Read Achang 2 HWANKTI 21 Bible Online

2 HWANKTI 21 - Achang bible

2 HWANKTI 21

¹Manase ka dvci aiq zvn bos lyis hwankti bweh los zis yah Yerusalem mas oengci oeng zvn guon khoq. Nyah ungwes gas Hepziba nghuot.

²Nyang gas, YHENSAIN ka Israel jens xikkhonh masyah khat tyamp goeus dius nyau jens dah vchoqh vjyot kuot cho chank, las YHENSAIN dah nyoqlvtjvng mas yaunos kuot.

³Nyah uwus Hezekia mhont goeus dah nyhang joqyos jens lyis doms ci. Nyang Bala xiklyis phon tsain ci, Israel hwankti Ahab kuot khoq teh gywes nyih Ashera gungslho kuot. Manase ka kyi jens lyis eq paiq.

⁴YHENSAIN ka, Ngos lyis paiq das joqyos, ge dah Yhenmuh mas Manase ka ma jus mangso phon tsain ci.

⁵Nyang gas housoeh teh dah phon lhyi Yhenmuh khyam yvmlhaink aiq kant mas kyi jens lyis paiq das xiklyis tsain ci.

⁶Nyang nyah lo lyis nyi ngheq phudyei. Nyang gas botthyet, gyuiswvng cho kuot, loq yoeuh, mandan muot. Nyang gas YHENSAIN dah nyoqlvtjvng mas yaunos zainsmuh kuot las YHENSAIN lhyi nhaiqyo nhang.

⁷Nyang gas Yhenmuh mas gywes nyih Ashera gungslho lhyi toh. Haih Yhenmuh yah sen lha YHENSAIN ka Dawi yahge nyah lo Solomon lyis taiq toh zis gas: Ngos lyis paiq das joqyos lyis Israel dvci aiq koq dah maunyeis dvnganh masyah haih Yerusalem Yhenmuh lyis ngos khyen yoeus.

⁸Ngos Israel jens lyis taiq toh zis yah dvyhangteh, ngah jyeidwis Moshe nyamoq lyis taiq toh dah lyi vgus chank kuot das xiklyis zaih lhyi ka, ngos namoq dah phauh thyeih moq lyis dyei toh dah mau masyah nyamoq lyis ma thuot ma lvng nhang das, ge.

⁹Nghuot laus eq Yuda dius jens gas YHENSAIN dah domsyos ma gyo, nyamoq dah xik lyis yah YHENSAIN ka hauh mau masyah khat thuq tyamp goeus dius nyau jens cu yaunos thoq lyis Manase ka nyamoq lyis shwih cu.

¹⁰YHENSAIN ka nyah jyeidwis lvpe jens lyis yah taiq zis gas,

¹¹Yuda hwankti Manase ka Amori jens thoq lyis zes las vchoqh vlhauq lhung dah muh kuot: nyah phvra yah Yuda jens lyis cu nhang.

¹²Housoeh las ngos YHENSAIN, Israel Mangso ka loeus xauhgyo bang yuk khanghmuh ma thoq gyo lo das xiklyis Yerusalem wus yahge Yuda mau mas ma thoq taiq lo dah shohjyen cho she kat das.

¹³Ngos Samari lyis kuot teh, Israel Hwankti Ahab yahge nyah vnyau vshih lyis kuot teh Yerusalem lyis ngos joeng das. Buot las toeu mhuk toh dah ban shang teh ngos Yerusalem mas dius jens lyis shang tyamp das.

¹⁴Nyet joq dah dius jens lyis tyamp las jeswus loq mas kyauh das. Hauh jeswus gas nyamoq dah mau lyis zan ung das, zisyos lyis lhuot yoeus das.

¹⁵Ngos ngah dius jens lyis housoeh kuot das: khasoeh ge lyis, nyamoq gas yaunos kuot las ngos lyis nhaiqyo nhang zis nyamoq dah phauh thyeih moq Egutu masyah thuq los dah buisnyeis masyah khvnyhik jweh shoq nghuot.

¹⁶Manase ka, Yerusalem wus cho mha suih lvng yaus nyeis jweh shoq, yobos ma bos bang lyis sat. Haih cho ka nyang Yuda dius jens lyis silho shwih paiq las YHENSAIN dah nyoqlvtjvng mas yaunos shwih kuot thoq lyis ma goh yaunos kuot cho nghuot.

¹⁷Manase kuot cho nyet shih goeu yahge nyang cu dah yobos dvnganh gas, Yuda hwankti jens Sungson mha lhaih toh.

¹⁸Manase shei lha, Uza khyam ge hwankti yhen khyam mha nyhop zis xauh. Nyah joqyos mas nyah lo Amon guon khoq.

¹⁹Amon gas aiqci aiq zvn bos lyis Yuda hwankti bweh los las, nyang Yerusalem mas aiq zvn guon khoq. Nyah ungwes gas Yotba wus mas Haruz dah lonyi Meshulemet nghuot.

²⁰Nyang gas nyah uwus Manase kuot khoq teh YHENSAIN dah nyoqlvtjvng mas ma gis zis kuot;

²¹nyah uwus suh e cho dvnganh chank las nyah uwus paiq phuqsoe khoq dah silho lhyi paiq phuqsoe.

²²Nyang gas nyah phauh thyeih moq dah Mangso, YHENSAIN lhyi tyamp las YHENSAIN dah tyingtoh dang lyis domsyos ma gyo.

²³Amon dah zau jens gas, nyang lyis gomloeus toq zis yah nyang lyis hwankti yhen mha sat.

²⁴Nghuot laus eq hauh mau bang gas hwankti Amon lyis gomloeus toq bang dvnganh lyis sat. Hauh thang lhyi hauh mau mas dius jens gas, nyah joqyos mas nyah lo Yosia lyis hwankti toh.

²⁵Amon kuot cho nyet shih goeu gas Yuda hwankti jens Sungson mha lhaih toh.

²⁶Nyang lyis, Uza khyam mha bos, lop mas nyhop. Nyah joqyos mas nyah lo Yosia guon khoq.