Read Achang 1 HWANKTI 15 Bible Online

1 HWANKTI 15 - Achang bible

1 HWANKTI 15

¹Abiya gas Israel mas Nebat lo hwankti Yeroboam guon zis dvci xet vzvn lyis Yuda hwankti bweh los.

²Nyang gas Yerusalem mas somh zvn guon. Nyah ungwes nyings gas Abishalom dah lo Makha nghuot.

³Abiya gas nyah uwus kuot dah yaunos dvnganh lyis chank kuot. Nyah vthyeih Dawi dah ehnyet teh ma nghuot, nyang gas YHENSAIN nyah Mangso dah xikkhonh mas lomluk cho ma bos.

⁴Nghuot laus eq YHENSAIN nyah Mangso ka Dawi gvng mas nyah thang mha nyah lo lyis Yerusalem mas hwankti toh las hauh wus mas Dawi dah hwankti vkoq lyis doengs joq nhang.

⁵Khasoeh ge lyis Dawi gas Hiti dius Uria dah soe mhayah lai las dvcaiq yah YHENSAIN tyingtoh dang lyis domsyos gyo las YHENSAIN nhaiqdoeus khyvlyis kyingh kuot.

⁶Rehoboam yahge Yeroboam jo mas jes zan-goh cho ka tsoq las Abiya dvcaiq gonh zan-goh.

⁷Abiya zwi loh cho nyet shih goeu yahge nyang kuot cho dvnganh Yuda hwankti jens mvnyei buk mas lhaih toh. Abiya yahge Yeroboam jo mas eq vjangh jes bos.

⁸Abiya gas shei lha nyang lyis Dawi dah wus mas nyhop. Nyah joqyos mas nyah lo Asa guon.

⁹Asa ka Yeroboam Israel hwankti kuot zis aiqci vzvn lyis Yuda hwankti bweh los.

¹⁰Nyang gas Yerusalem mas nyeici dvzvn guon. Nyah vyos gas Abishalom dah lo Makha nghuot.

¹¹Asa ka nyah phauh thyeih Dawi kuot teh YHENSAIN dah xikkhonh mas jus khyvlyis kuot.

¹²Nyang gas phvra paiq dah joqyos mas nghe phoq nghe nyhiq kuot nyeis bang lyis hauh mau masyah khat tyamp. Nyah phauh thyeih moq kuot toh dah phvra jens lyis shang tyamp.

¹³Nyah vyos Makha ka vchoqh vjyot Ashera gungslho kuot yvmvyah, nyang lyis eq hwankti ungwes joqyos masyah khyoq tyamp. Asa ka hau gungslho lhyi khyauh las Kidron langhkhau mha ngheq.

¹⁴Phvra yhen jens lyis shank shoq ma yoeus tyamp laus eq, Asa ka nyah caiq thank shoq YHENSAIN lhyi lomluk.

¹⁵Nyah uwus dyei toh zisyos, nyang dyei zisyos ngwis xing kyahsoe jens lyis eq YHENSAIN dah Yhenmuh khau mas chi los.

¹⁶Yuda hwankti Asa yahge Israel hwankti Basha jo mas nyah aiq yuk dah caiq gonh vjangh jes zan-goh.

¹⁷Yuda hwankti Asa jyank thuq wvng hank ma yoh kuot bas jungh ge, Israel hwankti Basha ka Yuda mau mas loh zan las Rama wus lyis jes thoenk zan das wus kuot.

¹⁸Hauh uhlyis Asa ka YHENSAIN Yhenmuh ziskwi yahge Hwankti yhen ziskwi mha nyet joq dah ngwis, xing dvnganh yoeus las, Damasku mas guon nyeis, Siria hwankti, Hezion nyeilo, Tabrimon lo Benhadad lyis loh dyei das xiklyis nyah zau jens loq mas kyauh kat las haih loeusdang tying kat.

¹⁹Ngah uwus yahge nah uwus jo mas buisnoms joq khoq teh, ngos yahge nah jo mas buisnoms toh goh. Yoeuh aq, ngos nvng lyis ngwis yahge xing jyungshuk huon kat. Israel hwankti Basha ngah jyank masyah thuq bas jungh, nvng nyang yah toh dah buisnoms kuot cho loh thyet aq, ge.

²⁰Housoeh Benhadad gas hwankti Asa dah dang gyo las, nyah jeszau jens lyis Israel wus pheh nhang kat. Nyamoq gas Ijon, Dan, Abel Bet Makha joqyos, Khinaret yahge Napthali joqyos dvnganh lyis zan yoeus.

²¹Basha hauh loeus xauhgyo lyis, nyang Rama wus lyis jes thoenk zan das wus kuot dah muh lyis toh khoq las Tirza pheh loh.

²²Hauh thang lhyi hwankti Asa ka Yuda mau gonh dang kyoh kat. Hank eq ma luiq, yuk khanghmuh lyis Rama mas Basha tsain toh dah luk yahge saiq lyis yoeus nhang. Hauh saiq luk yah, hwankti Asa ka Benyamin mau mas bos Geba wus yahge Mizpa wus lyis jes thoenk zan das wus kuot.

²³Asa dah muhzoh nyet shih zis, nyah yomsoq, nyang kuot cho dvnganh, nyang kuot toh wus jens cho dvnganh Yuda hwankti Sungson mha lhaih toh. Nghuot laus eq nyang mang loh lyis nyah khyei mha nos dap.

²⁴Hauh thang lhyi Asa ka shei lhyi Dawi dah wus hwankti lop mas nyhop zis xauh. Nyah lo Yehoshaphat gas nyah gungsthaiq hwankti xauh kuot.

²⁵Yuda hwankti Asa guon dah aiq vzvn lyis Yeroboam lo Nadab gas Israel dah hwankti bweh los las aiq zvn guon.

²⁶Nyang gas YHENSAIN dah nyoqlvtjvng mas ma gis zis kuot, nyah uwus chank dah cho, Israel jens lyis yaunos kuot nhang dah silho paiq cho mha chank suh.

²⁷Isakha vnyau mas Ahiya dah lo Basha ka nyang lyis tyixo. Nadab yahge Israel jens dvnganh Philisti mau Gibethon wus lyis lhaink toh uhlyis Basha ka Nadab lyis sat.

²⁸Hauh cho ka Yuda hwankti Asa guon zis somh vzvn lyis bweh. Housoeh las Basha ka Nadab dah gungsthaiq Israel hwankti bweh los.

²⁹Hauh uhlyis nyang, Basha ka Yeroboam yhenbang dvnganh lyis sat. Housoeh lyis YHENSAIN ka Shilo wus mas dah lvpe Ahiya lyis yah Yeroboam yah sen dah dangthoengh toh zis yah dvyhangteh hwankti yhenbang dvyuk eq ma nyet lo.

³⁰Khasoeh ge lyis Yeroboam gas nyang kuot dah yaunos yahge Israel jens lyis shuot nhang dah yaunos gas YHENSAIN, Israel dah Mangso lhyi nhaiqyo nhang.

³¹Nadab dah muh nyet shih goeu dvnganh Israel hwankti Sungson mha lhaih toh ma nghuot lhyeh?

³²Asa yahge Israel hwankti Basha jo mas nyah aiq yuk caiq thank shoq jes bos.

³³Yuda hwankti Asa hwankti guon dah somh vzvn lyis Ahiya dah lo Basha gas Tirza mas Israel hwankti doq las aiqci nyei zvn guon.

³⁴Nghuot laus eq nyang gas YHENSAIN dah nyoqlvtjvng mas ma gis zis kuot las Yeroboam suh dah cho, Israel jens lyis shwih cu dah silho paiq cho lhyi tsoq las kuot loh nyeis.