Read Achang 2 HWANKTI 1 Bible Online

2 HWANKTI 1 - Achang bible

2 HWANKTI 1

¹Hwankti Ahab shei thang lhyi Moab jens gas Israel jens lyis gomloeus toq.

²Israel hwankti Ahazia gas Samari wus mas nyah hwankti yhen yhenkhung thoq dah vthang mhayah dyet gyoh las svsoh nos nyeis. Housoeh las nyang loeuskyoh bang nhang lha taiq kat zis gas, Ngos haih nos masyah vyoh gis los das lah, oen Ekron wus, Balazebu phvra lyis e nyei los geh, ge.

³YHENSAIN dah loeuswons soeu ka Tishbe lvpe Eliya lyis taiq zis gas, Loh aq, Samari hwankti Ahazia dah loeuskyoh bang lyis e zes las nyamoq lyis taiq aq: Israel mas mangso ma bos lo oen nghamh las Ekron phvra Balazebu lyis nyei nhang lah?

⁴YHENSAIN heisoeh ge oen hwankti lhyi taiq kyoh aq: Nvng gas gvshih doq nyeis dah jung masyah yoh doms gyo das zis ma nghuot, shei nyang shei das oen aq, ge. Eliya eq YHENSAIN taiq kyoh vgus loh taiq.

⁵Loeuskyoh bang hwankti jyank mas tauh loh lyis, nyang nyamoq lyis nyei zis gas, Namoq chamus tauh los goh, ge nyei.

⁶Nyamoq, nyang lyis toeuh zis gas, Dius dvyuk ngamoq yah los xauhgoh las taiq zis gas, Namoq lyis nhang kat dah hwankti lhyi YHENSAIN heisoeh ge oen loh taiq kyoh geh: Israel mas mangso ma bos las Ekron phvra Balazebu jyank mas loh nyei goh lhyeh? Housoeh las nvng gas gvshih nvng doq nyeis dah jung masyah xauh gyoh das zis ma nghuot, shei nyang shei das, ge.

⁷Hwankti nyamoq lyis nyei zis gas, Namoq lyis los zes las haih dang taiq soeu ka khateh soeu nghuot lah, ge.

⁸Nyamoq phuk taiq zis gas, Nyang gas shohyeis yah kuot dah dyixing wuot las shohyeis dyichih yah chih toh, mauh yuk soeu nghuot, ge. Hwankti taiq zis gas, Hauh soeu ka, Tishbe mas dah Eliya nghuot, ge.

⁹Hwankti ka Eliya lyis shwih das xiklyis jeslo oengci guon jeszau dvyuk yah nyah dius oengci lhyi nhang. Housoeh nyang eq nyah jyank mas doq loh lyis Eliya gas jing thyoh dvkoeuq mas tsung toh. Nyang Eliya lyis taiq zis gas, Mangso dah dius eh, Hwankti taiq lyis, Gyoh los aq ge, ge.

¹⁰Eliya hau jeslo oengci guon jeszau lyis phuk taiq zis gas, Ngos Mangso dah dius nghuot lyis gas, maukhung mhayah nyi gyoh las nvng yahge nah dius oengci lhyi ngeh tyamp bas jungh, ge. Housoeh maukhung masyah nyi gyoh las nyang yahge nyah dius oengci ngeh jom tyamp.

¹¹Hauh thang lhyi nyang gohtoeu oengci guon jeszau dvyuk yah nyah dius oengci lhyi doms nhang. Nyang Eliya lyis taiq zis gas, Mangso dah dius eh, hwankti heisoeh ge: Lvnyap gyoh los aq! ge.

¹²Eliya nyamoq lyis phuk taiq zis gas, Ngos Mangso dah dius nghuot lyis gas, maukhung mhayah nyi gyoh las nvng eq nah dius oengci eq ngeh tyamp bas jungh, ge. Housoeh maukhung mhayah Mangso dah nyi gyoh las nyang eq, nyah dius oengci eq ngeh jom tyamp.

¹³Tsai hwankti ka oengci lhyi guon dah jeszau somh vyuk yah nyah dius oengci lhyi nhang. Hau oengci lhyi guon dah jeszau doq loh las jweh lyis, nyang gas Eliya xikkhonh mas phvluk thuk zis yah nyang lyis dung zis gas, Mangso dah dius eh, ngos lyis eq, ngah dius jens lyis eq jenh nhaiqnyen shih aq, ngamoq dah kang lhyi jenh lhuiq kat dyei shih aq.

¹⁴Maukhung mha dah nyi gyoh las xik lyis dah oengci guon jeszau aiq yuk yahge nyah aiq yuk dah oengci ci lhyi ngeh jom tyamp laus eq ngos lyis jenh nhaiqnyen aq, ge.

¹⁵Hauh uhlyis YHENSAIN dah loeuswons soeu ka Eliya lyis, Nyang yah chank gyoh loh aq. Nyang lyis vgyuk, ge taiq lyis, Eliya gas toq las hwankti jyank mas jeszau yah chank gyoh loh.

¹⁶Nyang hwankti lhyi taiq zis gas, YHENSAIN heisoeh ge: Israel mas dang nyei das mangso ma nyeis yvmvyah Ekron phvra Balazebu lyis nyei das ge loeuskyoh bang nhang lhyeh? Housoeh yvmvyah nvng doq nyeis dah jung masyah doms gyoh das zis ma nghuot. Nvng shei nyang shei das, ge.

¹⁷Housoeh Ahazia gas Eliya taiq dah Mangso dang yah dvyhangteh shei. Nyang mas loshang ma bos yvmvyah nyah vnoeuh Yoram gas nyah joqyos mas, Yuda hwankti Yehoshaphat lo Yehoram hwankti guon zis aiq vzvn mas hwankti bweh los.

¹⁸Hwankti Ahazia kuot dah cho dvnganh lyis Israel hwankti Sungson mha lhaih toh.