Read Achang 1 HWANKTI 2 Bible Online

1 HWANKTI 2 - Achang bible

1 HWANKTI 2

¹Dawi gas shei das buisnyeis ni los lyis nyah lo Solomon lyis dyensmhoq zis gas,

²Dvnyeih lyis nyeisjvng cangsoeu yuk khanghmuh loh chah dah yvpheh ngos loh bah oen goeus. Housoeh las yomhuont aq, yukgis nghuot cho kyink aq.

³Nvng loh cho yahge nvng kuot muh dvnganh ung shoq Moshe dah lyi mas lhaih toh zis yah dvyhangteh, YHENSAIN, nah Mangso taiq toh cho lhyi soh las, nyah cho chank, nyah lyi, nyang taiq toh dang, soetuon cho, nyah kanghjyoeng dang lyis chank aq.

⁴Namoq housoeh kuot nyeis lyis gas YHENSAIN ngos lyis dyei dah dangthoengh lyis jyoeng nhang das. Hauh dangthoengh gas: nah vnyau vshih jens zaih zis yah jyoeng cho chank las vsainnyang nhaiqlom yahge dyos dvnganh yah, ngah xikkhonh mas suh e nyeis lyis Israel dah hwankti tank mas nyamoq mas dvyuk vjangh tsung das, ge.

⁵Hauh thoq lyis Zeruia lo Yoab ngos lyis kuot cho nvng seq. Nyang gas Ner lo Abna yahge Yethura lo Amasa ge Israel jeszau zainsmuh aiq yuk lyis sat. Moengzan uhlyis bweh goeus dius shei cho lhyi lvto phuk khyvlyis nyenstap uhlyis nyang nyah aiq yuk lyis khasoeh sat zis nvng soh. Nyang yobos ma bos vzomh[1] lyis sat gvng mas gvshih ngos yvwons bos zis yahge hauh vtsoq ngos[2] khamzo.

⁶Housoeh las nvng joeui bos zis yah dvyhangteh nyang lyis lvto phuk aq. Nyang lyis uhthyoeu las nyenstap zis yah lop mas vgyoh nhang.

⁷Nghuot laus eq Gilead dius Barzilai lo jens lyis jyehjuh chixoeuq las nyamoq lyis yoeuh aq. Nah vmang Absalom gvng mas ngos phang uhlyis nyamoq ngos lyis nhaiq bos.

⁸Tsai yoeuh aq, ngos Mahanaim pheh gyoh e nyeih lyis ma gis thank dang yah ngos lyis los nhoengh, Bahurim wus mas dah Benyamin vnyau Gera dah lo Shimei eq nvng yah nyeis. Nyang gas Yodan lvng yvm mas ngos lyis lyih zes yvmvyah, Ngos nvng lyis moengsa yah ma sat das oen YHENSAIN mha ngos nyang lyis maukhi toh.

⁹Nvng joeui bos soeu nghuot yvmvyah hauh soeu yobos ma bos oen vnghamh. Nyang lyis nvng lvto khasoeh phuk das zis nvng seq. Nyah cam thyoeu lhyi shei mau mas suih yah gyoh loh nhang aq, ge.

¹⁰Housoeh Dawi shei lha, nyang lyis Dawi dah wus mas nyhop.

¹¹Dawi Israel jens lyis guon dah shishenh gas nyeici zvn nghuot. Hebron mas guon zis nyhet zvn, Yerusalem mas guon zis somhci somh zvn nghuot.

¹²Housoeh Solomon gas nyah uwus Dawi dah hwankti tank mas tsung lha nyah munghdan gas goeng joq.

¹³Gvshih Hagit lo Adoniya gas Solomon dah ungwes Batsheba jyank e. Batsheba nyei zis gas, Nvng nyenstap cho khyvlyis los lah, ge. Adoniya gas, Nyenstap cho khyvlyis nghuot, ge toeuh.

¹⁴Nyang tsoq taiq shih zis gas, Ngos nvng lyis dvja dung das zis los, ge. Batsheba gas, Chah cho gah, ge nyei.

¹⁵Nyang taiq zis gas, Munghdan gas ngah zis nghuot, Israel jens dvnganh eq ngos guon das zis ngah shot pheh xoeu goeus yvlyis nvng seq. Nghuot laus eq munghdan gas thaiq las ngah vnoeuh zis nghuot loh. Houka YHENSAIN dah ehnyet nghuot.

¹⁶Gvshih ngos nvng lyis dvja sang bah vjenh he, ge. Nyang gas, Taiq aq, ge.

¹⁷Housoeh nyang taiq zis gas, Hwankti Solomon gas Shunem mas dah lonyi Abishag lyis ngos lyis dyeizo aq, oen jenh bos taiq aq, hwankti ka nvng lyis ma he das, ge.

¹⁸Housoeh las Batsheba taiq, Gis, hwankti lhyi nah nyhenshang taiq dyei das, ge.

¹⁹Housoeh yvmvyah Batsheba gas Adoniya nyhenshang taiq das zis hwankti Solomon jyank mas e. Housoeh hwankti ka nyang lyis zes das zis toq yap las paiq lho lha hwankti tank mas doms tsung, nyang gas nyah ungwes xiklyis hwankti tank dvng los nhang lha nyah ungwes gas nyah loqyos shot pheh tsung.

²⁰Nyang taiq zis gas, Cho mhauhlo dvkoeuq ngos nvng lyis sang bah, vjenh he, ge. Hwankti ka, Ungwes eh, sang aq ngos ma he das zis nvng seq, ge.

²¹Housoeh las Batsheba gas, Nah vmang Adoniya lyis Abishag dyeizo aq, ge.

²²Hwankti Solomon nyah ungwes lyis phuk taiq zis gas, Gvshih nvng Adoniya xiklyis Abishag chamus sang? Nyang gas ngah vmang nghuot las nyah xiklyis munghdan eq sang aq, phudyei Abiatha yahge Zeruia lo Yoab gas nyah shot nghuot, ge.

²³Housoeh hwankti Solomon YHENSAIN mha maukhi zis gas, Adoniya nyah kang som das xiklyis haih dang ma taiq jyoeng lhyi ka, Mangso ngos lyis hauh thoq lyis kuot bas jungh.

²⁴Ngos lyis goeng toenk nhang lha ngah uwus Dawi dah hwankti tank mas tsung nhang das ge dangthoengh toh zis yah dvyhangteh, ngos lyis joqyos dyei dah YHENSAIN nyang nyeis zis yah dvyhangteh, khvnyhik Adoniya xauh shei das, ge.

²⁵Housoeh las hwankti Solomon gas Yehoiada lo Benaia lyis nhang lha Adoniya lyis sat las nyang shei.

²⁶Hwankti phudyei Abiatha lhyi taiq zis gas, Nvnyang wus nghuot dah Anathot wus mas loh aq. Nvng gas shei mon laus eq, haq lhain ngos nvng lyis ma sat: khasoeh ge lyis nvng ngah uwus Dawi dah xikkhonh mas YHENSAIN Mangso dah kwi dvng goeus. Ngah uwus shanghsenh khanghmuh nvng bos shanghsenh goeus, ge.

²⁷Housoeh las YHENSAIN ka Shilo wus mas Eli vnyau vshih yah sen dah dang nyuk los bas jungh ge, Solomon gas Abiatha lyis YHENSAIN dah phudyei muh masyah khyoq tyamp.

²⁸Hauh loeus gas Yoab jyank jweh loh: khasoeh ge lyis nyang gas Absalom thang mha ma chank laus eq Adoniya thang mha chank goeus las YHENSAIN dah zvng pheh phang lha phon mha dah khyau jens mas zwi toh.

²⁹Yoab gas YHENSAIN dah zvng mas phang lha phon nvm mas nyeis cho hwankti Solomon lyis tsain taiq kyoh los. Housoeh Solomon Yehoiada lo Benaia lyis nhang lha taiq, Nyang lyis e sat aq, ge.

³⁰Housoeh Benaia gas YHENSAIN dah zvng mas e lha nyang lyis taiq zis gas, Hwankti taiq lyis, Thuq los aq ge, ge. Nyang gas, Ma los, ngos heimha shei das, ge. Housoeh las Benaia ka hwankti jyank tauh loh las Yoab taiq zis loh taiq kyoh.

³¹Hwankti nyang lyis taiq zis gas, Nyang taiq vgus kuot aq: nyang yobos ma bos dah suih huot zis gas ngos yahge ngah uwus yhenbang masyah thyuk tyamp das xiklyis, nyang lyis sat las nyhop aq.

³²Nyang gas nyah thoq lyis zes dan las zes gis dah Israel jeszau Ner lo Abna yahge Yetha lo Amasa aiq yuk lyis moengsa yah sat. Hauh zis ngah uwus Dawi ma seq yvmvyah YHENSAIN ka hauh suih lyis nyah uhloms thoq mas tauh dyei das.

³³Nyamoq dah suih gas Yoab dah uhloms mas, lo jens dah uhloms thoq mas vcaiq caiq joq bas jungh. Dawi yahge nyah lo jens, nyah yhen, nyah hwankti tank thoq mas nyenstap zis gas YHENSAIN jyank masyah vcaiq caiq joq bas jungh, ge.

³⁴Housoeh Yehoiada lo Benaia gyingshang zvng pheh doms loh las Yoab lyis sat las mhanhdyvp nyah yhen mha nyhop.

³⁵Hwankti ka Yoab dah joqyos mas Yehoiada lo Benaia lyis jeszau toh. Abiatha dah joqyos mas gas phudyei Zadok lyis toh.

³⁶Hauh thang lhyi hwankti ka Shimei lyis khi lha taiq zis gas, Nvng Yerusalem mas yhen dvkoeuq kuot las houmha nyeis aq. Nvng hou mhayah khalhye eq vthuq loh.

³⁷Nvng thuq las Kidron lvng goeu nyeih lyis nvng jyoengh shei das zis seq toh aq: nah suih gas nah uhloms thoq mas nghuot bas jungh, ge.

³⁸Shimei hwankti lhyi taiq zis gas, Taiq dang gas gis, ngah yhensain hwankti taiq zis yah dvyhangteh ngos kuot das, ge. Housoeh Shimei gas Yerusalem mas nyangh nyangh nyeis.

³⁹Somh zvn lai thang lhyi Shimei dah jons aiq yuk gas Gat hwankti Makha dah lo Akhish jyank mas phang wvng loh. Shimei nyah jons 2 yuk khamha nyeis zis seq lyis,

⁴⁰Shimei toq las nyah mauhlyihzoe anhzoe kih las nyah jons tang xo das xiklyis Gat mas dah Akhish jyank mas loh. Housoeh Shimei gas Gat masyah nyah jons tang lyis Yerusalem pheh shwih los.

⁴¹Shimei gas Yerusalem masyah Gat wus mas jweh khoq goeus ge Solomon lyis taiq kyoh los.

⁴²Housoeh las hwankti ka Shimei lyis khi lha taiq zis gas, Nvng khalhye thuq gyoh loh lyis hau thuq nyeih lyis nvng jyoengh shei das zis seq toh aq oen YHENSAIN mha ngos nvng lyis maukhi toh ma nghuot lhyeh? Nvng eq ngos lyis, Hauh dang gis ge rhen goeus ma nghuot lhyeh?

⁴³YHENSAIN mha maukhi dang yahge ngos nvng lyis taiq toh dang lyis chamus ma chank, ge.

⁴⁴Hauh thoq lyis hwankti Shimei lyis taiq zis gas, Nah nhaiqlom mas lhung cho dvnganh, nvng ngah uwus Dawi lyis chixoeuq zis nvnyang seq: housoeh yvmvyah YHENSAIN ka hauh cho dvnganh nah uhloms mas tauh dyei das, ge.

⁴⁵Hwankti Solomon gas shvmanh yoh das las Dawi dah hwankti tank gas YHENSAIN xikkhonh mas vcaiq vto goeng joq das, ge.

⁴⁶Housoeh hwankti ka Yehoiada lo Benaia lyis taiq kat lyis nyang thuq loh las Shimei lyis sat. Housoeh hauh munghdan gas Solomon loq mas doengs joq.