Read Achang 1 HWANKTI 14 Bible Online

1 HWANKTI 14 - Achang bible

1 HWANKTI 14

¹Hauh yoq lyis Yeroboam lo Abiya nos los.

²Housoeh Yeroboam nyah yhensain nyhiq lyis taiq zis gas, Toq aq, nvng Yeroboam dah yhensain nyhiq nghuot zis hank ma seq shoq dyimis thaiq las Shilo wus mas loh aq. Ngos lyis haih Israel jens dah hwankti bweh das ge taiq dah lvpe Ahiya houmha nyeis.

³Ohlhyoq dvci, khik dvtsiq, dyoyhei dvjywang chi lha nyah jyank mas loh aq. Loshang khasoeh bweh das cho nyang lyis nyei aq, nyang taiq kyoh das, ge.

⁴Yeroboam dah yhensain nyhiq eq housoeh kuot las Shilo wus pheh Ahiya dah yhen mha loh. Ahiya gas nyenhkyi bos goeus las nyoq gos goeus.

⁵YHENSAIN Ahiya lyis taiq zis gas, Yeroboam dah yhensain nyhiq gas nyah lo nos las, nvng lyis hauh loshang cho nyei das ge, nah jyank mas los nyeis. Nyang gas gohyuk vmesbih guons kuot las los das las, nvng gas nyang lyis ngos taiq kyoh zis lyis taiq aq, ge.

⁶Nyang khomh cho yah wvng los las khyei svp sam Ahiya xauhgyo lyis nyang taiq zis gas, Yeroboam dah yhensain nyhiq eh, wvng los aq. Nvng chamus gohyuk guons kuot? Ngos nah xiklyis loeus gang wons toh.

⁷Yeroboam lyis taiq aq: YHENSAIN, Israel Mangso heisoeh ge: Ngos nvng lyis dius jens masyah khyen las, ngah vnyau Israel thoq mas guon soeu kuot nhang.

⁸Dawi yhenbang masyah munghdan yoeus las nvng lyis dyei toh. Nghuot laus eq nvng gas ngah jyeidwis Dawi teh ma nghuot. Nyang gas ngos taiq toh dang chank kuot. Ngah xikkhonh mas jus cho kyingh kuot das ge las nyah nhaiqlom mas bos las chank kuot.

⁹Nvng gas nah xik mas guon bang dvnganh thoq lyis zes shoq yaunos kuot. Ngos nhaiqyo shoq nvng gohtoeu phvra kuot, gungslho kuot las ngos lyis nah nungsthank pheh tyamp.

¹⁰Ngos nah hwankti vkoq lyis shanghsenh cho chi los dyei das las, nah lo jens, nah jons jens yahge jons ma nghuot bang dvnganh lyis sat das. Dius gas mhotkhyot lyis shank shoq ngheq tyamp teh ngos nah hwankti vkoq lyis ngheq tyamp das.

¹¹Yeroboam dah yhenbang wus mas shei lhyi lvkhuih zo das, pa mha shei lhyi lvngda yah chweh zo das. Hauh cho YHENSAIN taiq goeus.

¹²Lholha Ahiya gas Yeroboam dah yhensain nyhiq lyis tsoq las taiq zis gas, Nvng nvnyang yhen pheh loh lo aq. Nvng wus mas wvng yah dvyih loshang shei das.

¹³Israel jens dvnganh nyang lyis shei uhngauh las nyhop das. Yeroboam yhenbang mas nyang kyingh nyhop zis xauh das: khasoeh ge lyis Yeroboam yhenbang dvnganh mas haih loshang lyis kyingh YHENSAIN, Israel Mangso gis zis nyvng.

¹⁴Hauh thoq lyis YHENSAIN ka Yeroboam dah hwankti vkoq lyis dom nhang das hwankti dvyuk lyis Israel mau masyah thuq los nhang das.[15]

¹⁵Jvmbu lyis jeis yah bat lhwih teh, YHENSAIN ka Israel jens lyis bat das las, nyamoq gas YHENSAIN nhaiqyo shoq gywes nyhiq Ashera gungslho lhyi tsain paiq yvmvyah, Israel phauh thyeih moq lyis dyei toh, hau gis dah munghdan masyah nyamoq lyis yoeus tyamp las Uphrat lvng lai shoq sanh tyamp das.

¹⁶Yeroboam gas nyang cu lha, Israel jens lyis cu nhang dah yaunos gvng mas YHENSAIN ka Israel jens lyis tyamp das, ge.

¹⁷Yeroboam dah yhensain nyhiq gas Tirza pheh tauh loh. Nyang yhen khomh tank mas jweh yah dvyih loshang shei goeus.

¹⁸YHENSAIN nyah jyeidwis lvpe Ahiya lyis yah taiq dah dang yah dvyhangteh, Israel jens dvnganh nyah xiklyis shei uhngauh las nyang lyis nyhop.

¹⁹Yeroboam guon yoq lyis bweh cho, jeszan cho dvnganh yahge khasoeh guon cho, nyet shih zis lyis Israel hwankti jens dah mvnyei maussauh mas lhaih toh.

²⁰Yeroboam guon khoq zis aiqci aiq zvn nghuot. Nyang shei thang lhyi nyah lo Nadab gas nyah gungsthaiq hwankti bweh.

²¹Solomon lo Rehoboam gas Yuda mau mas guon. Rehoboam gas nyang hwankti bweh los uhlyis nyeici dvzvn bos goeus. Nyang gas YHENSAIN ka nyang lyis paiq das xiklyis Israel mau dvnganh masyah khyen toh dah Yerusalem wus mas dvci nyhet zvn guon. Nyah ungwes gas Amon lonyi Nama nghuot.

²²Rehoboam guon yoq lyis, Yuda jens gas YHENSAIN dah nyoqlvtjvng mas nyamoq dah phauh thyeih dvnganhmoq thoq lyis yaunos kuot las nyang lyis nhaiqyo nhang.

²³Nyamoq gas nyhang dah jing khanghmuh, saiq nyaus zains khanghmuh mas phvra yhen jens tsuk, gyingshang zains jens yahge Ashera gungslho jens lyis cuk toh.

²⁴Phvra lyis paiq joqyos mas nghe phoq nghe nyhiq eq hauh dvmau gonh mas nyeis. Dius jens gas YHENSAIN ka Israel jens dah xik mas hauh mau masyah khat tyamp goeus dah gohnyau bang dah vchoqh vjyot cho dvnganh tsain chank kuot.

²⁵Rehoboam hwankti kuot dah oeng vzvn lyis Egutu hwankti Shishak gas Yerusalem lyis los doq zan.

²⁶Nyang gas YHENSAIN Yhenmuh mas dah zisyos, hwankti yhen mha dah zisyos yahge Solomon kuot toh dah xing gos eq cheq dvnganh yoeus loh.

²⁷Hwankti Rehoboam gas hauh gungsthaiq thunk gos kuot las, hwankti yhen mha khomh zungh bang dah zau jens lyis kyauh toh.

²⁸Hwankti ka YHENSAIN Yhenmuh mas e khanghmuh zungh bang gas hauh zis lyis chi e lha, zungh dah yvp mas los doms toh toh kuot.

²⁹Rehoboam dah kuot cho nyet shih goeu yahge nyang kuot cho dvnganh Yuda hwankti Sungson mha lhaih toh.

³⁰Rehoboam yahge Yeroboam gas nyah aiq yuk dah caiq thank shoq vjangh yah jeszan goh.

³¹Rehoboam shei lha Dawi dah wus mas nyah phauh thyeih moq yah dvgeh nyhop zis xauh. Nyah ungwes gas Amon lonyi Nama nghuot. Nyah lo Abiya gas nyah joqyos mas hwankti guon khoq.