Read Achang 1 HWANKTI 16 Bible Online

1 HWANKTI 16 - Achang bible

1 HWANKTI 16

¹Hanani lo lvpe Yehu jyank mas hwankti Basha xiklyis YHENSAIN dang jweh los zis gas:

²Ngos nvng lyis tsohmop masyah toq yoeus las ngah vnyau Israel thoq mas guon soeu kuot nhang toh laus eq nvng gas Yeroboam dah ma gis cho mha chank suh las ngah vnyau Israel lyis yaunos kuot nhang lha nyamoq dah yaunos gvng mas ngos lyis nhaiqyo nhang.

³Housoeh las ngos Nebat lo Yeroboam dah vnyau vshih lyis mhont teh nvng yahge nah yhenbang lyis mhont das.

⁴Basha yhenbang hank laus eq wus mas shei lhyi lvkhuih zo das, pa mha shei lhyi lvngda yah chweh zo das, ge.

⁵Basha dah muh nyet shih goeu yahge nyang kuot cho, nyah womh cho dvnganh lyis Israel hwankti jens dah mvnyei buk mas lhaih toh.

⁶Basha shei lha Tirza wus mas nyhop zis xauh. Nyah gungsthaiq nyah lo Ela hwankti duot.

⁷Haih Basha yahge nyah yhenbang lyis tyi dah YHENSAIN loeusdang gas, Hanani lo lvpe Yehu jyank masyah jweh los. Basha ka Yeroboam yhenbang kuot teh, nyah yaunos kuot zis yah YHENSAIN lhyi nhaiqyo nhang lha YHENSAIN dah nyoqlvtjvng mas ma gis zis kuot gvng mas eq, nyang Yeroboam yhenbang lyis mhont tyamp gvng mas eq hauh loeusdang jweh los zis nghuot.

⁸Yuda hwankti Asa guon zis aiqci khyuk vzvn lyis Basha lo Ela gas Tirza mas nyeis las Israel dvnganh lyis guon dah hwankti bweh los. Nyang gas Israel mau lyis aiq zvn guon khoq.

⁹Hauh thang lhyi hwankti jes lhyingh dvgohyih lyis guon zau, Zimri gas nyang lyis sat das zis sont. Dvnyeih Tirza mas, Ela gas hwankti yhen ziszom Arza dah yhen mha shuk yet nyeis.

¹⁰Zimri gas nyang lyis wvng sat. Haih zis gas Yuda hwankti Asa guon zis aiqci nyhet vzvn lyis bweh los. Zimri gas Ela gungsthaiq hwankti bweh los.

¹¹Hauh uhlyis nyang, Zimri gas Basha hwankti yhenbang dvnganh lyis, yukgis lo dvyuk lyis eq ma nyhet toh lo shoq sat. Nyang gas nyah buisnoms sainhchangh mas vbusbih dvyuk eq ma nyhet toh lo.

¹²Housoeh YHENSAIN ka lvpe Yehu lhyi yah dangthoengh toh zis yah dvyhangteh, Zimri gas Basha hwankti vkoq dvnganh lyis mhont.

¹³Khasoeh oen lhyi Basha yahge nyah lo Ela dah yaunos gvng mas eq, nyah phvtang Israel lhyi yaunos kuot nhang gvng mas eq, Basha yahge nyah lo Ela gas YHENSAIN, Israel dah Mangso lhyi nhaiqyo nhang.

¹⁴Ela dah muh nyet shih goeu yahge nyang kuot cho dvnganh gas Israel hwankti Sungson mha lhaih toh.

¹⁵Yuda hwankti Asa guon zis aiqci nyhet vzvn lyis Zimri gas Tirza mas nyhet nyeih guon khoq. Philisti mau mas dah Gibethon wus lyis lhaink toh dah Israel thoenkgus jesdvp gas,

¹⁶Zimri ka gomloeus toq zis yah hwankti lhyi sat goeus cho xauhgyo lyis nyamoq dvnganh gas nyamoq thoeng nyeis yvmas hauh nyeih lyis nyamoq dah jeszau Omri lyis Israel hwankti toq.

¹⁷Omri yahge nyang yah dvgeh nghuot dah Israel jens gas Gibethon masyah doq loh las Tirza wus lyis loh lhaink.

¹⁸Housoeh hauh wus lyis yoeus loh goeus cho Zimri nyvng lyis nyang gas hwankti yhen vkhau goeng toenk thoenkgus jesdvp mas wvng las hwankti yhen lhyi ngheq kat zis yah nyi ngeh shei.

¹⁹Khasoeh ge lyis nyang eq YHENSAIN dah nyoqlvtjvng mas ma gis cho kuot las xikpheh Yeroboam chank cho, Israel lyis phvra shwih paiq cho chank suh.

²⁰Zimri dah muh nyet shih goeu yahge nyang gomloeus toq cho ka Israel hwankti jens dah mvnyei buk mas lhaih toh.

²¹Housoeh Israel dius jens gas aiq phung gyoh tyamp. Dvgohyih gas Ginat lo Tibni lyis hwankti toh. Gohtoeu dvgohyih gas Omri thang chank.

²²Omri thang chank bang gas Ginat dah lo Tibni thang chank bang lyis ung tyamp. Housoeh Tibni gas sat zis xauh las Omri hwankti bweh los.

²³Yuda hwankti Asa guon zis somhci das vzvn lyis Omri gas Israel dah hwankti bweh los las dvci aiq zvn guon khoq. Nyang Tirza mas khyuk zvn guon.

²⁴Nyang gas Shemer jyank masyah ngwis aiq talent dyei las Samari jing wis. Nyang hauh jing thoq mas wus kuot las, jing sain dah nyings yoeus las hauh wus lyis Shemer ge lui.

²⁵Omri gas YHENSAIN lhyi tyi lha nyah xikpheh dah hwankti jens dvnganh thoq lyis yaunos zes kuot.

²⁶Nyang gas Nebat lo Yeroboam kuot teh nyah yaunos, Israel jens lyis yaunos shwih kuot cho yahge phvra shwih paiq zis yah YHENSAIN, Israel Mangso lhyi nhaiqyo nhang.

²⁷Omri kuot dah muh nyet shih goeu yahge nyang kuot nyuk khoq cho ka Israel Hwankti Sungson mha lhaih toh.

²⁸Omri shei lha Samari mas nyhop zis xauh. Nyah gungsthaiq nyah lo Ahab hwankti duot.

²⁹Yuda hwankti Asa guon zis somhci xet vzvn lyis Omri lo Ahab gas Samari mas Israel hwankti bweh los las aiqci aiq zvn guon khoq.

³⁰Omri lo Ahab gas nyah xikpheh bang dvnganh thoq lyis, YHENSAIN dah nyoqlvtjvng mas ma gis zis kuot.

³¹Nyang gas Nebat lo Yeroboam dah yaunos mha chank suh zis ma tham shih las Sidon hwankti Etba lonyi Yezebel lyis yoeus las Bala lyis phuqsoe lha paiq.

³²Nyang gas Samari wus mas Bala yhenmuh dvyhen tsuk toh las hauh vkhau mha Bala xiklyis phon dvkoeuq ci toh.

³³Ahab gas Ashera gywes nyhiq lyis paiq das nyhenshang gungslho zains cuk toh. Nyang gas xikpheh dah Israel hwankti jens dvnganh thoq lyis zes shoq YHENSAIN, Israel Mangso lhyi nhaiqyo nhang.

³⁴Ahab zaih lyis Bethel dius Hiel gas Yerikho wus doms kuot toh. YHENSAIN ka Nun dah lo Yoshua nhuot masyah taiq toh zis yah dvyhangteh, nyang yhenpom ci loh lyis nyah lomons Ahiram shei lha, nyang wus doms yoh tyeh kuot las wus khomh kuot loh lyis nyah lothank Segub shei.