Read Achang 2 HWANKTI 18 Bible Online

2 HWANKTI 18 - Achang bible

2 HWANKTI 18

¹Israel mau mas Ela lo Hoshea hwankti guon zis somh vzvn lyis Yuda mau mas Ahaz lo Hezekia hwankti guon xi.

²Nyang hwankti bweh los uhlyis aiqci oeng zvn bos goeus. Nyang Yerusalem mas aiqci gau zvn guon khoq. Nyah ungwes gas Zekharia dah lonyi Abiya nghuot.

³Nyang gas nyah phauh thyeih Dawi thang chank las Mangso dah nyoqlvtjvng mas jus zis kuot.

⁴Nyang gas ma jus dah mangso lhyi paiq joqyos yoeus tyamp, luk yah kuot toh zains jens lyis khyauh, gywes nyih Ashera dah gungslho thyoq. Nyang gas Moshe kuot toh Nehushtan ge dah thunk lhangnyis lyis eq vdoeus doeus khyoq tyamp. Israel jens gas hauh yoq jweh shoq hauh yvlyis xangh tsain phuot dyei.

⁵Hezekia gas YHENSAIN, Israel dah Mangso lhyi loms: Yuda mau mas nyang teh dah hwankti nyah xikpheh eq ma bos, thang pheh eq ma bos.

⁶Nyang gas YHENSAIN lhyi lomluk las Nyah domsyos ma gyo cho khanhamp eq ma kuot; nghuot laus eq YHENSAIN Moshe lhyi yah dyei toh dah tyingtoh dang dvnganh lyis vlhomuh chank kuot.

⁷Housoeh las YHENSAIN ka nyang yah dvgeh nghuot las nyang kuot zis dvnganh kuhxing jebais. Nyang gas Asiria hwankti lhyi ma phuqsoe, gomloeus toq.

⁸Nyang gas Philisti jens lyis zan las Gaza jweh shoq wus ngis mas zis wus zains jens dvmau gonh lyis yoeus.

⁹Hwankti Hezekia guon zis nyei vzvn, Israel hwankti Ela lo Hoshea guon zis nyhet vzvn lyis Asiria hwankti Shalmaneser ka Israel mau mas los wvng zan las Samari lyis lhaink toh.

¹⁰Somh zvn dyingh lyis Samari gyoh goeus; hauh shishenh gas Hezekia guon zis khyuk vzvn, Israel hwankti Hoshea guon zis gau vzvn lyis nghuot.

¹¹Asiria hwankti ka Israel jens lyis Asiria mau pheh jons loh las dvyhamh lyis Hala wus mas, dvyhamh lyis Gozan lvng yvm Habo wuxom mha, dvyhamh lyis Mede wus jens mas toh.

¹²Samari gyoh goeus khasoeh ge lyis Israel jens gas YHENSAIN, nyamoq dah Mangso dah domsyos ma gyo, nyamoq gas nyang nyamoq yah kuot toh dah thanghchvp lhyweq, YHENSAIN dah jyeidwis Moshe nyamoq lyis dyei toh lyi dvnganh lyis domsyos ma gyo. Nyamoq ma gyo, ma chank kuot.

¹³Hwankti Hezekia guon zis dvci nyei vzvn lyis Asiria hwankti Senakherib gas Yuda mau goengtoenk dah wus jens lyis los zan yoeus loh.

¹⁴Yuda hwankti Hezekia gas loeuskyoh bang lyis yah Lakhish mas nyeis Senakherib lyis taiq nhang kat zis gas, Ngos cu goeus, nvng jeszan zis jenh no dyei lyis gas nvng sang zis ngos dyei das, ge. Hezekia ngwis aiq mons paung yahge xing aiq khyoengh paung huon dyei chah ge, Asiria Hwankti phoq toeuh.

¹⁵Hezekia gas Yhenmuh yahge hwankti yhen ziszom joqyos mas joq ngwis dvnganh nyang lyis huon dyei;

¹⁶nyang gas Yhenmuh khomh mas dah xing, nyang soq shauq toh dah zains mas dah xing tsain xik las Senakherib lhyi huon dyei.

¹⁷Hauh thang lhyi Asiria hwankti zainsmuh gas Lakhish mhayah Yerusalem mas hwankti Hezekia lyis zan das xiklyis jesphung zainsmuh dvphung lhyi nhang. Hauh jesphung lhyi nyah zau zainsmuh somh yuk uhshe. Nyamoq jweh loh lyis, misseh yoq bang muh zwi joqyos pheh loh cho kangh, thoq thomh yah tsoq toh tap mas yap joq.

¹⁸Hauh thang lhyi nyamoq hwankti Hezekia lhyi khi uhlyis, hwankti yhen guon soeu Hilkia lo Eliakim, lhaih soeu Shebna, comh soeu Asap lo Yoa moq nyamoq jyank thuq e.

¹⁹Asiria zau dvyuk nyamoq lyis taiq zis gas, Hwankti zainsmuh ka Hwankti Hezekia lhyi cha yah nghamhnywe cho hou iq bos nhang cho seq mes, ge.

²⁰Nyang dung zis gas, Dangkhonh gas jes lyes cho yahge jes yomsoq dah joqyos yoh yoeus das oen nghamh lah? Asiria jens lyis zan yvmas namoq lyis hank yoh pangh das oen nghamh goh lah?

²¹Egutu bang pangh das zis namoq nghamhloms nyeis, nghuot laus eq hauh zis gas jvmbu lyis lhamloq kuot teh nghuot das - hauh zis jap las loq mas zoeu das. Egutu Hwankti lhyi dvyuk yuk khau nges lyis, Egutu Hwankti ka haih jvmbu lhamloq teh nghuot.

²²Asiria zau tsoq taiq zis gas, Nghuot ya, YHENSAIN, ngamoq dah Mangso lhyi loms nyeis, ge namoq ngos lyis taiq das lah? Yerusalem mas dah phon mha kyingh phudyei aq ge Hwankti Hezekia ka Yuda bang yahge Yerusalem bang lyis taiq uhlyis YHENSAIN dah nyhang joqyos yahge phon lhyi nyang thyoq tyamp goeus.

²³Hwankti zainsmuh dah nyings mas xihhonh cho dvkoeuq kuot das. Nvng ngos dyei das nyang mas ji das nyhoq dius yoh xo lhyi ka ngos nvng lyis nyang aiq khyoengh dyei das.

²⁴Nvng Asiria zau jens mas ngis thank soeu yah yangh ma yoh byi zis, jeslhyingh yahge nyang, yoh das xiklyis Egutu hwankti lhyi nghamhloms nyeis lhyeh?

²⁵YHENSAIN pangh cho ma bos zis ngos haih mau lyis mhont goeus oen nvng nghamh lah? YHENSAIN nyang ngos lyis, Haih mau lyis loh zan aq, mhont aq, ge.

²⁶Hauh uhlyis Hilkia lo Eliakim, Shebna yahge Yoash ka Asiria zau lyis taiq zis gas, Ngamoq lyis Aramik nyingh yah taiq aq, ngamoq seqgyo. Wus ciank thoq mas nyeis bang xauhgyo shoq Hebre nyingh yah vtaiq, ge.

²⁷Nyang nyamoq lyis toeuh zis gas, Hwankti zainsmuh ka ngos lyis namoq yahge hwankti lhyi kyingh taiq bas jungh ge nhang kat lhyeh? Wus ciank mas tsung lha namoq yah dvgeh vsainnyang dah khyeih yheih zo shuk das bang jyank mas nhang kat ma nghuot lhyeh, ge.

²⁸Hauh zau toq yap las Hebre nyingh pheh yah kaiq zis gas, Asiria Hwankti zainsmuh namoq lyis taiq kyoh nyeis dah dang gyo geh.

²⁹Nyang gas Hezekia dah mhuih zis ma xauh das xiklyis namoq lyis zaih nhang. Hezekia gas namoq lyis ma yoh khyuot yoeus.

³⁰Namoq YHENSAIN lhyi nges das xiklyis nyang lyis vmhuih nhang. YHENSAIN ka namoq lyis khyuot yoeus das, namoq dah wus lyis jons loh das dah Asiria jesphung lhyi tomp tyamp das oen vnghamh.

³¹Namoq Hezekia dah dang vgyo goh. Asiria Hwankti zainsmuh gas namoq lyis wus masyah thuq los geh, vsomh kham geh, ge vmingh dyei. Zvbiq yoh dyei dah zvbiq khyam, ohlhyoq yoh kuot dah lvmih; tsanlun mau, tsanlun coeu, dyoyhei yoh dah namoq mau yah doeusgoh dah mau pheh namoq lyis Hwankti zainsmuh ma shwih loh dvchank - namoq dvnganh lyis namoq nyang dah zvbiq nwis mas zvbiq, nyamoq nyang dah maiphang zains mas vshih zo nhang lha namoq nyang dah jeisdwang mas jeis shuk nhang das. Nyang vmingh dyei zis lyis namoq chank kuot lyis gas namoq ma shei, kang dwis das. Hezekia namoq lyis, YHENSAIN ka yang lyis khyuot yoeus das, ge jyoeuq zis lyis vgyo goh.

³³Dius nyau nyoshoq dah mangso jens gas nyamoq dah mau lyis Asiria hwankti zainsmuh loq masyah khyuot yoeus ku lhyeh?

³⁴Hamat mau mangso yahge Arpad mangso khalhye gah? Sephawaim, Hena, Iwa mangso khalhye gah? Dvyuk yuk Samari lyis ngah loq masyah khyuot yoeus ku lhyeh?

³⁵Hounyhoq mau mas dah mangso jens mas nyamoq dah mau lyis ngamoq dah hwankti zainsmuh loq masyah khanhamp khyuot yoeus ku lah? Housoeh lyis YHENSAIN ka Yerusalem lyis khyuot yoeus das oen namoq cha lhyi nghamhloms?

³⁶Hwankti Hezekia vphuk taiq goh, ge vgus dius jens gas samlo nyeis: nyamoq dang dvkhonh eq ma taiq.

³⁷Hwankti yhen guon soeu Hilkia lo Eliakim, Shebna, Asap lo Yoa moq gas nhaiqkuk las nyamoq dah dyimis langchuiq zis yah Hwankti jyank mas Asiria zau dah dang los taiq kyoh.