Read Achang 2 HWANKTI 10 Bible Online

2 HWANKTI 10 - Achang bible

2 HWANKTI 10

¹Ahab dah vnyau vshih nyhetci yuk gas Samari wus mas nyeis. Yehu ka hauh wus[4] mas guon bang, hauh mau dius logis jens, Ahab vnyau vshih jens lyis dyangh bang jyank mas maussauh tsain lhaih kat las tying zis gas,

²Namoq hwankti dah vnyau vshih jens yah dvgeh nghuot las jeslhyingh, nyang eq, ciank ci wus eq, kyonhkhyi eq namoq mas joq. Housoeh haih maussauh jweh yah dvyih,

³namoq hwankti dah vnyau vshih jens mas zes yik las gis soeu lhyi khyen lha nyah uwus dah hwankti tank mas tsung nhang lha, nyah xiklyis jeszan geh, ge.

⁴Nyamoq svsoh gyuk las taiq zis gas, Hwankti Yoram yahge hwankti Ahazia yangh ma yoh zan ung zis, yang khasoeh yoh zan das lah, ge.

⁵Housoeh las hwankti yhen guon soeu, wus guon soeu, hauh mau dius logis jens yahge dyangh bang gas Yehu jyank haih loeus huon kat: Ngamoq gas nah jyeidwis jens nghuot las nvng taiq zis dvnganh ngamoq kuot das cicont nghuot. Nghuot laus eq ngamoq hank lyis eq hwankti ma kuot das; nah nyoqlvtjvng mas gis khyvlyis kuot aq, ge.

⁶Yehu nyamoq jyank mas maussauh aiq vlhain lhaih zis gas, Namoq ngah shot nghuot las ngah dang gyo lyis gas, Hwankti Ahab dah vnyau vshih jens dah uhloms lyis tsain yoeus las nvpyo haih shishenh lyis Yezrel wus, ngah jyank mas los geh, ge. Gvshih Hwankti Ahab dah vnyau vshih jens nyhetci ka nyamoq bes los dah Samari wus mas wus guon bang yahge nyamoq lyis dyangh bang yah dvgeh nyeis.

⁷Hauh maussauh nyamoq jyank mas jweh lyis, nyamoq gas hwankti vnyau vshih jens nyhet ci yuk lyis sat, nyamoq dah uhloms lyis kyank mas kat las Yezrel wus, Yehu jyank mas huon kat.

⁸Loeuskyoh soeu dvyuk nyang lyis los taiq zis gas, Nyamoq hwankti loloeu jens dah uhloms tsain yoeus los goeus ge lyis, nyang gas, Hauh zis wus khomh mas aiq boms boms las nvpyo jweh shoq toh aq, ge.

⁹Nvp lyis nyang wus khomh mas thuq yap las dius jens dvnganh lyis taiq zis gas, Hwankti Yoram lyis sat das xiklyis khaujeini las sat soeu ka ngos nghuot; namoq lyis yobos huon dais ma bos. Nghuot laus eq heinyhoq yvlyis hank sat?

¹⁰Haih zis gas, YHENSAIN ka Ahab yhenbang lyis taiq toh dang dvnganh bweh das ge zis lyis kanghjyoeng kat zis nghuot. YHENSAIN ka nyah lvpe Eliya lyis yah dangthoengh dyei toh vgus kuot goeus.

¹¹Yehu ka Yezrel mas nyet shih dah Ahab buisnoms yahge nyah zau jens, nyah dyenschangh jens, nyah phudyei bang lyis dvyuk eq ma nyet lo shoq sat.

¹²Yehu ka Yezrel masyah Samari wus pheh loh. Cholvt mas "Bet Eked" ge dah Thoenggus mas jweh lyis,

¹³Yuda hwankti Ahazia dah vmang vnoeuh jens yah xauhgoh las nyang nyei zis gas, Namoq hank nghuot goh lah, ge. Nyamoq gas, Ngamoq gas Ahazia dah vmang vnoeuh moq nghuot. Ngamoq gas hwankti nyhiq Yezebel dah lo jens yahge hwankti yhen dius jens lyis phauh nyang dyei das xiklyis Yezrel pheh loh, ge.

¹⁴Yehu nyah dius jens lyis vmingh dyei zis gas, Nyamoq lyis vdwis nyhik geh, ge. Housoeh nyamoq eq vdwis nyhik las nyang gas nyamoq lyis Bet Eked jeisdwang nvm mas sat. Nyamoq gas nyeici aiq yuk nghuot las nyamoq mas dvyuk eq ma nyhet toh lo.

¹⁵Yehu hou mhayah toq loh lyis nyang lyis lyih zes langh soeu, Rekhab lo Yehonadab yah xauhgoh. Yehu ka nyang lyis jeshuh las taiq zis gas, Nvng yahge ngos gas nghamh cho doeusgoh. Nvng ngos lyis vpangh das lah, ge. Yonadab eq, Pangh das, ge. Yehu ka, Housoeh lyis nah loq yhuonh kat aq, ge. Nyah aiq yuk loq zwi goh las Yehu ka nyah lhyingh mas nyang lyis she toq kat.

¹⁶Ngos yah dvgeh loh las, ngos YHENSAIN dah cho mha kha iq nhaiq wvng yvlyis los yoeuh aq, ge Yehu taiq. Nyah aiq yuk Samari pheh lhyingh dvgeh tsung loh.

¹⁷Samari wus mas jweh lyis YHENSAIN ka Eliya lyis yah taiq dah dang yah dvyhangteh Yehu ka Ahab yhenbang dvnganh monh tyamp shoq hauh wus mas nyet shih bang dvnganh sat.

¹⁸Yehu ka Samari wus dius jens dvnganh lyis tsainh toh las nyamoq lyis taiq zis gas, Hwankti Ahab gas Bala lyis dvtsiq dvphuqsoe, nghuot laus eq ngos gas nyang lyis nyoshoq phuqsoe das.

¹⁹Bala dah lvpe jens dvnganh, nyang lyis paiq bang dvnganh, nyah phudyei bang dvnganh lyis khi tsainh toh geh. Ngos Bala lyis lomhxangh zainsmuh lainh das las, hank lyis eq vdyuk nhang goh. Dyuk soeu hank eq kang dwis das zis ma nghuot, ge. (Housoeh taiq zis gas Bala lyis paiq bang lyis mhont das xiklyis mhuih zis nghuot.)

²⁰Housoeh Yehu taiq zis gas, Bala xiklyis pwe kuot geh, ge. Housoeh nyamoq eq pwe kuot chah ge tsain kyoh kat.

²¹Yehu ka Israel dvmau gonh kyoh kat las, Bala lyis paiq bang ma los zis dvyuk eq ma bos lo shoq zain los. Housoeh nyamoq dvnganh Bala yhenmuh mas wvng las hauh yhenmuh mas dyingh nhoenk toh.

²²Yehu ka gyingshang dyixing zom dah phudyei soeu lhyi khi lha, Bala paiq bang xiklyis dyixing yoeus thuq las dyei nhang.

²³Hauh thang lhyi Yehu ka Rekhab lo Yehonadab yah dvgeh Bala yhenmuh mas wvng las Bala paiq bang lyis taiq zis gas, YHENSAIN dah jyeidwis jens hank lyis eq namoq mas vbos nhang, Bala paiq bang kyingh dvnghuot bas jungh, ge.

²⁴Housoeh las nyang yahge Yonadab gas Bala lyis phudyei jyungshuk yah ngheq phudyei. Hauh uhlyis Yehu toeuq toh zis gas yhenmuh nghe pheh nyah dius xetci nyeis nhang lha, Hai ngos shwih toh dah dius dvyuk lyis eq vluiq nhang, lhuiq kat soeu ka nyah gungsthaiq shei chah, ge toh.

²⁵Housoeh ngheq phudyei cho dye yah dvyih, Yehu zungh bang yahge jeszau jens lyis taiq zis gas, Wvng loh las dvnganh lyis sat geh. Hank lyis eq vthuq loh nhang, ge. Nyamoq gas moengsa yah sat las mvng lyis nghe pheh she tyamp. Lholha nyamoq Bala yhenmuh yvplhunk pheh tsain wvng loh.

²⁶Houmha joq dah gyingshang zains lyis yoeus las ngheq.

²⁷Housoeh nyamoq hau Bala dah gyingshang zains khyauh, yhenmuh lyis thyoq tyamp. Bala dah yhenmuh lyis thyoq las khvnyhik jweh shoq nghe zungs bweh nhang.

²⁸Hauh zis gas Yehu ka Israel mau masyah Bala paiq cho lhyi mhont dah cho nghuot.

²⁹Nghuot laus eq Israel jens lyis shuot nhang Nebat lo hwankti Yeroboam dah yaunos ge, Bethel yahge Dan mas dah xing noeulo lyis ma tyamp.

³⁰YHENSAIN Yehu lyis taiq zis gas, Ngos nvng lyis kuot nhang mes zis yah dvyhangteh dvkoeuq eq ma nyet lo nvng Ahab vnyau vshih lyis kuot goeus. Housoeh las nah vnyau vshih jens nyei caiq jweh shoq Israel hwankti tank mas tsung nhang das oen ngos nvng lyis dangthoengh dyei, ge.

³¹Nghuot laus eq Yehu ka YHENSAIN, Israel Mangso dah lyi lyis nyah ehnyet nhaiqlom dvnganh yah ma chank; hauh gungsthaiq Israel lyis yaunos kuot nhang dah Yeroboam yikhyoh dvchank.

³²Hauh yoq lyis YHENSAIN ka Israel mau lyis thyet tyamp. Hau Israel mau dvnganh lyis Hazael guon zis gas,

³³Yodan lvng buisthuq pheh Gilead - Gad, Ruben, buisthuq Manase jens nyeis joqyos Arnon lvng yvm mas joq dah Aroer wus masyah Gilead mau Bashan tsain nghuot.

³⁴Yehu kuot zis gohtoeu nyet shih zis yahge nyah yomsoq cho dvnganh gas Israel hwankti jens mvnyei buk mas lhaih toh.

³⁵Yehu ka shei lha nyang lyis Samari mas nyhop. Nyah lo Yehoahaz gas nyah joqyos mas guon khoq.

³⁶Yehu Samari mas Israel lyis guon zis aiqci xet zvn nghuot.