Read Achang 1 HWANKTI 7 Bible Online

1 HWANKTI 7 - Achang bible

1 HWANKTI 7

¹Solomon gas nyah xiklyis hwankti yhen eq tsuk. Nyang hauh yhen yoh dye tsuk das xiklyis zvnlom dvci somh zvn nyangh.

²Nyang gas Lebanon saiqkhyam yvpmuh[6] eq kuot; hauh dah xing choeu loqbon dvxo, lvm choeu loqbon oengci, nyhang choeu loqbon somhci, arit zains somh jens mas arit jam tsain kyank toh.

³Zains dvjens mas dvci oeng zains zains bos las dvnganh lyis nyeici oeng zains nghuot. Hauh thoq mas lyens kih las arit thyeh yah mau toh.

⁴Khomhbaiq gas somh jens jens, vtsank tsank twi twi kat toh.

⁵Khomh dvnganh, khomh zains dvnganh gas soefuqthunk, somh tsank twi twi nghuot.

⁶Zains yah dyingh dah yvpmuh kuot. Hauh xing choeu loqbon oengci, lvm choeu loqbon somhci. Hauh ganthoq mas zains yah tsain dyingh las vnghop bos dah yhen gyamh kuot toh.

⁷Solomon gas nyang soetuon das xiklyis soetuon tank joq dah Soetuon Yvpmuh lyis thyangh masyah yhenkhung jweh shoq arit saiq yah tsuk toh.

⁸Hauh Yvpmuh ganthung pheh nyang nyeis das yhen lhyi eq housoeh teh tsuk. Solomon gas nyang yoeus toh Pharao dah lonyi xiklyis eq hai Yvpmuh teh dah yhen dvlom tsuk dyei.

⁹Haih yhen jens dvnganh yahge ganthoq zainsmuh lyis yhenpom mas zis vthyoh jweh shoq, kywizoe yah shot khanghmuh yih yih thyet toh dah kuh, phauh dah luk lhywaq yah tsuk.

¹⁰Yhenpom luk kuh dvkhamh gas loqbon dvci, dvkhamh gas xet loqbon xing.

¹¹Tyoyvm lyis yih yih khwih toh phauh dah luk lhywaq yahge arit saiq yah yvm.

¹²Ganthoq zainsmuh lyis tyoyvm yvm. Hauh zis gas khwih toh luk somh jens khanghmuh, arit saiq dvjens jens yvm toh dah boenghdoq joqyos yah, YHENSAIN dah Yhenmuh ganthoq tyoyvm teh nghuot.

¹³Solomon gas Taire masyah Huram ge soeu lhyi shwih nhang.

¹⁴Nyang gas Napthali lonyi, chauhmuh dvyuk dah lo nghuot. Nyah uwus gas Taire dius thunk shonh lyes soeu nghuot khoq. Nyang mas thunk vja ja seq shonh dah lyes cho, seq cho joeui yah dyingh joq. Housoeh las nyang hwankti Solomon jyank mas los las thunk muh dvnganh kuot dyei.

¹⁵Nyang gas nyhang choeu loqbon dvci xet, zuilhaink loqbon dvci aiq aiq bos dah thunk zains aiq zains kuot.

¹⁶Hauh aiq zains thoq mas kih das xiklyis oeng loqbon bon nyhang dah thunk zainstsungh aiq koeuq eq shonh.

¹⁷Zainstsungh khanghmuh mas nyei tsuq tsuq dap nyho yahge jvngchoh lyens nyhet koeuq koeuq yah saiq toh.

¹⁸Nyang gas zains 2 koeuq thoq mas dah zainstsungh thoq mas zaiq das xiklyis nyei tsuq tsuq dap nyho lhyi lhaink toh dah tvleh 2 jens kuot.

¹⁹Boenghdoq joqyos mas bos zainsmuh thyoh mas zainstsungh gas anghchau ban teh nghuot las nyei loqbon bos.

²⁰Hau zains aiq koeuq thoq mas dah zainstsungh thyoh, hau jvngchoh nvm yvmlhaink yah tvleh chvp aiqxo xo bos.

²¹Hauh zains aiq koeuq lyis Yhenmuh ganthoq mas dvshot dvzains cuk toh. Loqyos shot zains cuk las hauh yvlyis Yakin nyhink. Loqwi shot zains cuk las hauh yvlyis Boaz nyhink.

²²Zains thyoh gas anghchau buh teh tsain kuot. Housoeh zains muh dye goeus.

²³Hauh thang lhyi nyang gas thunk thomh kuot. Lywas choeu loqbon dvci, nyhang choeu oeng loqbon, zuilhaink loqbon somhci bos dah thomh lainh kuot.

²⁴Thomh nhuot o, nghe pheh shauq toh whom aiq jens lyis zuilhaink tap toh. Loq dvbon mas whom dvci lom lom zuilhaink tap toh las hauh whom jens gas thomh mas shih lhangh toh teh nghuot.

²⁵Hauh thomh gas nghe pheh nyoqnho xoeu toh dah noeu dvci aiq doeu thoq mas joq. Hauh noeu somh doeu gas mautsung pheh, somh doeu gas buiswvng pheh, somh doeu gas mautyi pheh, somh doeu gas buisthuq pheh xoeu toh.

²⁶Thomh gas loq dvtsop thoeu. Hauh nhuot khonh gas khuq nhuot khonh teh lywas las anghchau buh teh nghuot. Jeis 11,000 galan wvng.

²⁷Tsai xing choeu nyei loqbon, lvm choeu nyei loqbon, nyhang choeu somh loqbon bos dah thunk jeis lhyingh dvci koeuq kuot.

²⁸Hauh zis lyis vkhop goeng goeng bos yvm zis yah yvm toh.

²⁹Hauh yvm zis yah vkhop thoq mas khangkhyi, noeulu yahge Kherubim silho thwang tap las shauq toh. Khangkhyi yahge noeu o mha thoq mas bankhwank shauq toh.

³⁰Lhyingh dvkoeuq mas thunk lhyingh chvp nyei koeuq koeuq thunk lhyingh dom yah dvgeh joq. Lhyingh vthunk khanghmuh mas thunk lang kih das xiklyis zains bos. Hauh zains yvmlhaink mas bankhwank thwang tap las shonh toh.

³¹Lhyingh koeuq khanghmuh dah vthoq mas lang kih das xiklyis vzwvng lainh bos. Hauh zis gas zains lainh teh nghuot las lhyingh vthoq mas loq dvbon nyhang joq las nhuot khonh lvm choeu ka loq dvbon dvkhyamh nghuot. Vzwvng lainh dah nghe pheh bankhwank thwang tap toh. Lhyingh yvm gas ma lainh, soefuqthunk nghuot.

³²Lhyingh yah dvkoeuq teh kuot toh dah lhyingh dom 2 koeuq gas lhyingh yvm vjeis mas bos lhyingh chvp nyei chvp yah tsoq goh toh. Hauh lhyingh chvp dah nyhang choeu ka loq dvbon dvthu bos,

³³lhyingh chvp lho ka jes lhyingh teh nghuot. Hauh vdom, nhuot khonh, vkyank, vgungs gas shauq goeus dah thunk yah shonh toh.

³⁴Lhyingh yah dvkoeuq teh kuot toh dah zains gas lhyingh dah nyei thunk khanghmuh mas bos.

³⁵Lhyingh koeuq khanghmuh dah vthoq zuilhaink yah dvthu lywas dah vzam bos. Zains yahge vyvm gas lhyingh yah dvkoeuq teh kuot toh.

³⁶Lhyingh yvm mha eq, zains mas eq Kherubim, khangkhyi, dyoms zains silho thwang tap las shauq toh. Joqyos bos ya bos yvmas yvmlhaink yah bankhwank thwang tap toh.

³⁷Jeis lhyingh dvci gonh gas vzwvng, tsuk zis, keq zis dvyih nghuot.

³⁸Hauh thang lhyi nyang vkhonh nyei loqbon bon lvm las jeis 220 galan lan wvng dah thunk lang eq dvci shonh las dvlhyingh mas dvlang kih.

³⁹Housoeh nyang gas, Yhenmuh dah mautyi shot pheh oeng lhyingh, mautsung shot pheh oeng koeuq toh. Hau thunk thomh lyis gas Yhenmuh dah buisthuq mautyi shot mas toh.

⁴⁰Huram gas auh jens khuq jens, tsoh auh shonh. Housoeh Huram gas hwankti Solomon xiklyis YHENSAIN Yhenmuh mas dah muh dvnganh dye kuot. Houka: Zains aiq lom, Zainstsungh aiq koeuq, Zainstsungh aiq koeuq dah vnghop nyho bandyoms 2 koeuq: Hau nyho bandyoms mas tvleh aiq jens jens, tvleh chvp nyeixo; Lhyingh dvci, lhyingh thoq mas kih dah lang dvci; Thomh dvkoeuq, hauh thomh o mha noeulu dvci aiq doeu; Auh, khuq, tsoh thauh dye kuot. Solomon xiklyis Huram kuot dah YHENSAIN Yhenmuh kyahsoe dvnganh gas ying ying bvng dah thunk nghuot.

⁴¹

⁴²

⁴³

⁴⁴

⁴⁵

⁴⁶Hauh vyhang lhyi hwankti ka Yodan pa, Sukhot yahge Zarethan jo mas dah mutsoh yah kuot dah vlho mas shonh nhang.

⁴⁷Hauh vyhang ka svsoh nyo yvmvyah Solomon gas hauh yvlyis ma laiq lo. Hauh thunk gas khanyhoq bos zis hank ma yoh laiq yoeuh.

⁴⁸Solomon gas YHENSAIN Yhenmuh yah sen dah kyahsoe eq kuot: xing phon, Chixoeuq Ohlhyoq kih dah xing kihgus;

⁴⁹Xing gyingh nyituonh gus, Gyingshang Thank Joqyos xikkhonh mas mautyi shot oeng koeuq, mautsung shot oeng koeuq nghuot. Ban, nyitoengh, nyvp jens eq xing yah nghuot.

⁵⁰Khuq, nyici nyvp, lang, auhkhuq, nyiyvp kham auh, Gyingshang Thank Joqyos dah khomh yahge yvpmuh khomh mas dah pvtta jens eq xing tsain nghuot.

⁵¹Housoeh hwankti Solomon gas YHENSAIN dah Yhenmuh dye kuot. Solomon gas nyah uwus Dawi dyei toh dah ngwis xing yahge kyahsoe dvnganh chi los las YHENSAIN dah Yhenmuh ziskwi mha kat toh.