Read Achang 2 HWANKTI 14 Bible Online

2 HWANKTI 14 - Achang bible

2 HWANKTI 14

¹Israel hwankti Yehoahaz lo Yehoash guon zis aiq vzvn lyis Yuda hwankti Yoash lo Amazia gas hwankti bweh los.

²Nyang hwankti bweh los lyis aiqci oeng zvn nghuot las Yerusalem mas aiqci gau zvn guon khoq. Nyah ungwes gas Yerusalem mas dah Yehoadin nghuot.

³Nyang gas YHENSAIN dah nyoqlvtjvng mas jus zis kuot laus eq nyah phauh thyeih Hwankti Dawi teh ma nghuot shih. Nyang gas nyah uwus Yoash kuot zis dvnganh kuot.

⁴Nyhang dah joqyos lyis ma yoeus tyamp las dius jens gas hau Mangso lhyi ma seq bang dah paiq joqyos mas phudyei, xangh ngheq dvkuot shih.

⁵Hauh munghdan nyah loq mas doengs yah dvyih, nyah uwus hwankti lhyi sat dah zau jens lyis sat.

⁶Lo jens gvng mas uwus moq lyis ma gis sat, nyhiphoq moq gvng mas lo jens lyis ma gis sat, hank eq hank nyang dah yaunos xiklyis kyingh sat zis dvxauh chah ge, YHENSAIN Moshe dah lyi maussauh mas lhaih toh zis yah dvyhangteh nyang gas hau dius sat bang dah lo jens lyis ma sat.

⁷Nyang gas Edom dius dvmons lyis Coh Langhkhau mha sat; Sela wus lyis hauh jeszan khyomp mas xauh yoeus las, Yokthel ge nyhik, khvnyhik jweh shoq hauh nyings lui nyeis.

⁸Hauh thang lhyi Amazia gas Yehu nyeilo, Yehoahaz lo Israel hwankti Yehoash jyank mas loeuskyoh bang nhang lha taiq kat zis gas, Yang dvyuk yah dvyuk jeszan goh goh, ge.

⁹Israel Hwankti Yehoash yah, Yuda Hwankti Amazia lyis taiq kat zis gas, Dvnyeih lyis Lebanon zoeugyomh gas Lebanon Arit zains jyank mas, Nah lonyi ngah loloeu lyis dyeizo aq, ge. Yewus dvdoeu lai loh lyis zoeugyomh lyis nang pyeh tyamp.

¹⁰Gvshih Amazia nvng Edom lyis yoh zan ung lha ehnyet nyhang joq. Nvng nah Ung cho mha nyeis aq. Nvng eq Yuda mau eq jes mas gyoh das xiklyis chamus soepan nyeis lah, ge.

¹¹Nghuot laus eq Amazia gas ma gyo. Housoeh las Hwankti Yehoash ka nyang lyis Yuda mau Betshemesh mas jes loh zan.

¹²Amazia dah jesphung ka Israel lyis somh las nyah jeslo dvnganh gas vsainnyang yhen pheh phang loh.

¹³Yehoash gas Betshemesh mas Amazia lyis nyhik. Tsai, nyang Yerusalem mas loh las Yerusalem wusciank loqbon nyeixo lhyi Ephraim Khomh masyah Vthunk Khomh jweh shoq thyoq khyoq.

¹⁴Nyang gas Yhenmuh yahge hwankti yhen mha dah zisyos mas dah ngwis xing yahge gohtoeu nyvng ya nyvng zis dvnganh, nyamoq dah kang lhyi gos dyei das bang lyis shwih las Samari pheh tauh loh.

¹⁵Yehoash kuot khoq cho nyet shih goeu yahge nyang duot cho, Yuda hwankti Amazia lyis jes khasoeh zan cho ka Israel Hwankti jens Sungson mha lhaih toh.

¹⁶Yehoash ka shei lha Samari mas Israel hwankti jens dah lop mas nyhop zis xauh goeus. Hauh thang lhyi nyah lo Yeroboam II gas nyah joqyos mas guon khoq.

¹⁷Israel hwankti Yehoash shei thang lhyi Yuda hwankti Amazia gas dvci oeng zvn kang dwis khoq.

¹⁸Amazia kuot cho nyet shih goeu gas Yuda Hwankti jens Sungson mha lhaih toh.

¹⁹Yerusalem mas Amazia lyis gomloeus toq las nyang gas Lakhish pheh phang loh. Nyah jeswus eq chank khat lha nyang lyis houmha sat.

²⁰Nyah mvng lyis nyang masyah thuq los las Dawi dah wus Yerusalem mas hwankti lop mas nyhop.

²¹Yuda dius jens dvnganh gas dvci khyuk zvn bos dah Uzia lyis shwih yoeus las nyah uwus Amazia gungsthaiq hwankti toh.

²²Hwankti Uzia nyah uwus shei thang lhyi Elat wus yoh doms zan yoeus las doms tsuk.

²³Yoash lo Yuda hwankti Amazia guon zis dvci oeng vzvn lyis Yehoash lo Yeroboam gas Samari mas Israel hwankti bweh los las nyeici dvzvn guon khoq.

²⁴Nyang gas Mangso dah nyoqlvtjvng mas ma gis zis kuot. Nyang gas Israel lyis yaunos kuot nhang soeu, Nebat lo Yeroboam dah yaunos dvnganh masyah ma gang loh.

²⁵YHENSAIN, Israel dah Mangso ka nyah jyeidwis Gat Hepha dius Amitai lo lvpe Yona dah nhuot masyah taiq toh dang yah dvyhangteh, nyang gas Israel maukyo, mautsung pheh Hamat langhwuq mhayah mautyi pheh Coh Thomh jweh shoq doms xauh yoeus.

²⁶Israel jens xauh dah shanghsenh lyis YHENSAIN nyvng; Israel jens lyis pangh soeu ma bos.

²⁷Nghuot laus eq YHENSAIN ka maukhung o mha vcaiq vto Israel jens lyis thyuk tyamp das ge ma toeuq, housoeh las hwankti Yeroboam II lyis yah nyang nyamoq lyis khyuot yoeus.

²⁸Yeroboam II kuot khoq cho nyet shih goeu dvnganh yahge nyang duot cho, jes khasoeh zan cho, Damasku masyah Hamat jweh shoq doms xauh yoeus las Israel mas xauh tap yoeus cho ka Israel Hwankti jens Sungson mha lhaih toh.

²⁹Yeroboam II shei lha Israel hwankti jens dah lop mas nyhop. Nyah joqyos mas nyah lo Zekharia guon khoq.