Read Achang 1 HWANKTI 21 Bible Online

1 HWANKTI 21 - Achang bible

1 HWANKTI 21

¹Yezrel wus mas hwankti Ahab dah hwankti yhen nvm mas Nabot ge soeu dah zvbiq dvkhyam bos.

²Dvnyeih Ahab Nabot lyis taiq zis gas, Nah zvbiq khyam ka ngah hwankti yhen nvm mas joq yvmvyah ngos khyam kuot das zis ngos lyis dyei aq, ngos nvng lyis hauh thoq lyis zes gis dah khyam dyei das, nghuot ya, nvng o lhyi ka hauh phauh ngwis dyei das, ge.

³Nabot Ahab lyis taiq zis gas, Ngah phauh thyeih moq jyank masyah yoh toh dah maunyeis vso nvng lyis dyei das cho ka YHENSAIN tomp toh bas jungh, ge.

⁴Phauh thyeih moq dah maunyeis vso lhyi ma gis dyei ge dah Nabot dang gvng mas Ahab gas ehnyet ma tap las nyah yhen mha loh las wom ma zo, jung mas tyoyvm pheh xoeu lha lhain toh.

⁵Nyah yhensain nyhiq Yezebel gas nyah jyank mas los las, Nvng wom ma zo lo shoq chamus ehnyet nyo nyeis lah, ge.

⁶Housoeh las Ahab nyang lyis taiq zis gas, Ngos Yezrel dius Nabot lyis, Nah zvbiq khyam ngos lyis ungh dyei aq, nghuot ya nvng nhaiqdoeus lyis gas, hauh xiklyis gohtoeu zvbiq dvkham dyei das oen lhyi, nyang phuk taiq zis gas, Ngos nvng lyis ngah zvbiq khyam ma yoh dyei, ge.

⁷Nyah yhensain nyhiq Yezebel nyang lyis taiq zis gas, Nvng Israel hwankti ma nghuot lhyeh? Toq las ehnyet pyo pyo yah wom zo aq. Yezrel dius Nabot dah zvbiq khyam ngos nvng lyis dyei bah, ge.

⁸Housoeh las nyang gas Ahab dah nyings masyah maussauh lhaih, nyah kyihau tap las Nabot nyeis dah wus mas nyeis dah logis jens yahge nyoqnho ngelang bos bang lyis huon.

⁹Nyang hau maussauh mas lhaih zis gas, Womkyi las vkyuh dung das xiklyis dius jens lyis khi aq. Lholha Nabot lyis nyoqnho ngelang bos joqyos mas tsung nhang aq.

¹⁰Dius lhung aiq yuk lyis shwih las Nabot yah twi twi tsung nhang aq. Nyah aiq yuk gas Nabot lyis, Nvng gas Mangso lhyi eq, hwankti lhyi eq nhoengh, ge tyi lha zau kauq nhang aq. Hauh thang lhyi nyang shei bas jungh, nghe pheh shwih thuq las luk yah doeuh geh, ge.

¹¹Housoeh las hauh wus mas nyeis dah logis jens yahge nyoqnho ngelang bos bang gas Yezebel nyamoq jyank mas lhaih kat dah maussauh yah dvyhangteh kuot.

¹²Nyamoq womkyi shishenh kyoh kat, dius jens lyis tsainh las Nabot lyis dius jens thoq lyis zes dah joqyos mas tsung nhang.

¹³Housoeh dius aiq yuk nyah xikkhonh mas los tsung lha, Nabot xik mas nyang lyis tyi lha zau kauq zis gas, Nabot gas Mangso lhyi eq hwankti lyis eq nhoengh, ge. Hauh thang lhyi nyamoq gas nyang lyis wus nghe pheh shwih thuq las luk yah tsain doeuh sat.

¹⁴Hauh loeus Yezebel lyis kyoh kat: Nabot gas luk yah doeuh zis xauh las shei goeus, ge.

¹⁵Yezebel gas hauh loeus xauhgyo yah dvyih Ahab lyis taiq zis gas, Nabot ma nyeis lo, shei goeus. Nyang nvng lyis ma ungh dyei dah zvbiq khyam lhyi gvshih loh sain yoeus aq, ge.

¹⁶Hauh uhlyis nyang, Ahab gas Nabot dah zvbiq khyam e sain yoeus das xiklyis toq loh.

¹⁷Hauh thang lhyi YHENSAIN ka Tishbe mas dah lvpe Eliya lyis taiq zis gas,

¹⁸Samari mas dah Israel hwankti Ahab gas Yezrel mas gyoh loh goeus, nvng nyang yah e xauhgoh aq. Nyang gas Nabot dah zvbiq khyam sain yoeus das ge gyoh loh goeus.

¹⁹Nvng nyang lyis heisoeh oen taiq aq: YHENSAIN heisoeh ge. Nvng dius sat las nyah zisyos lyis eq sain yoeus lah? Nvng nyang lyis taiq aq, YHENSAIN heisoeh ge, Nabot dah suih lyis lvkhuih lyoq dah joqyos mas nah suih lyis eq lvkhuih lyoq das, ge.

²⁰Ahab Eliya lyis taiq zis gas, Ngah jeswus eh, nvng ngos lyis nyvng goeus lhyeh, ge. Eliya phuk taiq zis gas, Nvng gas YHENSAIN dah nyoqlvtjvng mas yaunos dvnganh kuot goeus yvmvyah, ngos nvng lyis xo nyvng goeus.

²¹Housoeh las YHENSAIN taiq zis gas, Ngos nah thoq mas shanghsenh cho nhang lha nvng lyis shank shoq shenh tyamp das las, nah yhenbang mas dah vbusbih, loyvm, lokhoq dvnganh thyet tyamp das.

²²Ngos lyis nhaiqyo nhang dah yobos, Israel lyis yaunos kuot nhang dah yobos gvng mas ngos nah yhen lhyi Nebat lo Yeroboam dah yhenbang yahge Ahiya lo Basha dah yhenbang lyis teh kuot das.

²³Yezebel yah sen lha YHENSAIN taiq zis gas, Yezrel wusciank yvm mas Yezebel lyis lvkhuih jens yah zo das.

²⁴Ahab yah sen bang hank laus eq wus vkhau mas shei lhyi lvkhuih zo das, pa mha shei lhyi lvngda zo das, ge.

²⁵Ahab yah doeus soeu dvyuk eq ma bos, nyah yhensain nyhiq Yezebel yah jyamh kat yvmvyah YHENSAIN nyoqlvtjvng mas muh lhung kuot das ge yaunos dvnganh kuot dah Ahab teh doeus zis hank eq ma bos.

²⁶Israel jens xikkhonh masyah YHENSAIN khat tyamp dah Amori jens chank kuot dah silho paiq cho, vchoqh vjyot cho nyang dvnganh chank kuot.

²⁷Eliya dye taiq thang lhyi, Ahab gas nyah dyimis lang chuiq las yanghthung dyi wuot. Nyang wom ma zo, yanghthung mha yhet zis yah gvgis kuk nyeis.

²⁸YHENSAIN Tishbe dius Eliya lyis taiq zis gas,

²⁹Ahab gas ngah xikkhonh mas ehnyet khasoeh khyoq nyeis zis lyis nvng nyvng. Nyang ngah xikkhonh mas ehnyet khyoq yvmvyah haih shanghsenh cho ngos nyah caiq mas ma nghuot, nyah lo caiq mas nyah yhenbang thoq mas thuq los nhang das, ge.