Read Achang 1 HWANKTI 9 Bible Online

1 HWANKTI 9 - Achang bible

1 HWANKTI 9

¹Housoeh Solomon gas YHENSAIN dah Yhenmuh yahge hwankti yhen lhyi dye tsuk. Kuot das ge nyang toeuq toh zis koeuq khanghmuh lyis nyang kuot nyuk.

²Hauh thang lhyi YHENSAIN ka Gibeon mas thuq xoeuq ku teh Solomon lyis aiq vlhain thuq xoeuq.

³YHENSAIN nyang lyis taiq zis gas, Nvng ngah xikkhonh mas sang cho yahge shvmanh dung zis ngos xauhgyo goeus. Hai nvng tsuk dah Yhenmuh lyis ngos gyingshang nhang goeus, housoeh lyis ngah nyings gas vcaiq vto paiq zis xauh das. Hauh Yhenmuh lyis ngos vjangh zungh las yoeuh gomh nyeis das.

⁴Nvng gas nah uwus Dawi teh dan las nhaiqlom zungh zis yah, ngos tyingtoh dang dvnganh, ngah lyi yahge ngah soetuon cho vjangh chank kuot las ngah xikkhonh mas suh nyeis lyis gas,

⁵ngos nah uwus lyis, Israel munghdan hwankti tank mas nah vnyau ma dyet das oen, dangthoengh toh zis yah dvyhangteh, nvng xauh tsung dah Israel munghdan hwankti tank lyis vjangh doengs joq nhang das.

⁶Nghuot laus eq, nvng nghuot ya nah lo jens gas ngah thang ma chank, ngos nah xikkhonh mas toh dyei, ngah tyingtoh dang, ngah lyi ma chank kuot, gohtoeu phvra lyis paiq phuqsoe lhyi ka,

⁷ngos Israel jens lyis nyamoq lyis dyei toh dah haih mau masyah thyet tyamp das. Hai ngah nyings lyis phauh nyang das xiklyis ngos lhoqshang toh dah Yhenmuh lyis ngah nyoqlvtjvng masyah thyuk das. Israel vnyau jens gas mau khanghmuh mas dah dius jens yah jwangh las dius ngis khyoq zis xauh das.

⁸Houlho haih Yhenmuh gas dyoqbis las mhotkhyot boms bweh das. Suh lai soeu khanghmuh lyis gvgis dvn, mauh nhang das. YHENSAIN ka haih mau yahge haih Yhenmuh lyis chamus heisoeh kuot au, ge nyamoq nyei das.

⁹Dius jens phuk taiq das zis gas, Nyamoq gas nyamoq dah phauh thyeih moq lyis Egutu mau masyah shwih los, YHENSAIN, nyamoq dah Mangso lhyi tyamp las gohtoeu phvra lyis paiq phuqsoe yvmvyah YHENSAIN ka haih yaukyenh dvnganh nyamoq thoq mas she kih goeus, ge das.

¹⁰Gvshih YHENSAIN dah Yhenmuh yahge hwankti yhen tsuk dah zvnlom aiqci zvn thang lhyi,

¹¹Solomon gas Taire hwankti Hiram lyis Galile mau mas wus aiqci dyei, khasoeh ge lyis hwankti Hiram gas Solomon lyis nyah muh mas yhung das xiklyis arit saiq, shvxoeuh saiq, xing nyang omes nyhoq dyei.

¹²Hiram gas Solomon nyang lyis dyei dah wus lyis tsain yoeuh das ge Taire masyah los. Nyang hauh wus jens lyis yom ma yoeuh yoh.

¹³Housoeh las nyang taiq zis gas, Ngah vnoeuh eh, hai nvng ngos lyis dyei dah wus jens gas cha nghuot lah, ge. Nyang hauh wus jens lyis khvnyhik nghuot joq zis yah dvyhangteh Khabul - phauh ma bos mau ge lui.

¹⁴Hauh thang lhyi, Hiram gas hwankti lhyi xing vluk dvkhyoengh paung ko[7] huon kat.

¹⁵Hwankti Solomon gas uhkung lhung lha YHENSAIN dah Yhenmuh, hwankti yhen, wus dah buisthuq pheh tsoh nhangh, Milo, Yerusalem wusciank ci, Hazo, Megido yahge Gezer wus tsain kuot.

¹⁶Egutu hwankti Pharao gas Gezer wus lyis los zan, houmha nyeis dah Khanan dius lyis sat las wus lyis nyi ngheq tyamp. Nyang gas nyah lonyi Solomon yah phoenghwvng uhlyis, phoenghwvng jyungshuk ge hauh wus lyis, nyah lonyi lyis dyei.

¹⁷Housoeh las Solomon gas Gezer wus doms kuot. Nyang gas Bet Horon o wus,

¹⁸Yuda mau mhanhdyvp mas Balat yahge Tadmor wus lyis eq tsuk.

¹⁹Solomon dah zisyos toh das wus jens dvnganh, jeslhyingh toh das wus jens, nyah dah nyang ji bang xiklyis wus jens kuot. Tsai Yerusalem mas eq, Lebanon mas eq, nyang guon dah mau dvnganh mas Solomon nyang omes vgus tsain kuot.

²⁰Israel mau mas Israel vnyau ma nghuot dah Amori, Hiti, Perizi, Hiwi, Yebusi jens eq nyeis shih.

²¹Houka Israel jens dvnganh ma yoh mhont, hauh mau mas nyet joq bang mas dyos lyih bang nghuot. Solomon gas hauh bang lyis tsainh las uhkung kuot nhang. Housoeh las nyamoq gas khvnyhik jweh shoq uhkung kuot nyeis.

²²Nghuot laus eq Solomon gas Israel jens lyis jons ma kuot nhang. Hauh gungsthaiq nyang gas Israel jens lyis nyah jeszan bang, nyah zau guon bang, nyah jeszau jens, nyah jeslhyingh yahge nyang ji bang dah vgyis jens khyvlyis toeuq toh.

²³Nyang gas nyamoq mas 550 yuk lyis nyoshoq ja dah muhzoh mas gungh das xiklyis toeuq toh.

²⁴Solomon gas nyah yhensain nyhiq, Pharao dah lonyi, Dawi dah wus masyah nyang nyah xiklyis tsuk dyei dah hwankti yhen saiq pheh dyung los thang lhyi Milo wus kuot.

²⁵Solomon gas YHENSAIN xiklyis nyang ci toh dah phon mha dvzvn lyis somh lhain ngheq phudyei jyungshuk, nyenstap jyungshuk phudyei. YHENSAIN xikkhonh mas xangh eq ngheq phudyei. Housoeh nyang Yhenmuh tsuk dah muh lyis vthang sau.

²⁶Hwankti Solomon gas, Edom mau, Thomh Nes jyankyvm, Elot nvm mas Ezion Geber mas jeis sangpho jens tsuk toh.

²⁷Hwankti Hiram gas Solomon dah dius jens yah muh zwi das xiklyis sangpho yahge thomh cho seq dah nyah jyeidwis jens lyis nhang.

²⁸Nyamoq gas Ophira mau mas jeis sangpho yah jweh loh las, hwankti Solomon jyank mas xing 16 tan chi los.