Read Achang 2 HWANKTI 16 Bible Online

2 HWANKTI 16 - Achang bible

2 HWANKTI 16

¹Remalia lo hwankti Peka gas Israel lyis guon zis dvci nyhet vzvn lyis Yuda hwankti Yotham lo Ahaz guon xi.

²Ahaz hwankti bweh los uhlyis nyenhkyi aiqci zvn bos goeus. Nyang Yerusalem mas dvci khyuk zvn guon khoq. Nyang gas nyah phauh thyeih Dawi dah gis yikhyoh lyis ma chank: hauh gungsthaiq YHENSAIN, nyah Mangso dah nyoqlvtjvng mas ma jus cho kuot.

³Nyang gas Israel hwankti jens teh suh e. YHENSAIN ka Israel jens masyah khat thuq tyamp dah gohnyau bang dah vchoqh vjyot thungh yah dvyhangteh nyah lo lyis nyi mas ngheq phudyei.

⁴Nyhang dah joqyos, jing, saiqzains khyei khanghmuh mas phudyei, xangh phot, kuot.

⁵Siria hwankti Rezin yahge Remalia lo Israel hwankti Peka moq gas Yerusalem lyis los zan las hauh wus lyis lhaink toh, laus eq Ahaz lyis ma zan ung.

⁶Hauh uhlyis Edom hwankti[10] gas Elat wus lyis doms yoh yoeus, las Yuda jens lyis Elat masyah khat thuq las, Edom jens wvng nyeis zis khvnyhik jweh shoq nghuot.

⁷Ahaz ka Asiria hwankti Tiglat Pileser jyank mas loeuskyoh bang nhang lha taiq zis gas, Ngos gas nah jyeidwis eq, nah lo eq nghuot. Ngos lyis tyixo lha los zan dah Siria hwankti yahge Israel hwankti jyank masyah los khyuot yoeus aq, ge.

⁸Ahaz gas Yhenmuh yahge hwankti yhen ziszom joqyos mha dah ngwis xing yoeus las Asiria hwankti lhyi jyungshuk huon.

⁹Asiria hwankti ka Ahaz sang zis gyo las Damasku wus lyis loh zan yoeus las dius jens lyis gas Kir pheh nyhik shwih loh, Rezin lyis gas sat.

¹⁰Hwankti Ahaz gas Asiria hwankti Tiglat Pileser yah xauhgoh das zis Damasku pheh loh. Nyang Damasku mas phon dvkoeuq nyvng las hauh vzwvng, yikhyoh dvnganh lyis phudyei Uria jyank mas huon kat.

¹¹Housoeh Uria gas hauh zis yah dvyhangteh phon dvkoeuq ci, las Ahaz ma tauh los shih lyis dye ci toh goeus.

¹²Hwankti ka Damasku masyah jweh los lyis hauh phon lhyi nyvng. Hwankti hauh phon mha loh las houmha jyungshuk dyei cho kuot.

¹³Nyang hauh phon mha ngheq dyei jyungshuk, zonoms shukphoh jyungshuk ngheq dyei, nyenstap jyungshuk suih eq sanh.

¹⁴YHENSAIN xikkhonh mas joq dah thunk phon ka phon saiq yahge Yhenmuh vjo mas joq. Housoeh las Ahaz gas hauh zis lyis nyah phon saiq dah mautsung pheh toh.

¹⁵Hwankti Ahaz phudyei Uria lyis taiq toh zis gas, Nvpsangh ngheq jyungshuk, nyenhthang lhyi zonoms shukphoh jyungshuk, hwankti yahge hauh mau mas bang dvnganh dah ngheq phudyei, zonoms shukphoh jyungshuk, dius jens dah zvbiq jyungshuk lyis haih ngah phon saiq zainsmuh mas phudyei aq. Phudyei dah gaunyhauq dvnganh dah suih lyis houmha huot aq. Nghuot laus eq thunk phon ka nyei gyo das zis ngah xiklyis toh aq, ge.

¹⁶Uria gas hwankti taiq toh zis yah dvyhangteh kuot.

¹⁷Hwankti Ahaz gas thunk tank kyahsoe lhyi phe lha lang lyis tsain xwih. Thunk jeis thomh lyis eq thunk noeu masyah khyoq las luk nyhoeuh thoq mas toh.

¹⁸Yhenmuh mas no nyeih wvng dah zvng lyis eq, hwankti loh dah ganjangh lyis eq, hwankti Asiria gvng mas cheh tyamp.[11]

¹⁹Ahaz kuot cho nyet shih goeu gas Yuda hwankti jens Sungson mha lhaih toh.

²⁰Ahaz shei lha Dawi dah wus hwankti lop mas nyhop zis xauh. Nyah joqyos mas nyah lo Hezekia guon khoq.