Read Achang 1 HWANKTI 18 Bible Online

1 HWANKTI 18 - Achang bible

1 HWANKTI 18

¹Mau kyuk zis somh vzvn dah lhamhmuh nyoshoq lai loh lyis YHENSAIN dah dang Eliya jyank mas jweh los zis gas, Loh aq, nah gungs Ahab lyis chixoeuq aq, ngos nyeisjvng mas mau wus nhang das oen taiq aq, ge.

²Housoeh las Eliya gas nyah gungs Ahab lyis chixoeuq das ge loh. Hauh uhlyis Samari mas phanghkhauq svsoh changh nyeis.

³Housoeh las Ahab gas hwankti yhen guon zau Obadia lyis khi. (Obadia gas YHENSAIN lhyi svsoh gyukwoms soeu nghuot.)

⁴Yezebel gas YHENSAIN dah lvpe jens dvnganh lyis sat yenh uhlyis Obadia gas lvpe dvxo lhyi shwih las lukkhyung dvkoeuq mas oengci ci shung lha ohlhyoq yahge jeis dyei las nyhoeu ku.

⁵Ahab Obadia lyis taiq zis gas, Yang mau gonh mas jeisthuq dwang yahge jeislvng bos ya bos yvmas loh goh. Nyang eq luzoe eq ma shei, nyamoq dah kang ma shei ma dyuk bas jungh mhanh joq lyis joq das, ge.

⁶Housoeh las nyah aiq yuk gas hauh mau mas loh yoeuh das nyhenshang gvm las Ahab dvcho, Obadia dvcho loh.

⁷Gvshih Obadia nyah cho loh nyeis lyis Eliya yah thungh xauhgoh. Nyang gas Eliya lyis seq yoeuh las paiq zis yah taiq zis gas, Nvng ngah yhensain Eliya nghuot lhyeh, ge.

⁸Nyang taiq zis gas, Ngos nghuot. Nah yhensain hwankti lhyi, Eliya heimha nyeis oen, loh taiq aq, ge.

⁹Obadia toeuh zis gas, Nah jons lyis sat das nyhenshang Ahab dah loq mas kyauh das zis gas ngos cha kuot goeus au?

¹⁰Kang dwis YHENSAIN, nah Mangso mha, nvng lyis xo das xiklyis ngah yhensain hwankti ma nhang dah mau, dius nyau dvkoeuq eq ma bos lo. Mau khanghmuh, dius nyau khanghmuh, Nyang heimha ma nyeis ge lyis, nvng lyis ma nyvng cho, nyang lyis maukhi nhang toh.

¹¹Gvshih gas nvng ngos lyis, Eliya heimha nyeis oen, nah yhensain lhyi loh taiq aq, ge.

¹²Ngos nah jyank masyah thuq loh lyis YHENSAIN dah Dyos gas nvng lyis ngos ma seq dah joqyos pheh shwih loh das. Housoeh ngos Ahab lyis loh taiq las nyang nvng lyis xo ma nyvng lyis, nyang ngos lyis sat das. Ngos gas loyvm yoq lyis yah YHENSAIN dah jyoeng jyeidwis nghuot cho lhyi seq aq.

¹³Yezebel gas YHENSAIN dah lvpe jens lyis sat yenh uhlyis, ngos YHENSAIN dah lvpe jens dvxo lhyi oengci ci lukkhyung mha shung lha nyamoq lyis ohlhyoq yahge jeis dyei las nyhoeu zis nvng lyis hank ma taiq kyoh lhyeh?

¹⁴Gvshih nvng ngos lyis, Eliya heimha nyeis oen lha nah yhensain lhyi loh taiq aq, ge lyis gas, Ngos loh taiq lyis nyang ngos lyis jyoengh sat das, ge.

¹⁵Eliya toeuh zis gas, Ngos phuqsoe nyeis, Yomzains YHENSAIN nyang nyeis zis yah dvyhangteh, ngos khvnyhik nyah jyank mas jyoengh thuq xoeuq das, ge.

¹⁶Housoeh las Obadia gas Ahab lyis loh xauhgoh las taiq. Ahab gas Eliya yah e xauhgoh.

¹⁷Ahab Eliya lyis nyvng las nyang lyis taiq zis gas, Israel lyis lhoq yau soeu eh, nvng nghuot lhyeh, ge.

¹⁸Nyang phuk taiq zis gas, Ngos Israel lyis ma lhoq yau, nvng yahge nah uwus yhenbang dvlhoq yau, YHENSAIN tyingtoh dang lyis tyamp las namoq Bala silho lhyi paiq nyeis.

¹⁹Gvshih nvng Israel dius dvnganh, Yezebel pangh nyeis dah Bala lvpe nyeixo oengci yahge Ashera lvpe jens nyeixo lhyi Khamel boms, ngah jyank mas khi tsainh los aq, ge.

²⁰Housoeh las Ahab gas Khamel boms mas Israel jens dvnganh, yahge Bala lvpe jens khi tsainh los.

²¹Eliya gas dius jens dvnganhmoq jyank mas los las taiq zis gas, Namoq gas khanyhank nyangh lyis yoh nghamh thyet das lah? YHENSAIN ka Mangso nghuot lyis gas nyah thang chank geh; Bala dvnghuot lyis eq nyah thang mas chank loh geh, ge. Nghuot laus eq dius jens gas dvkhonh eq ma phuk taiq.

²²Eliya dius jens lyis taiq zis gas, YHENSAIN dah lvpe ka ngos dvyuk kyingh dvnyet lo; nghuot laus eq Bala lvpe jens gas nyeixo oengci yuk nghuot.

²³Noeujungs lu aiq doeu she los geh. Bala lvpe jens dvdoeu yoeus las hauh zis vdoeus doeus khyoq las thangh thoq mas kih bas jungh, nghuot laus eq hauh vjeis mas nyi vkat. Ngos eq noeu gohtoeu dvdoeu lyis hau yah dvyhangteh kuot das.

²⁴Namoq Bala lvpe jens gas namoq dah mangso lhyi vkyuh dung geh. Ngos gas YHENSAIN jyank vkyuh dung das. Nyi nhang kat zis yah phuk taiq dah soeu ka Mangso nghuot, ge. Housoeh las dius jens dvnganhmoq phuk taiq zis gas, Hauh dang gas gis, ge.

²⁵Hauh thang lhyi Eliya gas Bala lvpe jens lyis taiq zis gas, Namoq gas dius nyo las namoq shih noeulu dvdoeu khyen lha ba geh. Namoq dah mangso lhyi vkyuh dung geh, nghuot laus eq thangh mas nyi vkat, ge.

²⁶Housoeh las nyamoq gas nyamoq lyis dyei dah noeulu yoeus las tsain sont zis yah Bala nyings lyis nvpsangh lyis yah nyeih gungs jweh shoq, Bala eh, ngamoq lyis gyo dyei aq, ge tsain lui. Housoeh nyamoq gas nyamoq kuot dah phon yvmlhaink goh. Nghuot laus eq chah thwe eq ma thuq los, hank ma phuk taiq.

²⁷Nyeih gungs lyis Eliya nyamoq lyis jwangh zoh lyis taiq zis gas, Than than kaiq geh; nyang mangso nghuot! Nyang nghamh yoeuh nyeis, nghuot ya, nghe loh nyeis lah, nghuot ya nyang gyung suh loh, nghuot ya nyang yhet joq, nhauh chah mvbeh, ge.

²⁸Housoeh nyamoq gas zes kaiq las vkyuh dung, nyamoq thungh yah dvyhangteh, nyamoq nyang gungs lyis suih thuq shoq sham lham yah tsain lhyamh.

²⁹Buis gam las nyenhthang phudyei shishenh jweh shoq kaiq hoeu. Nghuot laus eq chah thwe ma bos, hank eq ma phuk taiq, hank ma yoeuh dyei.

³⁰Hauh thang lhyi Eliya dius jens dvnganh lyis taiq zis gas, Ngah jyank mas ni ni los geh, ge. Housoeh las dius jens gas nyah jyank mas ni loh. Nyang gas gyop gyoh goeus dah Mangso phon lhyi soq.

³¹Nah nyings Israel nghuot chah ge YHENSAIN yah nyings dyei zis xauh dah Yakop lo jens sonzoh khyvlyis luk dvci aiq lom yoeus.

³²Nyang hauh zis yah YHENSAIN dah nyings mas phon ci. Hauh yvmlhaink yah jyo nyau aiq luh ko wvng dah khyohlang doeu.

³³Thangh lyis zungs lho lha noeu lyis vdoeus doeus khyoq las thangh thoq mas kih las nyang taiq zis gas, Auh nyei lom mas jeis tyink las ngheq phudyei lomhxangh mas eq, thangh lyis eq huot taiqh geh, ge.

³⁴Nyang taiq zis gas, aiq vlhain kuot geh, ge. Nyamoq eq aiq vlhain kuot. Tsai, nyang taiq zis gas, Somh vlhain kuot geh, ge. Nyamoq eq somh vlhain kuot.

³⁵Housoeh las jeis gas phon yvmlhaink yah yaus loh; hau khyohlang mas eq jeis tyink toh.

³⁶Nyenhthang phudyei shishenh lyis lvpe Eliya phon nvm mas los las taiq zis gas, Abraham, Isak, Yakop dah YHENSAIN Mangso eh, nvng gas Israel dah Mangso nghuot cho lhyi eq, ngos gas nah jons nghuot las nah dang yah dvyhangteh kuot cho lhyi eq chixoeuq aq.

³⁷Nvng gas YHENSAIN Mangso nghuot zis lyis eq, nvng nyamoq dah nhaiqlom lyis lhain los nhang cho lhyi eq nyamoq yoh seq bas jungh, YHENSAIN eh! ngos taiq dang gyo dyei aq, jenh gyo dyei aq, ge.

³⁸Housoeh YHENSAIN dah nyi gyoh los las ngheq phudyei jyungshuk, thangh eq luk eq tsoh eq jom tyamp; khyohlang mas dah jeis lyis eq lyoq tyamp.

³⁹Dius jens hauh yvlyis nyvng lyis nyamoq dah nyoqnho gop las taiq zis gas, YHENSAIN ka Mangso nghuot, YHENSAIN kyingh Mangso nghuot, ge.

⁴⁰Housoeh Eliya nyamoq lyis taiq zis gas, Bala lvpe jens lyis nyhik geh, dvyuk eq vluiq nhang goh, ge zis yah dvyhangteh, nyamoq lyis nyhik las Eliya gas Kishon lvng mas shwih e lha houmha sat.

⁴¹Hauh thang lhyi Eliya Ahab lyis taiq zis gas, Doq loh las zo shuk aq. Mau gis wus das thwe bos, ge.

⁴²Ahab gas zo shuk das zis toq loh. Eliya gas Khamel boms thyoh mas doq loh las nyeisjvng jweh shoq paiq las nyah nyoqnho ka nyah phvlukchvp jo mas kat toh.

⁴³Nyang nyah jyeidwis lyis taiq zis gas, Gvshih doq loh las thomh pheh yoeuh kat aq, ge. Housoeh nyang doq loh las thomh pheh yoeuh kat las taiq zis gas, Cha ma joq, ge. Eliya gas, Doms doq loh aq, ge nyhet lhain taiq.

⁴⁴Nyhet vlhain lhyi nyang taiq zis gas, Thomh masyah dius dah loqtsop iq ngis dah jyommauh toq los, ge. Eliya gas nyah jyeidwis lyis, Mau yah nvng lyis ma kyoq shih lyis nah lhyingh sont las gyoh loh aq, oen Ahab lyis loh taiq aq, ge.

⁴⁵Ma nyangh lyis maukhung ka lyeis lyeis mau mau noq los las mau muh jyang wus los,

⁴⁶YHENSAIN dah yomsoq gas Eliya thoq mas jweh los: nyang gas dyichih chih las Ahab dah xik pheh Yezrel wus pheh wuih loh.