Read Achang 1 HWANKTI 22 Bible Online

1 HWANKTI 22 - Achang bible

1 HWANKTI 22

¹Siria mau yahge Israel mau jo mas jes ma bos zis somh zvn nghuot goeus.

²Somh vzvn lyis Yuda hwankti Yehoshaphat gas Israel hwankti jyank mas kwang loh.

³Ahab nyah zau jens lyis taiq zis gas, Ramot Gilead gas yah zis nghuot. Yang gas hauh wus lyis Siria hwankti loq masyah ma doms yoeus, samlo dvnyeis nyvng, ge.

⁴Housoeh nyang Yehoshaphat lyis taiq zis gas, Nvng ngos yah Ramot Gilead lyis zan das zis vloh das lah, ge. Yehoshaphat toeuh zis gas, Nvng cicont nghuot lyis ngos eq nghuot las ngah jeslo jens eq, ngah nyang jens eq cicont nghuot.

⁵Nghuot laus eq YHENSAIN lhyi shih nyeigyo yoeuh goh, ge.

⁶Israel hwankti ka lvpe jens nyeixo ko khi tsainh las nyei zis gas, Ngos Ramot Gilead lyis loh gis zan das lah. Ma loh gis zan das lah, ge. Nyamoq toeuh zis gas, Loh aq, YHENSAIN ka hauh wus hwankti loq mas kyauh das, ge.

⁷Nghuot laus eq Yehoshaphat gas, Yang YHENSAIN lhyi nyeigyo das xiklyis nyah lvpe gohyuk vnyeis lo lah, ge nyei.

⁸Ahab toeuh zis gas, YHENSAIN lhyi yoh nyeigyo das zis dvyuk nyeis shih. Nyang gas Imla dah lo Mikhaia nghuot. Nghuot laus eq nyang ngah cho khanhamp eq gis zis ma pe, dyoqbis cho zainsmuh kyingh dvtaiq dyei yvmvyah, ngos nyang lyis hoeng, ge. Yehoshaphat gas, Nvng housoeh ma gis taiq, ge.

⁹Housoeh Israel hwankti ka zau dvyuk lyis khi lha, Imla lo Mikhaia lhyi lvnyap loh shwih los aq, ge.

¹⁰Gvshih Israel hwankti yahge Yuda hwankti Yehoshaphat gas nyamoq dah hwankti dyimis wuot las Samari wus khomh nghe mha joq thanjang hwankti tank mas tsain tsung toh. Lvpe jens dvnganh gas nyamoq dah xikkhonh mas pe nyeis.

¹¹Hauh lvpe jens mas dvyuk nghuot dah Kenana lo Zedekia gas thyeq khyau jens kuot las taiq zis gas, YHENSAIN heisoeh ge: Siria jens mhont zis xauh shoq haih khyau jens yah thungh chah ge, ge.

¹²Lvpe jens dvnganh eq Ramot Gilead mas jes loh zan las ung bas jungh. YHENSAIN ka hauh zis nvng hwankti dah loq mas kyauh das, ge dvyhangteh tsain pe.

¹³Mikhaia lyis loh khi dah loeuskyoh soeu nyang lyis taiq zis gas, Yoeuh aq, lvpe jens dvnganh gas dang dvkhonh khyvlyis kyingh hwankti lhyi gis dah dang pe dyei. Nvng eq nyamoq yah dvyhangteh yomdyei aq, ge.

¹⁴Nghuot laus eq Mikhaia taiq zis gas, YHENSAIN nyang nyeis zis yah dvyhangteh, YHENSAIN ngos lyis taiq zis taiq das, ge.

¹⁵Nyang hwankti jyank mas jweh las hwankti nyang lyis nyei zis gas, Mikhaia eh, ngamoq Ramot Gilead mas jes loh zan gis lah, ma loh zan gis lah, ge. Nyang phuk taiq zis gas, Loh zan las ung los aq; YHENSAIN hauh zis nvng hwankti loq mas kyauh das, ge.

¹⁶Hwankti nyang lyis taiq zis gas, YHENSAIN dah nyings mas dang jyoeng mha lai las ngos lyis gohtoeu cha vtaiq oen, khanyhoq lhain maukhi nhang das lah, ge.

¹⁷Mikhaia toeuh zis gas, Israel dvnganh gas yvng yoeuh soeu ma bos dah yvng jens teh, boms mas dyos loh zis ngos nyvng. YHENSAIN taiq zis gas, Haih bang gas yhensain ma bos, yuk khanghmuh nyenstap zis yah nyah yhen pheh tauh loh bas jungh ge, ge.

¹⁸Israel hwankti ka Yehoshaphat lyis, Nyang ngah xiklyis gis zis ma pe, dyoqbis zainsmuh cho kyingh dvpe dyei oen, ngos nvng lyis taiq goeus ma nghuot lhyeh, ge.

¹⁹Mikhaia taiq, Housoeh las YHENSAIN dah dang gyo aq: YHENSAIN ka nyah hwankti tank mas tsung lha, maukhung jesphung dvnganh gas nyah vyvm loqwi loqyos tsain yap joq yvlyis ngos nyvng.

²⁰YHENSAIN taiq zis gas, Ahab gas Ramot Gilead jes mas doq loh las gyoh bas jungh, nyang lyis hank jyoeuq das lah, ge lyis dvyuk dvja tsain taiq.

²¹Dyos dvkoeuq YHENSAIN xikkhonh mas los yap las taiq zis gas, Ngos jyoeuq das, ge.

²²YHENSAIN ka, Nvng khasoeh jyoeuq das, ge nyei. Nyang gas, Ngos loh las nyah lvpe jens dvnganh dah nhuot mas hwah dah dyos duot das, ge. YHENSAIN ka, Nvng mhuih las yoh ung das. Loh kuot aq, ge.

²³Housoeh las YHENSAIN ka hai nah lvpe jens dvnganh dah nhuot mas hwah dah dyos kat dyei goeus. YHENSAIN ka nah xiklyis dyoqbis cho zau dang dye khyoq goeus, ge.

²⁴Hauh uhlyis Kenana lo Zedekia gas Mikhaia dah bvlot loh tyuk las taiq zis gas, YHENSAIN dah dyos gas nvng yah jisgoh das zis ngah jyank masyah khanhamp thuq loh au, ge.

²⁵Mikhaia taiq zis gas, Nvng tamh das ge yvplhunk mas wvng loh nyeih lyis nyvng das, ge.

²⁶Hauh thang lhyi Israel hwankti zau dang khyoq zis gas, Mikhaia lyis nyhik las wus zau Amon yahge hwankti lo Yoash jyank shwih loh aq.

²⁷Hwankti heisoeh ge oen aq: Haih soeu lhyi thung lhunk toh aq. Ngos nyenstap zis yah doms jweh los shoq nyang lyis ohlhyoq yahge jeis kyingh dvdyei aq, ge.

²⁸Mikhaia taiq zis gas, Nvng nyenstap zis yah tauh los lyis gas, ngos taiq dang gas YHENSAIN taiq zis ma nghuot. Dius jens dvnganh eh, gyo toh geh, ge.

²⁹Housoeh Israel hwankti yahge Yuda hwankti Yehoshaphat gas Ramot Gilead lyis zan das xiklyis doq loh.

³⁰Israel hwankti ka Yehoshaphat lyis, Ngos gohtoeu gungs shunk las jeszan yvmas loh bah. Nvng gas nvnyang dyixing wuot toh aq, ge. Housoeh Israel hwankti ka gohtoeu gungs shunk zis yah jeszan yvmas loh.

³¹Siria hwankti nyah lhyingh zau jens somhci aiq yuk lyis vmingh dyei toh zis gas, Israel hwankti Ahab mha lai las gohtoeu hank lyis eq vzan-goh, ge.

³²Housoeh las nyamoq Yehoshaphat lyis nyvng lyis nyamoq taiq zis gas, Jyoengh haih soeu ka Israel hwankti nghuot ge, nyang lyis zan loh. Nghuot laus eq nyang kaiq kat lyis,

³³jeslhyingh zau gas hauh zis Israel hwankti ma nghuot yvlyis seq lyis ma chank khat lo.

³⁴Siria jeslo dvyuk gas Israel jesphung shot lyei mvgon baiq kat zis Ahab lyis nyah dah jes dyi tsoq toh dah jo masyah zangh loh. Housoeh las nyang nyah lhyingh komp soeu lhyi, Ngos dvmdap goeus, tauh lo aq, ngos lyis jeszan masyah phe tyamp aq, ge.

³⁵Hauh nyeih lyis jeszan zis xungh. Hwankti ka jeslhyingh lyis nges tsung lha Siria jens lyis nyenhthang lhyi nyang shei shoq zan. Dvm mas dah suih gas lhyingh khyei mha yaus loh.

³⁶Buis wvng loh lyis, thoenkgus jesdvp gonh mas kaiq kat zis gas, Yuk khanghmuh vsainnyang wus, vsainnyang mau mas loh geh, ge.

³⁷Housoeh hwankti shei goeus. Nyah mvng lyis Samari mas yoeus loh las nyhop.

³⁸Hauh lhyingh lyis Samari mas dah thomhlo mas cheih lyis YHENSAIN taiq toh dang yah dvyhangteh, lvkhuih jens nyah suih tsain lyoq las nghe nyhiq jens eq houmha gungs cheih.

³⁹Ahab dah muh nyet shih goeu yahge nyang kuot cho dvnganh, nyang kuot toh cangzwis yah saiq toh dah hwankti yhen yahge nyang kuot toh wus jens dvnganh gas Israel hwankti jens dah mvnyei buk mas lhaih toh ma nghuot lhyeh?

⁴⁰Ahab gas shei thang lhyi nyah gungsthaiq nyah lo Ahazia hwankti kuot.

⁴¹Israel hwankti Ahab guon zis nyei vzvn lyis Asa lo Yehoshaphat gas Yuda hwankti bweh los.

⁴²Yehoshaphat nyang hwankti bweh los uhlyis somhci oeng zvn nghuot. Housoeh nyang Yerusalem mas aiqci oeng zvn guon. Nyah ungwes nyings gas Shilhi lonyi Azuba nghuot.

⁴³Nyang gas nyah uwus Asa dah cho dvnganh mas chank suh las YHENSAIN dah nyoqlvtjvng mas dan cho kuot das zis cha ma ngoek. Nghuot laus eq gohnyau jens dah mangso yhen jens lyis ma yoeus tyamp. Dius jens gas hauh mha phudyei cho kuot zis yahge xangh ngheq nyeis shih.

⁴⁴Yehoshaphat eq Israel hwankti yah nyenstap goh cho kuot.

⁴⁵Gvshih nyet shih dah Yehoshaphat kuot cho, nyang chixoeuq dah duot cho, nyang jes khasoeh zan cho ka Yuda hwankti jens dah mvnyei buk mas lhaih toh.

⁴⁶Nyah uwus Asa zaih masyah nyet joq shih dah silho paiq bang dah phon jens mas phuqsoe dah nghe nyhiq nghe phoq jens lyis eq hauh mau masyah khat tyamp.

⁴⁷Hauh yoq lyis Edom mas hwankti ma bos, Yuda hwankti jens toeuq toh dah hwankti gungsthaiq oen das soeu hauh mau lyis guon.

⁴⁸Yehoshaphat gas Ophira mas xing wons das xiklyis soenghi sangpho jens tsuk. Nghuot laus eq Ezion Geber mas dyoq tyamp las ma loh lo.

⁴⁹Ahab lo Ahazia Yehoshaphat lyis taiq zis gas, Ngah jyeidwis jens sangpho mha nah dius jens yah loh nhang aq, ge. Nghuot laus eq Yehoshaphat gas ma gyo.

⁵⁰Yehoshaphat shei lha, Dawi dah wus mas hwankti lop mas nyhop zis xauh. Nyah joqyos mas nyah lo Yehoram guon.

⁵¹Yuda hwankti Yehoshaphat guon zis dvci nyhet vzvn lyis Ahab lo Ahazia gas Samari mas Israel hwankti bweh los las Israel thoq mas aiq zvn guon khoq.

⁵²Nyang gas YHENSAIN dah nyoqlvtjvng mas ma gis cho kuot, nyah uwus kuot cho, nyah ungwes kuot cho, Israel jens lyis yaunos kuot nhang soeu, Nebat lo Yeroboam suh dah cho chank suh.

⁵³Bala phvra lyis paiq las nyah uwus kuot vgus dvnganh kuot las YHENSAIN, Israel dah Mangso lhyi nhaiqyo nhang.