Read Achang 1 HWANKTI 5 Bible Online

1 HWANKTI 5 - Achang bible

1 HWANKTI 5

¹Taire hwankti Hiram gas nyah lvgyo jens lyis Solomon jyank mas nhang kat. Khasoeh ge lyis nyang gas Solomon dah uwus Dawi joqyos mas Solomon lyis coeu juot las hwankti toh ge zis xauhgyo. Nyang gas Dawi lyis vjangh jyet soeu nghuot.

²Housoeh Solomon gas Hiram jyank mas dius nhang lha taiq zis gas,

³Ngah uwus Dawi gas nyah mau shot khanghmuh mas nyeis jeswus lyis zan chah yvmvyah YHENSAIN ka, Jeswus lyis ngah uwus Dawi dah khyei o mha ma khyoq toh dvchank, YHENSAIN nyah Mangso dah nyings xiklyis yhen ma gis tsuk ge zis nvng seq.

⁴Nghuot laus eq gvshih gas YHENSAIN, ngah Mangso ka shot khanghmuh mas ngos lyis nyenstap cho dyei goeus las ngos jes ma bos, ma gis cho cha eq ma thuq los.

⁵Housoeh las YHENSAIN ka ngah uwus lyis, Nah gungsthaiq nah hwankti tank mas ngos toh das soeu, nah lo gas ngah nyings xiklyis Yhenmuh tsuk das, ge taiq toh zis yah dvyhangteh, YHENSAIN, ngah Mangso dah nyings xiklyis Yhenmuh tsuk das oen sont nyeis.

⁶Housoeh yvmvyah Lebanon masyah ngah xiklyis Arit thoeuq nhang das vmingh dyei aq, ngah dius jens gas nah dius jens yah dvgeh kuot das. Nvng toeuq zis yah dvyhangteh, nah dius jens lyis uhkung phauh ngos dyei das. Sidon jens teh saiq seq yoeus bang ngamoq mas hank ma bos yvlyis nvng seq, ge.

⁷Hiram Solomon dang xauhgyo lyis svsoh gaus las taiq, Haih dius zains nyau lyis guon das nyhenshang Dawi lyis joeui bos lo dyei dah YHENSAIN Mangso lhyi chungh, ge.

⁸Hiram gas Solomon jyank dius nhang lha taiq, Nvng tying kat yvlyis ngos nghamh yoeuh goeus. Arit yahge shvxoeuh yah sen lha nvng omes nyhoq dyei das.

⁹Ngah jyeidwis jens saiq lyis Lebanon masyah thomh mas yoeus khyoq las nvng ngos lyis taiq joqyos mas pauq chank nyhoeuh kat dyei das. Houmha jweh lyis ngos pauq thyoq las nvng gas lhom dih yoeus aq. Nvng eq ngos o zis yah dvyhangteh, ngah yhenbang xiklyis zokho yoh dyei das, ge.

¹⁰Housoeh las Hiram gas Solomon omes zis yah dvyhangteh arit yahge shvxoeuh saiq dyei.

¹¹Solomon gas Hiram dah yhenbang xiklyis dvzvn lyis sunghso 264,000 paung, nyhet coeu 240,000 paung dyei.

¹²YHENSAIN eq dangthoengh toh vgus, Solomon lyis joeui dyei. Hiram yahge Solomon jo mas jes ma bos. Nyah aiq yuk thanghchvp toh.

¹³Hwankti Solomon gas Israel dvmau gonh masyah uhkung somh mons lhung.

¹⁴Nyang nyamoq lyis Lebanon mas lhamhmuh dvkhyvp lyis dvmons nhang. Nyamoq gas Lebanon mas lhamhmuh dvkhyvp, yhen mha aiq khyvp nyeis. Adoniram gas hauh uhkung jens lyis gungh.

¹⁵Solomon mas yvwons wons bang nyhet mons, boms mas luk khwih bang xet mons bos.

¹⁶Guon bang mas lai las muh mas gungh das bang somh khyoengh somhxo nghuot.

¹⁷Hwankti ka luk tsan bang lyis yhenpom xiklyis luk kuh, phauh changh luk, tsan goeus luk dvyhangteh kuh zis khwih los nhang.

¹⁸Housoeh las Solomon dah yhen tsuk bang, Hiram dah yhen tsuk bang gas Gebal dius jens yah dvgeh Yhenmuh tsuk das nyhenshang saiq yahge luk tsain sont.