Read Achang 2 HWANKTI 12 Bible Online

2 HWANKTI 12 - Achang bible

2 HWANKTI 12

¹Israel Hwankti Yehu guon zis nyhet vzvn lyis Yoash Yuda hwankti bweh los las Yerusalem mas nyeici zvn guon khoq. Nyah ungwes gas Besheba wus mas dah Zibia nghuot.

²Phudyei Yehoiada shet dyei nyeis gvng mas Yoash gas YHENSAIN dah nyoqlvtjvng mas nyah kang dwis cho dvkoeuq gonh mas jus khyvlyis kuot.

³Nghuot laus eq Mangso lhyi ma seq bang dah paiq joqyos lyis ma yoeus tyamp. Dius jens gas hau Mangso lhyi ma seq bang dah paiq joqyos mas phudyei cho yahge xangh ngheq cho dvtsain kuot nyeis shih.

⁴Yoash gas phudyei bang lyis khi lha vmingh dyei zis gas, Hank eq hank ehnyet xihhonh nghuot ya pauh toh jyungshuk, vjangh phudyei jyungshuk nghuot dah Yhenmuh mas gyingshang jyungshuk khyvlyis chi los dah ngwis lyis kui tsainh aq.

⁵Phudyei bang yuk khanghmuh gas vsainnyang muhwons nyeis yvmas chi jweh los dah ngwis lyis yvwons yoeus las hauh ngwis lyis Yhenmuh dyoq loh yvmas soq uhlyis chah nyhoq yoeus yhung geh, ge.

⁶Nghuot laus eq Yoash guon zis aiqci somh vzvn jweh los lyis eq phudyei bang gas Yhenmuh dyoq loh zis ma tsain soq shih.

⁷Housoeh las hwankti Yoash gas phudyei Yehoiada yahge gohtoeu phudyei bang lyis khi taiq zis gas, Namoq chamus Yhenmuh dyoq loh zis ma soq goh lah? Gvshih masyah namoq xauh lhom yoeus dah ngwis lyis namoq vyoeus toh; Yhenmuh dyoq loh zis soq das xiklyis dyei geh. Housoeh lyis Yhenmuh yoh doms soq das, ge.

⁸Phudyei bang gas hauh cho lhyi xihhonh las Yhenmuh dyoq loh zis eq nyamoq nyang ma soq das cho xam tsain xonh.

⁹Phudyei Yehoiada gas kwi dvlom yoeus, kwi nyheih mas dwang dvkoeuq phank las Yhenmuh mas wvng loh lyis loqyos shot, phon yvm mas toh. Houmha khomh shung dah phudyei bang gas, Yhenmuh mas los paiq bang chi los dah ngwis dvnganh houmha loh kat.

¹⁰Hauh kwi mha ngwis nyo los zis nyvng goeus ya, hwankti dah lhaih comh soeu yahge phudyei zainsmuh gas hauh ngwis lyis shauq las laiq.[8]

¹¹Nyamoq gas hauh ngwis khanyhoq zis dye comh thang lhyi, nyamoq toeuq toh, Yhenmuh soq dah muhzoh lyis yoeuh bang loq mas dyei las nyamoq gas Yhenmuh soq bang, soehfuh jens, yhentsuk bang,

¹²lukci bang, luk bat bang lyis khaih; Yhenmuh dyoq loh zis soq das xiklyis saiq yahge Yhenmuh soq yvmas yhung, luk wis las gohtoeu chah yvmas yhung.

¹³Nghuot laus eq Yhenmuh mas dah ngwis lang, nyi nyvp, khuq, lvbuh, xing yah ngwis yah kuot dah vyhang lhyi hau Yhenmuh mas chi los dah ngwis yah ma wis.

¹⁴Nyamoq gas hauh ngwis yah muh zwi bang lyis khaih, Yhenmuh soq yvmas yhung chah kyahsoe wis.

¹⁵Muh zwi bang lyis khaih das ngwis lhom yoeus bang gas lomluk luk kuot yvmvyah jyen ma suon xoeuq.

¹⁶Yobos khyuot jyungshuk ngwis, yaunos ngwis gas kwi mha ma kat. Hauh zis gas phudyei bang yah sen.

¹⁷Hauh uhlyis Siria hwankti Hazael gas Gat lyis loh doq zan yoeus. Hauh thang lhyi Hazael gas Yerusalem lyis loh zan das zis los.

¹⁸Yuda hwankti Yoash gas nyah xik mas dah Yuda hwankti jens Yehoshaphat, Yehoram yahge Ahazia moq dyei toh dah gyingshang vyhang yahge nyang dyei toh Yhenmuh zisyos, hwankti yhen zisyos mas nyvng dah xing dvnganh yoeus las Siria hwankti Hazael lyis dyei kat yvmvyah, Hazael gas Yerusalem lyis toh khoq las loh.

¹⁹Nyet shih dah Yoash cho yahge nyang kuot khoq zis dvnganh gas Yuda Hwankti jens Sungson mha lhaih toh.

²⁰Hwankti Yoash dah zau jens nyang lyis sat das zis khaujeini las, nyamoq mas aiq yuk, Shoma lo Yehozabad yahge Shimeat lo Yozakha ka Sila pheh loh cho, Yerusalem buisthuq pheh, tsoh nhangh las tsuk toh yhen mha nyang lyis sat. Nyang lyis Dawi dah wus, hwankti lop mas nyhop. Hauh thang lhyi nyah lo Amazia gas nyah joqyos mas guon khoq.