Read Achang 2 HWANKTI 19 Bible Online

2 HWANKTI 19 - Achang bible

2 HWANKTI 19

¹Hwankti Hezekia nyamoq taiq kyoh zis xauhgyo yah dvyih nyang nhaiqkuk zis yah nyah dyimis langchuiq, yanghthung dyimis wuot las YHENSAIN dah Yhenmuh pheh e loh.

²Nyang gas hwankti yhen guon soeu Eliakim, lhaih soeu Shebna, phudyei bang mas logis jens lyis yanghthung dyimis wuot las Amoz lo lvpe Esaia jyank mas nhang kat.

³Haih zis gas Esaia lyis taiq kyoh das nyang nyamoq lyis taiq loeus nghuot: Khvnyhik gas yaukyenh nyeih; ngamoq gas joeng zis xauh las xoqphuh nyeis. Ngamoq gas lo khoeu shishenh jweh laus eq lo yoh khoeu das yom ma bos dah vmesbih yah doeusgoh nyeis.

⁴Asiria hwankti zainsmuh gas kang dwis Mangso lhyi jwangh das xiklyis nyah zau zainsmuh lyis nhang kat. YHENSAIN, nah Mangso ka hauh jwangh dang lyis xauhgyo las hauh dang taiq bang lyis joeng bas jungh. Housoeh las ngamoq dah dius nyet shih bang xiklyis Mangso jyank shvmanh dung dyei aq, ge.

⁵Esaia jyank mas Hezekia dah loeus jweh loh lyis,

⁶Esaia heisoeh ge phuk kat, YHENSAIN namoq lyis taiq: nyang namoq lyis ma yoh khyuot yoeus ge dah Asiria jens dah dangkhonh yah namoq lyis vkyuk nhang.

⁷YHENSAIN ka hwankti zainsmuh lyis ma jyoeng dah loeus dvkoeuq xauhgyo nhang lha nyang hauh loeus xauhgyo zis yah nyah mau pheh tauh loh das. YHENSAIN ka nyang lyis houmha sham yah gyoh nhang das, ge.

⁸Asiria zau gas hwankti zainsmuh Lakhish wus masyah thuq khoq las Libna wus vyvm vwi mas bang yah zan-goh nyeis ge zis xauhgyo lyis, nyang houmha hwankti zainsmuh yah xauhgoh das xiklyis loh.

⁹Asiria jens gas Ethiopia Hwankti Tirhaka uhshe dah Egutu jesphung ka nyamoq lyis zan das xiklyis los nyeis goeus ge xauhgyo. Hauh loeus lyis hwankti zainsmuh xauhgyo lyis nyang gas Yuda Hwankti Hezekia lyis maussauh huon kat.

¹⁰Hauh maussauh mas heisoeh ge: Nvng khau nges dah mangso ka, Yerusalem wus Asiria hwankti loq mas ma yoh jweh ge nvng lyis vmhuih nhang.

¹¹Asiria hwankti zainsmuh gas nyang mhont das ge nghamh thyet toh dah mau lyis khasoeh kuot zis nvng xauhgyo goeus. Nvng yoh luiq das oen nghamh lah?

¹²Ngah phauh thyeih moq gas Gozan, Haran, Rezep wus lyis mhont las Telasa wus mas nyeis dah Eden dius jens lyis sat uhlyis nyamoq dah mangso jens mas khah mangso eq nyamoq lyis ma yoh khyuot yoeus.

¹³Hamat, Arpad, Sephawaim, Hena yahge Iwa ge dah wus jens mas hwankti jens khamha tsain nyeis lah, ge.

¹⁴Hwankti Hezekia ka hau loeuskyoh bang loq mas dah maussauh xauh yoeus las nghap. Housoeh nyang Yhenmuh pheh doq loh las hauh maussauh YHENSAIN xikkhonh mas lhywa toh las,

¹⁵vkyuh dung zis gas, Kherubim jo mas nyeis, YHENSAIN, Israel dah Mangso eh, nvng nyeisjvng mas dah munghdan dvnganh lyis guon dah dvso kyingh dah Mangso nghuot. Nvng maukhung yahge nyeisjvng lyis gvnkhanh toh.

¹⁶YHENSAIN eh, gvshih ngamoq mas bweh nyeis cho lhyi bos yoeuh dyei shih aq. Dwis nyeis Mangso, nvng lyis Senakherib jausxo cho taiq nyeis zis dvnganh kamp gyo aq.

¹⁷Ngamoq dvnganh seq, YHENSAIN eh, Asiria hwankti zainsmuh jens gas jyoengh nyang vmau mau mas dah dius nyau jens lyis mhont goeus, hauh dius nyau jens dah mau dvnganh lyis jyamhjyuklhyuk bweh nhang lha,

¹⁸mangso ma nghuot dius loq yah kuot toh saiq, luk gungslho, hauh dius nyau jens dah mangso jens lyis ngheq tyamp goeus.

¹⁹YHENSAIN, ngamoq dah Mangso eh, nvng dvyuk kyingh Mangso nghuot yvlyis nyeisjvng thoq mas dah munghdan jens yoh seq bas jungh, ngamoq lyis Asiria jens loq masyah gvshih khyuot kat aq, ge dung.

²⁰Hauh thang lhyi Amoz lo Esaia Hwankti Hezekia jyank mas tying kat zis gas, YHENSAIN, Israel dah Mangso heisoeh ge: Nvng Asiria hwankti zainsmuh Senakherib lyis tyi lha ngos lyis dung dang xauhgyo goeus.

²¹Heika nyang yah sen lha YHENSAIN taiq dang nghuot. Yerusalem wus gas nvng Senakherib lyis yis, dius ngis khyoq.

²²Nvng hank lyis jausxo, hank lyis jwangh nyeis oen nghamh lah? Nvng gas Israel dah gyingshang Mangso, ngos lyis phauh nyang cho ma kuot.

²³Nvng nah jeslhyingh jens dvnganh lyis yah Lebanon boms nyhang jens lyis nvng yoh yoeus goeus, ge ngos lyis moengs kyoh das xiklyis loeuskyoh bang lyis ngah jyank nhang kat. Nvng gas houmha nyhang thank arit zains yahge gis thank shvxoeuh zains thoeuq, noq thank boms mas jweh goeus, ge moengs.

²⁴Nvng gas gohnyau bang dah mau mas jeisdwang doeu shuk, nah jeslo jens Nile lvng nang kanh goeus ge moengs.

²⁵Haih cho dvnganh lyis gohlhain yah ngos sont toh goeus zis nvng vxauhgyo ku lah? Housoeh las gvshih ngos hauh zis bweh nhang goeus. Goeng dah wus jens lyis thyoq las luk boms bweh nhang dah yomsoq, gvshih ngos nvng lyis dyei goeus.

²⁶Houmha nyeis bang gas yomnhuk; nyamoq dvn las chuot. Nyamoq gas pa mha dah mhanh teh nghuot ya buisthuq lyeis gywes muot tangh zis xauh dah yhenkhung mha yuk dah nyoq teh nghuot.

²⁷Nghuot laus eq ngos nah cho dvnganh seq, nvng cha kuot cho ngos seq, nvng khapheh loh cho ngos seq. Nvng ngos lyis nhaiqlom kha iq dyis cho ngos seq.

²⁸Hauh nah nhaiqlom dyis cho, nah khwank cho lhyi ngos xauhgyo goeus, las ngos nah nho mha nghweh kat, nah nhuotkuk mas lungthungh kat las, nvng los yvcho yah shwih tauh loh das, ge.

²⁹Hauh thang lhyi Esaia Hwankti Hezekia lyis taiq zis gas, Haih zis gas thang pheh bweh los das vlho nghuot. Nvng khvzvn yahge sangnhaiq nyang pheh yah yuk zis xauh zo das. Hauh thang lhyi jweh los das vzvn lyis gas nvng jyo yoh khyoq las xauh yhomh das, zvbiq khyam xauh tsungh las vshih yoh zo das.

³⁰Nyet shih dah Yuda yhenbang gas vkhyei mha vnyet doms chent los las nyhang mha vshih shih dah vzains teh jebais das.

³¹Yerusalem yahge Zion Boms mas dius jens nyet nyeis shih das khasoeh ge lyis housoeh bweh das xiklyis Yomzains YHENSAIN nghamh thyet.

³²Haih zis gas YHENSAIN taiq toh dah Asiria hwankti zainsmuh dah cho nghuot: Nyang haih wus mas ma wvng das nghuot ya haih wus lyis nyo dvkhat eq ma baiq das. Wus nvm mas gos chi dah jeslo jens ma los das las, wus lyis lhaink das xiklyis cha eq ma ci das.

³³Nyang los yvcho yah tauh loh das. Nyang gas haih wus khau mha ma wvng das, ge ngos YHENSAIN taiq.

³⁴Ngvnyang dah nyoqnho ngelang xiklyis yahge ngah jyeidwis Dawi yah toh dah dangthoengh gvng mas ngos haih wus lyis gos las khyuot yoeus das, ge.

³⁵Hauh nyenh lyis YHENSAIN dah loeuswons soeu hau Asiria thoenggus khau mha loh las jeslo dvsens xetmons oeng khyoengh sat. Nungs nvpsangh lyis, dius dvnganh gas shei lhain toh.

³⁶Housoeh las Asiria hwankti zainsmuh Senakherib gas houmha nyah jesphung lhyi yop las Ninewe pheh tauh loh.

³⁷Dvnyeih nyang nyah mangso Nisrok yhenmuh mas paiq nyeis lyis nyah lotang Adramelek yahge Sharezer gas nyang lyis sham yah sat. Housoeh nyah aiq yuk gas Ararat mau pheh phang luiq loh. Nyah lo Esahadon nyah joqyos mas guon khoq.