Read Achang 2 HWANKTI 15 Bible Online

2 HWANKTI 15 - Achang bible

2 HWANKTI 15

¹Israel hwankti Yeroboam guon zis aiqci nyhet vzvn lyis Yuda hwankti Amazia lo Uzia gas hwankti bweh los.

²Nyang hwankti bweh los uhlyis dvci khyuk zvn nghuot las Yerusalem mas oengci aiq zvn guon khoq. Nyah ungwes gas Yerusalem mas dah Yekholia nghuot.

³Nyang gas nyah uwus Amazia kuot khoq vgus YHENSAIN dah nyoqlvtjvng mas jus khyvlyis kuot.

⁴Nghuot laus eq Uzia gas nyhang dah joqyos lyis ma yoeus tyamp las dius jens gas hau nyhang dah joqyos mas phudyei, xangh dvngheq nyeis shih.

⁵YHENSAIN ka hwankti lhyi bat las nyang shei buisnyeis jweh shoq nyang gas svsoh gyukphoh dah dvmjot dap soeu nghuot khoq. Nyang gas nyang kyingh dvyhen nyeis las muhzoh dvnganh masyah no toh las hauh uhlyis nyah lo Yotham ka hauh Yuda mau lyis guon.

⁶Uzia kuot cho nyet shih goeu yahge nyah muh dvnganh gas Yuda hwankti jens Sungson mha lhaih toh.

⁷Uzia gas shei lha Dawi dah wus hwankti lop mas nyhop zis xauh. Hauh thang lhyi nyah joqyos mas nyah lo Yotham guon khoq.

⁸Yuda hwankti Uzia guon zis somhci xet vzvn lyis, Yeroboam II lo Zekharia gas Israel hwankti bweh los las Samari mas lhamhmuh khyuk khyvp guon khoq.

⁹Nyang gas nyah phauh thyeih moq kuot khoq teh YHENSAIN dah nyoqlvtjvng mas ma gis zis kuot. Nyang gas Israel lyis yaunos kuot nhang soeu Nebat lo Yeroboam dah ma gis cho chank kuot.

¹⁰Hauh thang lhyi Yabesh lo Shalum hwankti Zekharia lyis tyixo lha nyang lyis Ibleam mas sat. Nyah joqyos mas Shalum guon khoq.

¹¹Zekharia kuot cho nyet shih goeu, Israel hwankti jens Sungson mha mas lhaih toh.

¹²Haih zis gas YHENSAIN dah dang Yehu lhyi, Nah lo jens nyei caiq jweh shoq Israel hwankti tank mas xauh tsung das ge zis nyuk los.

¹³Yuda hwankti Uzia guon zis somhci gau vzvn lyis Yebesh lo Shalum gas Israel hwankti bweh los. Nyang Samari mas lhamhmuh dvkhyvp dyingh shoq guon khoq.

¹⁴Gadi lo Menahem ka Tiza masyah Samari mas Shalum lyis loh sat las nyah joqyos mas nyang guon khoq.

¹⁵Shalum kuot cho nyet shih goeu yahge gomloeus toq cho ka Israel hwankti jens Sungson mha lhaih toh.

¹⁶Menahem gas Tiza masyah los uhlyis Tapu wus, wus dius dvnganh yahge hauh vyvm vwi mau dius jens lyis mhont tyamp, khasoeh ge lyis nyamoq gas Menahem lyis vsomh ma dyei. Menahem gas ung mha loshang chi dah Vmesbih jens dvnganh dah womdau lyis yangh tsain khoq tyamp.

¹⁷Yuda hwankti Uzia guon zis somhci gau vzvn lyis Gadi lo Menahem ka Israel thoq mas hwankti bweh los las Samari mas dvci zvn guon khoq.

¹⁸Nyang gas YHENSAIN dah nyoqlvtjvng mas ma gis zis kuot. Nyang gas nyah dvcaiq gonh Israel lyis nyah dvcaiq yaunos kuot nhang soeu Nebat lo Yeroboam dah ma gis cho chank.

¹⁹Asiria hwankti Tigalath Pileser gas hauh mau lyis tyixo los. Menahem ka hauh munghdan nyah loq mas doengs shoq nyang lyis yomdyei bas jungh ge Tigalath Pileser lyis ngwis 68,000 paung dyei.

²⁰Menahem gas Asiria hwankti lhyi dyei das xiklyis yohzo yohshuk bang lyis, dvyuk ngwis kyap oengci kat nhang. Housoeh las Asiria hwankti ka hauh mau masyah tauh loh.

²¹Menahem kuot cho nyet shih goeu yahge nyang kuot zis dvnganh gas Israel hwankti jens Sungson mha lhaih toh.

²²Menahem shei lha nyhop zis xauh. Nyah lo Pekahia gas nyah joqyos mas guon khoq.

²³Yuda hwankti Uzia guon zis oengci vzvn lyis Menahem lo Pekahia gas Israel hwankti bweh los las Samari mas aiq zvn guon khoq.

²⁴Nyang gas Israel lyis yaunos kuot nhang soeu Nebat lo Yeroboam dah ma gis cho chank las YHENSAIN lhyi tyi lha yaunos kuot.

²⁵Gilead bang oengci yah dvgeh, nyah muh wons zau dvyuk Remalia lo Peka gas nyang lyis tyixo lha Argob yahge Arie vzomh yah dvgeh Samari hwankti yhen gau yvp khau[9] mha sat las nyah joqyos mas Peka guon khoq.

²⁶Pekahia kuot cho dvnganh gas Israel hwankti jens Sungson mha lhaih toh.

²⁷Yuda hwankti Uzia guon zis oengci aiq vzvn lyis Remalia lo Peka gas Israel hwankti bweh los las Samari mas aiqci zvn guon khoq.

²⁸Nyang gas, Israel lyis yaunos kuot nhang soeu Nebat lo Yeroboam dah ma gis cho chank las YHENSAIN lhyi tyi lha yaunos kuot.

²⁹Israel hwankti Peka zaih lyis Asiria hwankti Tiglat Pileser jweh los las Ijon, Abel Bet Makha, Yanoa, Kedesh, Hazo, Gilead yahge Galile, Napthali mau dvnganh lyis zan las nyamoq lyis Asiria pheh jons shwih loh.

³⁰Hauh thang lhyi Ela lo Hoshea gas gomloeus toq las Remalia lo Hwankti Peka lyis zan las nyang lyis sat. Uzia lo Yotham guon zis aiqci vzvn lyis Hoshea gas Hwankti Peka dah joqyos mas guon khoq.

³¹Peka kuot cho dvnganh gas Israel hwankti jens Sungson mha lhaih toh.

³²Israel hwankti Remalia lo Peka guon zis aiq vzvn lyis Yuda hwankti Uzia lo Yotham guon xi.

³³Nyang hwankti bweh los uhlyis nyang aiqci oeng zvn bos goeus. Nyang Yerusalem mas dvci khyuk zvn guon khoq. Nyah ungwes gas Zadok lonyi Yerusha nghuot.

³⁴Nyang gas nyah uwus Uzia dah yikhyoh chank las YHENSAIN dah nyoqlvtjvng mas jus zis kuot.

³⁵Nghuot laus eq nyhang dah joqyos lyis gas ma tsain yoeus tyamp. Dius jens gas hau nyhang joqyos mas phudyei, xangh ngheq dvtsain kuot nyeis shih. Nyang gas Yhenmuh Mautsung Khomh ci.

³⁶Yotham kuot cho dvnganh gas Yuda hwankti jens Sungson mha lhaih toh.

³⁷Hauh buisnyeis lyis YHENSAIN ka Siria hwankti Rezin yahge Israel hwankti Remalia lo Peka lyis yah Yuda lyis zan nhang.

³⁸Yotham shei lha Dawi dah wus hwankti lop mas nyhop zis xauh. Hauh thang lyis nyah joqyos mas nyah lo Ahaz guon khoq.