhyoq vzo, jeis vshuk, vkhang los yvcho eq vtauh loh ge toh, ge.

¹⁰Housoeh las nyang Bethel mha los yvcho ma nghuot, gohcho yah tauh loh.

¹¹Hauh yoq lyis Bethel wus mas lvpe lokhoq dvyuk nyeis. Nyah lo jens gas hauh nyeih lyis Bethel mha Yuda masyah los Mangso dah dius kuot cho dvnganh los taiq kyoh. Nyang hwankti lyis taiq dah dang eq nyamoq dah uwus lyis taiq kyoh.

¹²Hauh lvpe lokhoq nyamoq lyis nyei zis gas, Nyang khacho yah tauh loh, ge. Housoeh nyamoq gas nyamoq dah uwus lyis Mangso dah dius tauh loh cho khat lyis tuonh shet.

¹³Lokhoq taiq zis gas, Ngah xiklyis mauhlyihzoe anhzoe kih dyei aq, ge. Housoeh nyamoq gas nyah xiklyis mauhlyihzoe anhzoe dye kih lyis,

¹⁴nyang Mangso dah dius lyis chank khat las, nyang lyis lvshvp zains khyei mha tsung toh yvlyis nyvng. Lvpe lokhoq nyang lyis nyei zis gas, Nvng Yuda mau masyah los dah Mangso dah dius vnghuot lah, ge. Nyang gas, Nghuot, ge.

¹⁵Housoeh nyang Mangso dah dius lyis taiq zis gas, Ngos yah yhen mha loh las wom zo goh, ge.

¹⁶Nyang toeuh zis gas, Ngos nvng yah ma yoh tauh loh, heimha ngos nvng yah ohlhyoq ma gis zo, jeis eq ma gis shuk, ge.

¹⁷Khasoeh ge lyis YHENSAIN dah dang gas, Nvng houmha ohlhyoq vzo, jeis vshuk, nvng loh yvcho yah eq ma yoh doms tauh los, ge toh.

¹⁸Nghuot laus eq lvpe lokhoq taiq zis gas, Ngos eq nvng teh lvpe nghuot. Loeuswons soeu dvyuk YHENSAIN dah dang ngos lyis los tying toh zis gas: Nyang lyis nah yhen pheh shwih loh las wom gvmtsoh aq, jeis eq gvmshuk aq, ge. Nghuot laus eq lvpe lokhoq gas nyang lyis dvhwah nyeis.

¹⁹Housoeh nyah aiq yuk dvgeh loh las Mangso dah dius gas lvpe yhen mha wom zo, jeis shuk.

²⁰Nyah aiq yuk kihgus mas tsung uhlyis YHENSAIN dah dang gas lvpe lokhoq jyank mas jweh los.

²¹Nyang gas Yuda mau masyah los, Mangso dah dius lyis kaiq las taiq zis gas, YHENSAIN heisoeh ge: Nvng YHENSAIN dah dang lyis domsyos ma gyo, YHENSAIN, nah Mangso taiq toh, tyingtoh dang lyis ma chank.

²²Nvng gas YHENSAIN vzo, vshuk ge dah joqyos mas tauh loh las wom zo, jeis shuk yvmvyah, nah mvng gas nah phauh thyeih moq dah lop mas xauh nyhop das zis ma nghuot, ge.

²³Gvshih Mangso dah dius wom zo jeis shuk thang lhyi, hauh lvpe ka nyah mauhlyihzoe lyis nyah xiklyis shauq dyei,

²⁴las Mangso dah dius gas gyung doms suh loh. Nghuot laus eq nyang gyung suh loh nyeis lyis khangkhyi dvdoeu thuq los las nyang lyis sat. Nyah mvng gas cho mha joq, mauhlyihzoe yahge khangkhyi eq mvng nvm mas yap joq.

²⁵Houmha dius lai loh lyis cho mha mvng joq zis yahge hauh vnvm mas khangkhyi yap joq zis lyis nyvng. Nyamoq gas lvpe lokhoq nyeis dah wus mas loh tsain wvng taiq kyoh.

²⁶Lvpe lokhoq hauh zis xauhgyo lyis nyang taiq zis gas, Hauh zis gas Mangso dah dang lyis domsyos ma gyo dah Mangso dius nghuot. YHENSAIN ka nyang lyis khangkhyi lhyi yah ngat sat nhang zis yah nyah dang lyis nyuk los nhang, ge.

²⁷Hauh thang lhyi lvpe nyah lo jens lyis taiq zis gas, Ngos lyis mauhlyihzoe shauq dyei geh, ge. Nyamoq eq shauq dyei.

²⁸Housoeh nyang loh lyis cho mha joq dah mvng eq, mauhlyihzoe yahge khangkhyi ka hauh vyvm mas yap joq yvlyis eq nyvng. Khangkhyi ka mvng lyis ma zo, mauhlyihzoe lyis eq ma ngat.

²⁹Housoeh las lvpe ka mvng baih las nyhop das xiklyis Mangso dius dah mvng lyis mauhlyihzoe mas yoeus thuq las wus pheh tauh los.

³⁰Nyang gas hauh mvng lyis nyah lop mas toh las, nyah xiklyis shoh zis yah, Ngah vnoeuh bih eh, ge kaiq ngaus.

³¹Nyang lyis dye nyhop thang lhyi lvpe nyah lo jens lyis taiq zis gas, Ngos shei lhyi ngos lyis hau Mangso dius nyhop dah lop mas nyhop aq, ngah shohyau lyis nyah shohyau yvm mas toh aq.

³²Khasoeh ge lyis, Bethel mas joq dah phon lhyi eq, Samari mau mas nyhang dah jing mas dah phvra yhen jens lhyi eq tyi lha, YHENSAIN nyang lyis taiq hoeuh nhang dah loeusdang gas jyoengh nyuk los das, ge.

³³Nghuot laus eq hauh cho bweh thang lhyi yangh, Yeroboam gas nyah ma gis muh kuot masyah ma tauh los. Nyang gas phudyei vnyau ma nghuot soeu lyis phudyei soeu khyvlyis khyen toh. Hank laus eq mes bweh soeu ka phvra yhen dah phudyei soeu gis bweh.

³⁴Haih cho ka Yeroboam dah hwankti munghdan dyoqbis das zis yahge nyah yhen dius dvnganh shei das dah yaunos zainsmuh bweh los.