Read Achang 2 HWANKTI 17 Bible Online

2 HWANKTI 17 - Achang bible

2 HWANKTI 17

¹Yuda hwankti Ahaz guon zis dvci aiq vzvn lyis Ela lo Hoshea gas Israel hwankti bweh los las Samari mas gau zvn guon khoq.

²Nyang gas YHENSAIN dah xikkhonh mas ma gis zis kuot laus eq nyah xikpheh dah Israel hwankti jens teh ma nghuot.

³Hoshea lyis Asiria hwankti Shalmaneser jeszan los lyis Hoshea gas vsomh kham lha zvn yau khoengh kat.

⁴Nghuot laus eq dvzvn lyis Hoshea gas Asiria lyis zvn yau zvn kat chah dah khoengh ma kat, Egutu hwankti So jyank loeuskyoh bang nhang lha gomloeus toq das ge kuot yvlyis Asiria hwankti seq yvmvyah nyang lyis nyhik las thung lhunk toh.

⁵Hauh thang lhyi Asiria hwankti ka Israel dvmau gonh loh las Samari lyis lhaink toh. Samari lyis lhaink zis somh vzvn,

⁶Hoshea guon zis gau vzvn lyis Asiria hwankti ka Samari lyis yoeus las thung dius khyvlyis, Israel dius jens lyis Asiria pheh shwih loh zis yah dvyhamh lyis Hala wus mas, dvyhamh lyis Gozan wuxom Habo lvng nvm mas, dvyhamh lyis Mede jens dah wus jens mas tsain toh.

⁷Samari wus gyoh goeus khasoeh ge lyis Israel jens gas nyamoq lyis Egutu hwankti Pharao loq masyah khyuot goeus las Egutu mau masyah shwih los dah YHENSAIN, nyamoq Mangso lhyi tyi lha yaunos kuot. Nyamoq gas gohtoeu mangso jens lyis paiq,

⁸nyamoq dah xikkhonh masyah YHENSAIN khat tyamp dah gohnyau bang lyi yahge Israel hwankti jens kuot toh dah lyi thungh tsain chank.

⁹Israel dius jens gas YHENSAIN, nyamoq dah Mangso ma o cho kuot. Nyamoq gas, wus ngis mas zis wus kuh, wus dvnganh mas Mangso lhyi ma seq bang paiq dah joqyos tsain ci.

¹⁰Jing thoq khanghmuh yahge saiq nyaus zains khyei khanghmuh mas nyamoq gas luk yah kuot toh zains yahge gywes nyih Ashera dah gungslho tsain toh,

¹¹hauh mau masyah YHENSAIN khat thuq tyamp goeus dius jens kuot zis lyis chank; las Mangso lhyi ma seq bang dah phon jens dvnganh mha nyamoq xangh ngheq. Nyamoq gas nyamoq dah lhung cho yahge phvra lyis vpaiq ge YHENSAIN tying toh dah dang lyis domsyos ma gyo cho yah YHENSAIN lhyi nhaiqyo nhang,

¹³YHENSAIN ka nyah loeuskyoh bang yahge lvpe jens lyis nhang lha Israel yahge Yuda jens lyis taiq kyingh goeus cho ka, Namoq dah ma gis cho lhyi doeuh tyamp las, ngah jyeidwis lvpe jens lyis yah namoq dah phauh thyeih moq lyis Ngos dyei toh goeus Lyi mas bos ngah tyingtoh dang lyis domsyos gyo geh, ge.

¹⁴Nghuot laus eq nyamoq hauh yvlyis domsyos ma gyo; nyamoq gas YHENSAIN, nyamoq dah Mangso lhyi ma lomsjingh dah nyamoq phauh thyeih moq teh, nhaiqlom than.

¹⁵Nyamoq gas nyah jyauh cho gyo das zis he. Nyamoq gas nyang nyamoq dah phauh thyeih yah kuot toh dah thanghchvp lyis ma zom. Nyamoq gas nyah taiq kyingh cho lhyi chaxwe ma nhang. Nyamoq gas vkyuh ma bos silho lhyi paiq las nyamoq nyang vkyuh ma bos cho bweh los las vyvm vwi mau bang dah lyi thungh vchank ge YHENSAIN dah tying dang lyis domsyos ma gyo, hauh bang dah lyi thungh lyis chank.

¹⁶Nyamoq gas YHENSAIN, nyamoq dah Mangso dah lyi dvnganh lyis, ma chank, lhoeu thyoq las paiq das xiklyis thyeq noeululo lho aiq koeuq lyis shonh; nyamoq gas gywes nyih Ashera gungslho kuot, kyi jens lhyi paiq, Bala mangso lhyi phuqsoe.

¹⁷Nyamoq gas Mangso lhyi ma seq bang dah mangso jens lyis nyamoq dah loloeu lonyi jens ngheq jyungshuk khyvlyis phu dyei; gyuiswvng cho, bot thyet cho kuot zis yahge nyamoq gas nyamoq dah gungs lyis Mangso dah nyoqlvtjvng mas shuot cho dyinghjet shoq kuot das xiklyis kyauh zis yah YHENSAIN lhyi nhaiqyo nhang.

¹⁸YHENSAIN ka Israel lyis svsoh nhaiqyo las nyah xikkhonh masyah yoeus tyamp, Yuda vkoq kyingh nyhet toh.

¹⁹Nghuot laus eq Yuda yangh YHENSAIN, nyamoq Mangso tyingtoh dang lyis ma chank, Israel jens kuot toh dah lyi thungh tsain chank.

²⁰YHENSAIN ka Israel vnyau dvnganh lyis, nyah nyoqlvtjvng masyah khat tyamp shishenh jweh shoq nyamoq lyis joeng, lhuot zo bang loq mas kyauh zis yah, peq tyamp.

²¹YHENSAIN Israel lyis Yuda masyah kangh tyamp thang lhyi Israel jens gas Nebat dah lo Yeroboam lyis nyamoq dah hwankti kuot. Yeroboam gas nyamoq lyis YHENSAIN thang chank mhayah khat tomp las yaunos zainsmuh kuot nhang.

²²YHENSAIN kuot das ge nyah jyeidwis lvpe jens lyis yah zaih nhang toh zis yah dvyhangteh nyamoq lyis nyah nyoqlvtjvng masyah khat tyamp buisnyeis jweh shoq, nyamoq gas Yeroboam thang chank las nyang kuot cu khoq dah yaunos dvnganh lyis tsoq, chank kuot. Housoeh las Israel jens gas Asiria mau pheh jons shwih loh zis xauh las khvnyhik jweh shoq nyamoq houmha nyeis nyeis.

²⁴Asiria hwankti ka jons loh Israel jens gungsthaiq Babilon, Khutha, Awa, Hamat yahge Sephawaim mas bang lyis Samari wus jens mas nyhei toh. Nyamoq gas hauh wus jens mas sain yoeus las houmha tsain nyeis.

²⁵Nyamoq houmha joqyos yoeus las nyeis xi loh uhlyis nyamoq gas YHENSAIN lhyi ma tsain paiq. Housoeh las nyang houmha khangkhyi jens nhang lha khangkhyi jens dius dvyhamh lyis ngat sat.

²⁶Asiria hwankti lhyi taiq zis gas, Nvng Samari mas thuot kat dah vnyau jens gas hauh mau mangso dah lyi lyis ma seq, hauh mangso ka khangkhyi jens nhang lha, hauh khangkhyi ka nyamoq lyis ngat sat, ge.

²⁷Housoeh Asiria hwankti taiq kat zis gas, Hauh mau masyah yang jons shwih loh dah phudyei bang mas dvyuk lyis doms nhang kat aq. Nyang hauh mau mangso dah lyi nyamoq lyis jyauh nyeis bas jungh, ge.

²⁸Housoeh las Samari masyah nyamoq jons shwih loh dah phudyei soeu dvyuk Bethel mas los doms nyeis, YHENSAIN lhyi khasoeh paiq chah cho dius jens lyis jyauh.

²⁹Nghuot laus eq Samari mau mas los nyeis dah dius nyau khanghmuh gas nyamoq nyang dah phvra kuot las hank eq hank nyang nyeis dah wus, Israel jens kuot toh khoq dah nyhang joqyos mas khi toh.

³⁰Babilon dius jens gas Sukhot Benot mangso gungslho jens; Kut dius jens gas Nergal gungslho jens; Hamat jens gas Ashima gungslho jens;

³¹Awit jens gas Nibhaz yahge Tartak gungslho jens tsain kuot. Sephawaim jens gas nyamoq lo jens lyis nyamoq dah mangso Adramelek yahge Anamelek lyis ngheq phudyei.

³²Haih dius jens gas YHENSAIN lhyi eq paiq, nyang nyau nyang mas bang hank eq hank nyhang joqyos mas phudyei das xiklyis nyamoq masyah phudyei bang tsain khyen toh.

³³Housoeh las nyamoq gas YHENSAIN lhyi paiq, laus eq nyamoq gas nyamoq nyang mau lyi thung yah dvyhangteh nyamoq dah mangso jens lyis eq paiq.

³⁴Nyamoq gas khvnyhik jweh shoq lyi cauh lyis chank. Nyamoq gas YHENSAIN lhyi ma paiq, Nyang Israel ge nyhink dah Yakop vnyau lyis Nyang dyei toh dah lyi yahge tyingtoh dang eq ma chank.

³⁵YHENSAIN ka nyamoq yah thanghchvp toh las vmingh dyei toh: Gohtoeu mangso lyis paiq cho vkuot, vdupaiq, vphuqsoe, phudyei cho vkuot.

³⁶Namoq lyis yomsoq muh yah, yom yah Egutu masyah khyuot yoeus dah YHENSAIN lhyi domsyos gyo chah; namoq gas ngos lyis du paiq chah, phudyei chah.

³⁷Namoq xiklyis Ngos lhaih toh dah lyi, tyingtoh dang dvnganh lyis vjangh chank nyeis chah. Namoq gohtoeu mangso jens lyis domsyos ma gis gyo.

³⁸Namoq gas Ngos namoq yah toh dah thanghchvp lyis vtohnyhik, gohtoeu mangso jens lyis vpaiq.

³⁹YHENSAIN, namoq dah Mangso, ngos lhyi domsyos gyo chah. Housoeh lyis ngos namoq lyis namoq dah jeswus dvnganh dah loq masyah khyuot yoeus das, ge.

⁴⁰Nghuot laus eq nyamoq gas domsyos ma gyo, nyamoq dah lyi thungh cauh lyis dvchank tsoq khoq.

⁴¹Nyamoq gas YHENSAIN lhyi paiq, nghuot laus eq nyamoq gas nyamoq nyang kuot dah gungslho lhyi eq paiq; nyamoq lo jens nyei jens khvnyhik jweh shoq dvyhangteh cho tsoq kuot nyeis.