Read Achang 1 HWANKTI 19 Bible Online

1 HWANKTI 19 - Achang bible

1 HWANKTI 19

¹Ahab gas Eliya kuot cho dvnganh, Bala dah lvpe jens dvnganh lyis sham yah khasoeh sat cho Yezebel lyis taiq kyoh.

²Yezebel gas Eliya jyank mas loeuskyoh soeu nhang lha taiq zis gas, Nvpyo gvshih shvhoeu lhyi ngos nah kang lhyi lvpe jens dah kang lhyi teh ma kuot lyis gas mangso jens ngos lyis hauh thoq lyis kuot bas jungh, ge.

³Eliya hauh zis seq lyis, nyah kang xiklyis Yuda mau, Besheba wus pheh nyah jyeidwis yah dvgeh loh.

⁴Nyang gas mhanhdyvp gyung dvnyeih loh las ratam zains[16] khyei mha jweh las tsung toh. Housoeh nyang shei bas jungh ge shvmanh dung zis gas, Geh goeus YHENSAIN eh, gvshih ngah kang lhyi yoeus tyamp dyei lo aq, ngos ngah phauh thyeih moq thoq lyis gis soeu ma nghuot, ge.

⁵Housoeh nyang ratam zains khyei mha lains yhet lyis, loeuswons dvyuk nyang lyis nyetlos nyettant los tanh las taiq zis gas, Toq las zo aq, ge.

⁶Nyang yoeuh kat lyis, nyah uhloms yvm mas nyi mas kank dah ohlhyoq yahge jeis dvthuk joq. Nyang hauh zis zo shuk las doms yhet.

⁷YHENSAIN dah loeuswons aiq vlhain nyang lyis los tanh las taiq zis gas, Nah xiklyis gyung gas svsoh xing yvmvyah, toq las zo aq, ge.

⁸Housoeh las nyang toq zo shuk. Nyang hauh wom dah yom yah Mangso dah boms ge, Horeb boms jweh shoq nyeici nyeih nyeici nyens loh.

⁹Nyang lukkhyung dvkoeuq mas nyenh lyis wvng yhet. YHENSAIN ka nyang lyis nyetlos nyettant taiq, Eliya, nvng heimha cha kuot nyeis, ge.

¹⁰Nyang toeuh zis gas, Ngos gas Maukhung Jesphung YHENSAIN Mangso shot pheh nhaiq kank wvng. Khasoeh ge lyis Israel jens gas nah thanghchvp lyis tyamp, nah phon jens lyis thyoq tyamp, nah lvpe jens lyis eq moengsa yah sat. Ngos kyingh dvnyet lo. Gvshih nyamoq ngos lyis sat das ge xo nyeis, ge.

¹¹YHENSAIN nyang lyis taiq zis gas, Thuq las ngah xikkhonh boms thoq mas yap joq aq, ge. Lholhyi YHENSAIN lai loh las svsoh than dah lyeis gas boms chink, luk lyis khwih loh laus eq YHENSAIN ka hauh lyeis mas ma bos. Lyeis dah thang lhyi maunyeis dwis los, nghuot laus eq YHENSAIN ka hau maunyeis dwis yvmas ma bos.

¹²Maunyeis dwis thang lhyi nyi los, nghuot laus eq YHENSAIN ka houmha ma bos, nyi dah thang mha sam sam ge dah thwe los.

¹³Hauh yvlyis Eliya xauhgyo lyis nyah nyoqnho lhyi mis[17] yah nghop las luk-uk khomh mas thuq yap joq. Hauh uhlyis nyah jyank mas thwe dvkoeuq nyetlos nyettant taiq los zis gas, Eliya eh, Nvng heimha cha kuot nyeis, ge.

¹⁴Nyang toeuh zis gas, Ngos gas Maukhung Jesphung YHENSAIN Mangso shot pheh nhaiq kank wvng. Nghuot laus eq Israel jens gas nah thanghchvp lyis tyamp, nah phon jens lyis thyoq, nah lvpe jens lyis moengsa yah sat las ngos kyingh dvnyet lo. Nyamoq gas ngos lyis sat das ge tsain xo nyeis, ge.

¹⁵YHENSAIN nyang lyis taiq zis gas, Nvng los yvchank tauh loh aq. Damasku mhanhdyvp jweh lyis wus vkhau mha wvng las Hazael lyis Siria hwankti khyvlyis coeu huot dyei aq.

¹⁶Nimshi lo Yehu lyis eq Israel hwankti khyvlyis coeu huot dyei aq. Nah joqyos mas lvpe duot das xiklyis Abel Mehola wus mas Shaphat lo Elisha lyis coeu juot dyei aq, ge.

¹⁷Housoeh Hazael dah sham yah luiq soeu lhyi Yehu sat das. Yehu dah sham yah luiq soeu lhyi Elisha sat das.

¹⁸Nghuot laus eq Bala lyis ma paiq, nyah gungslho lhyi bvlot ma tanh dah Israel dius nyhet khyoengh lyis ngos toh toh das, ge.

¹⁹Eliya hou mhayah loh lyis noeu dvphung yah yosphuk nyeis dah Elisha lyis loh nyvng; dvci aiq kya yah yos phuk nyeis yvmas Elisha gas thang thank vkya yah phuk nyeis. Eliya gas nyah mis khyuot las Elisha lyis doeuh kih dyei.

²⁰Housoeh nyang gas noeu lyis toh khoq las Eliya thang mha chank wuih las taiq zis gas, Ngah ungwes uwus lyis loh jeshuh khoq nhang aq. Hauh thang lhyi ngos nah thang mha chank das, ge. Eliya toeuh zis gas, Gis goeus. Loh aq, ngos nvng lyis ma tomp, ge.

²¹Elisha eq nyah jyank masyah yosphuk changh jens jyank loh las nyah noeu dvkya sat, yos phuk kyahsoe lhyi thangh kuot las jyauq lho lha dius jens lyis tsoh lyis nyamoq zo. Hauh thang lhyi nyang toq las Eliya thang mha chank las nyang lyis phuqsoe.